Փաստ ինֆո

Զանգվածային անկարգությունների՝ Արարատ Խանդոյանի վերաբերյալ գործով մեղադրողի առարկությունը առարկություն էր ոչ թե վերաքննիչ բողոքի դեմ, այլ՝ Ա.Խանդոյանի պաշտպանի գործողությունների դեմ: Ւնչպես «Փաստինֆո»-ի լրագրողի հետ զրույցում հայտնեց Արարատ Խանդոյանի պաշտպան Արա Ղարագյոզյանը, մեղադրողն իրեն անձնական վիրավորանքներ է հասցրել՝ հայտարարելով, որ «դա միայն իմ հիվանդագին երևակայությունն է, որ ես չեմ տիրապետում քրեական դատավարությանը, մի քանի նախադեպեր սովորել եմ, իրավաբան եմ դարձել»:

«Ես միայն իրավաբանի իմ բարձր կոչումը ոտնատակ չանելու համար ասացի, որ մեղադրողն ըստ էության 36-էջանոց բողոքի վերաբերյալ որևէ փաստական տվյալի չանդրադարձավ, միայն նորից ընթերցեց մեղադրական եզրակացությունը: Իսկ որ վկաների ցուցմունքները արժանահավատ չեն, օրենքի խախտմամբ են ձեռք բերվել, որ օրենքի խախտմամբ է իրականացվել հատուկ միջոցների կիրառումը, 46 տուժողների ցուցմունքները, դատաբժշկական եզրակացությունները չեն վերաբերվում անմիջապես իմ պաշտպանյալին, որևէ փաստական տվյալի մասին իմ փաստարկներին չանդրադարձավ, ի վերջո միայն վիրավորական արտահայտություններ հնչեցրեց իմ հասցեին»,- ասաց Արա Ղարագյոզյանը՝ հավելելով, որ ինքը միայն ասել է, որ նմանատիպ վարքագիծ դրսևորելով մեղադրողն ուզում է դատախազությունում հաստատվել, իր տեղը գտնել, բայց, «ոնց հասկանում եմ, դեռ չի գտել», դրա համար էլ իրավաբանին ոչ հարիր պահվածք է դրսևորում: «Ես որևէ վիրավորական արտահայտություն չհնչեցրեցի իր հասցեին, ինչը նաև արձանագրվեց նախագահող դատավորի կողմից, նկատողություն արվեց դատախազին, նշելով, որ պաշտպանը որևէ վիրավորական արտահայտություն չհնչեցրեց Ձեր հասցեին»:

Արա Ղարագյոզյանը նշեց նաև, որ իրենք վերաքննիչ բողոքով ապացուցել են, որ Արարատ Խանդոյանի գործողություններում բացակայում է հանցակազմը: Տեսանյութից երևում է, որ Արարատ Խանդոյանին հետևից հրում են, նա դիպչում է ոստիկանական պատնեշին ու սկսում են նրան մահակներով հարվածել: Իսկ մեղադրանքում նշումն առ այն, թե նա փորձել է վահան խլել, ոստիկանին ձեռքերով ու ոտքերով հարվածներ հասցնել ըստ էության իրականությանը չի համապատասխանում: Պաշտպանը անդրադարձել է ոստիկանության երկու աշխատակցի՝ իրականությանը չհամապատասխանող ու ոչ արժանահավատ ցուցմունքներին: Նրանք պնդում էին, որ տեսել են, թե ինչպես է Արարատ Խանդոյանն երկու ձեռքերով, երկու ոտքերով հարվածել: Դրանից բացի ոստիկանության վեցերորդ վարչության աշխատակիցն անընդհատ ասել է, որ Արայիկ Խանդոյանն է հարվածել, պաշտպանի այն հարցին Արայիկ, թե Արարատ Խանդոյա՞նն է հարվածել, նա պատասխանել է՝ երկուսն էլ: Սակայն հետո «դատախազն աչքով-ունքով հասկացրեց, իսկ դատավորը հարցրեց՝ Արայիկը, թե Արարատը», նա պատասխանեց՝ կներեք, շփոթվել եմ: «Սա փաստ է, որ նրանք չեն ճանաչում Արայիկ ու Արարատ Խանդոյաններին, միայն գիտեն Խանդոյան ազգանունը ու դրա հիման վրա դատախազության կողմից ուղղորդված այդ երկու վկաները ցուցմունք են տվել»:

Պաշտպանական կողմի բոլոր հարցերին, թե ո՞վ, որտեղի՞ց, ո՞ր ժամին են բերման ենթարկել Արարատ Խանդոյանին, ո՞ւր են տարել, վկաները պատասխանում էին, որ չեն հիշում: Եթե նրանք բերման են ենթարկել Արարատ Խանդոյանին, ինչպե՞ս կարող են չհիշել, որ իրենք են բերման ենթարկել: Ըստ Ա.Ղարագյոզյանի, վկաներից մեկը ասել է, որ Արարատ Խանդոյանին Ազգային անվտանգության ծառայություն են տարել, իսկ մյուսը՝ որ ոստիկանության բաժին:

Ըստ պաշտպանի, առաջին ատյանի դատարանը Մարդու իրավունքների եվրոպական կոնվենցիայի վեցերորդ հոդվածի ՝ Արդար դատաքննության իրավունք բազմաթիվ խախտումներ է թույլ տրվել, մասնավորապես, զրկել է պաշտպանական իրավունքից, հանրային պաշտպանի ներգրավել Արարատ Խանդոյանի բացակայությամբ, պաշտպանական կողմի մի շարք միջնորդությունների մերժել, Դատավորի վարքագծի կանոնների խախտում թույլ տվել և այլն:

Վերաքննիչ դատարանից պաշտպանն ակնկալիք չունի, քանի որ մեկուկես տարվա ընթացքում որևէ դրական հետևանք իրենք չեն տեսել, բայց լավ հասկանում են, թե նրանց ինչ է սպասվում Եվրոպական դատարանից: Արդեն իսկ երեք բողոք Արարատ Խանդոյանի հետ կապված հասել է Եվրոպական դատարան, առաջին գանգատը վարույթ է ընդունվել, մյուս երկուսը միացվել են առաջին գանգատին: Պաշտպանը խնդրում է ճանաչել Կոնվենցիայի 5-րդ հոդվածի՝ Ազատության և անձնական անձեռնմխելիության իրավունք, 1-ին և 3-րդ մասերի, 6-րդ հոդվածի խախտումները:

Աղբյուր` Փաստինֆո