Փաստ ինֆո

«Ելք» դաշինքի քարոզարշավի ժամանակ միջադեպի գործով այսօրվա դատական նիստում սկսվեց դատաքննությունը:

Ըստ մեղադրական եզրակացության եզրափակիչ մասի, Արթուր Այվազյանը 31.03.2017թ. ժամը 22:40-ի սահմաններում Անդրանիկի փող 53 շենքի բակում անթաքույց արհամարանք դրսևորելով հասարակության նկատմամբ , «ԵԼՔ» դաշինքի համակիր Հ. Սարգսյանի նկատմամբ բռնություն գործադրելով կոպիտ կերպով խախտել է հասարակական կարգը որի ընթացքում պահել է ապօրինի ձեռք բերած գործարանային արտադրության 5,6 մմ տրամաչափի օղակաձև բոցավառման որսորդական սպորտային ռազմամթերք հանդիսացող 7 փամփուշտներով լիցքավորված ինքնաշեն ակոսափող թմբուկավոր հրազեն հանդիսացող ատրճանակ:

Արթուր Այվազյանը («Մանախ» մականվամբ) հայտարարեց, որ մեղավոր չի ճանաչում իրեն առաջադրված՝ ՀՀ քրեական օրենսգրքի 258-րդ հոդվածի 2-րդ մասով՝ խուլիգանություն, որ կատարվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով, և 235-րդ հոդվածի 1-ին մասով՝ ապօրինի կերպով զենք, ռազմամթերք ձեռք բերելը, պահելը, մեղադրանքում:

Ամբաստանյալը հայտարարեց, որ իրեն անհիմն կերպով մեղադրանքներ են առաջադրվել, իր նկատմամբ հետապնդում է իրականացվում, գործը շինծու է ու պատվիրված: Ըստ Արթուր Այվազյանի, իր նկատմամբ թույլ են տրվել քրեադատավարական օրենսգրքի կոպիտ ու ակնհայտ խախտումներ, մեղադրանքի կեղծ ապացույցներ, մասնավորապես, ակնհայտ կեղծ փորձագիտական եզրակացություններ կազմվել:

Մեղադրողն ի պատասխան հայտարարեց, որ Հատուկ քննչական ծառայությունը կեղծ ապացույցների վերաբերյալ որոշում է կայացրել:

«Փաստինֆո»-ի հետ զրույցում ամբաստանյալի պաշտպան Հայկ Ալումյանը հայտնեց, որ ՀՔԾ-ն երկու հարց է քննել՝ ապացույցները կեղծված են, թե ոչ, հաղորդումն ակնհայտ սուտ հաղորդում է, թե ոչ, ՀՔԾ-ն բավարար ապացույցներ չի ունեցել, որ ապացույցները կեղծ են, սակայն նաև բավարար ապացույցներ չի ունեցել այդ հանգամանքը հերքելու համար, քանի որ Արթուր Այվազյանի նկատմամբ էլ մերժվել է սուտ մատնության հատկանիշներով քրեական գործի հարուցումը: «Այսինքն՝ ոչ բավարար ապացույցներ են ունեցել, որ կեղծ է և ոչ էլ ապացույց են ունեցել, որ կեղծ չի»,- ասաց Հայկ Ալումյանը:

Պաշտպանը դատական նիստում միջնորդեց, որպեսզի գործով տուժող ճանաչված Հայկ Սարգսյանը և «Ելք» դաշինքի անդամ վկաները հարցաքննվեն միևնույն օրը, որպեսզի նրանք հնարավորություն չունենան մտքերի ու փորձի փոխանակություն կատարել:

Դատարանը որոշեց սկսել վկաների հարցաքննությունից, իսկ Հայկ Ալումյանի հիշատակած վկաները՝ հինգ հոգի, դատարանի որոշմամբ, կհարցաքննվեն նույն օրը:

Այսօր հարցաքննվեց մեկ վկա, ով Արթուր Այվազյանի հետ նույն բակում է բնակվում:

Վկան հայտնեց, որ ինքը մոտակայքում գտնվող իր խանութում է եղել, երբ կռիվ-քաշքշուկ է եղել, տեսել է Արթուրին արյունաշաղախ դեմքով: Արթուրի ձեռքում դրոշ է տեսել, որևէ այլ իր, առարկա նրա ձեռքին չի տեսել, որևէ մեկի մոտ զենք չի նկատել, եթե զենք լիներ, տեսանելի կլիներ:

Դատարան էին ներկայացել ևս երկու վկաներ, սակայն նրանք մինչև իրենց հարցաքննությունը չէին մնացել, վկաներից մեկը հեռացել էր վատ ինքնազգացողության պատճառով, իսկ մյուսը հայտնել է, որ տվյալ պահին դատարանից հեռու է գտնվում և չի կարող վերադառնալ դատարան:

Հաջորդ դատական նիստի համար կծանուցվեն ոստիկան ու ընթերակա վկաները:

Աղբյուր` Փաստինֆո