Փաստ ինֆո

Երբ հասկացել են, որ հրթիռով թույլ է մեղադրանքը, այս փողերի լվացման դրվագը ևս ավելացրել են, կարելի է օրենքը թեթև շրջանցել, բայց չի կարելի թքել պետության վրա:

Այդ մասին քիչ առաջ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում, նախագահությամբ Արշակ Վարդանյանի, պաշտպանական ճառով հանդես գալով՝ ասաց ԼՂՀ ՊԲ նախկին հրամանատար Սամվել Բաբայանը:

Բաբայանը նաև հակիրճ անդրադարձավ իր անցած ճանապարհին՝ հիշեցնելով, որ 1992 թ. Պաշտպանության բանակի առաջին դեմք է եղել:

«2400 տարածք էր մնացել, ես ձեզ հանձնել եմ 12 700: 19 ինքնաթիռ է խփվել և 17 ուղղաթիռ, որից 10-ը՝ այդ Իգլաներով, և եթե դուք պետք է ինձ գնահատականներ տաք, թե ես ոնց եմ ծառայել այս երկրին, ուրեմն… էն ժամանակ շատ փոքր էիր…»,- ասել է Բաբայանը:

Միևնույն ժամանակ Բաբայանը նշեց՝ այն, որ մեղադրողը նշում է, թե «ԻԳԼԱ»ից հրաժարման փուլ չի եղել, դա, մեղմ ասած, իրականությանը չի համապատասխանում, փաստերն այլ բան են ասում:

Փողերի լվացման դրվագին անդրադառնալով՝ Բաբայանն ասաց. «Ես կրիմինալ որևիցե քայլ չեմ արել, ինձ պարտք են եղել և այդ գումարը ուղարկել են, հայտնել եմ, թե ով է պարտք ու ումից եմ ստացել այդ գումարը, Բաբայանը մի տարի ավել կամ պակաս նստի, դրանով հարց չեք լուծելու»,- ասաց Սամվել Բաբայանը՝ հավելելով, որ առաջադրված մեղադրանքներում իրեն մեղավոր չի ճանաչում:

Հիշեցնենք, որ դատախազը մեղադրական ճառով հանդես գալով միջնորդել էր Սամվել Բաբայանին մեղավոր ճանաչել ՀՀ քրեական օրենսգրքի 38-235-րդ հոդված 2-րդ մասով, 190-րդ հոդվածի 1-ին մասով և նրան դատապարտել 7 տարվա ազատազրկման։

Գործարար Սանասար Գաբրիելյանին և ամբաստանյալ Արմեն Պողոսյանին մեղադրողը միջնորդեց մեղավոր ճանաչել ՀՀ քրեական օրենսգրքի 235-րդ հոդվածի 2-րդ մասով. գործարարի համար դատախազը պահանջեց 4 տարվա, իսկ Արմեն Պողոսյանի համար՝ 3 տարվա ազատազրկում:

Նշենք նաև, որ այսօր պաշտպանական ճառով հանդես եկավ նաև ամբաստանյալ Արմեն Պողոսյանի պաշտպան Վիկտորյա Կիրակոսյանը՝ գտնելով, որ իր պաշտպանյալի նկատմամբ պետք է կայացվի արդարացման դատավճիռ:

Լուսանկարը՝ ֆոտոլուրի

Աղբյուր` Փաստինֆո