Փաստ ինֆո

Մարաշի զինված խմբի գործով այսօրվա նիստում շարունակվեց  35 հատորանոց գործի 8-րդ հատորում  ներառված նյութերի հետազոտումը: Մեղադրողները մեկ առ մեկ հրապարակում էին գործի բոլոր նյութերը՝ լինեն դրանք մեղադրանքի հիմքում դրված ապացույցներ, թե ոչ: Անգամ նկարագրվեցին մի շարք լուսանկարներ՝ մեկ անծանոթ  աղջիկ ու մեկ անծանոթ տղա կամ Արթուր Վարդանյանն անծանոթ մեկի հետ: 

Ամբաստանյալ, ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանը այդ հարցի հետ կապված իր տարակուսանքը հայտնեց: Վազգեն Սարգսյանի գերեզմանի մոտ լուսանկարը կամ ազատամարտիկների ցուցակը ի՞նչ կապ ունի մեղադրանքի հետ, «հետո ինչ, ձեզ ինչ, 37 թիվն է», ասաց նա: 

Վ.Շիրխանյանի պաշտպան Հայկ Ալումյանը միացավ հայտարարությանը՝ նշելով, որ իր պաշտպանյալը՝ չլինելով իրավաբան, տրամաբանորեն ճիշտ  է կողմնորոշվում  ու միանշանակ տեղին ու ճիշտ դիտարկում է անում, պետք է հետազոտվեն մեղադրանքի հիմքում դրված ապացույցները: 

Պաշտպան Հովիկ Արսենյանն իր հերթին հայտարարեց՝ որպես ինչ է հրապարակվում արձանագրությունն, ըստ որի գործի համար նշանակություն ունեցող որևէ բան չհայտնաբերվեց, ինչպես նաև անձնական ալբոմները, ուղեկցական գրությունները: Պետք է հրապարակվեն  այն փաստաթղթերը, որոնք մեղադրողները հետագայում դնելու են մեղադրական ճառի հիմքում, ասաց փաստաբանը: 

Պաշտպան Գիվի Հովհաննիսյանը նույնպես նշեց՝ մեղադրողները թող ընթերցեն մեղադրական եզրակացության մեջ ներառված ապացույցները, ոչ թե ամբողջ գործը, «ժամանակ ենք կորցնում»: Պաշտպանը միջնորդեց նաև գործի քննությունը հետաձգել, որպեսզի մեղադրողները ծանոթանան գործին ու հրապարակեն մեղադրանքի ապացույցները: 

Մեղադրող կողմը, սակայն, հայտարարեց, որ քրեական գործի բոլոր նյութերը գործի համար նշանակություն ունեն:   

Հայտարարությամբ հանդես եկավ նաև դատական նիստից հեռացված, ապա դատական նիստերի դահլիճ վերադարձված ամբաստանյալ Արթուր Վարդանյանը: Նա հայտարարեց, որ մեղադրանքի կողմն անձնական ուղղվածություն է տալիս գործի քննությանը, ուզում են վիրավորել մարդկանց և նրանք ձայն չհանեն,  սա մարդկանց կոտրելու ցուցադրական գործունեություն է: Ըստ ամբաստանյալի, դատարանն իր իշխանությունը պետք է օգտագործի, որպեսզի դա թույլ չտա: Եթե դատարանը չկանխի իր հասցեին վիրավորական արտահայտություններ անելը, ապա ինքն անձամբ պատասխան է տալու՝ անկախ նրանից իր նկատմամբ դրա համար սանկցիա կկիրառվի, թե ոչ: 

Մինչ Արթուր Վարդանյանի դատարանի դահլիճ վերադարձվելը նրա պաշտպան Լևոն Բաղդասարյանը միջնորդեց դատական սանկցիա կիրառել նաև մեղադրող Գևորգ Սարգսյանի հանդեպ՝ ամբաստանյալի հոր մասին արտահայտություն անելով՝ ինչ-որ Շռամ Վալերիկի գերեզմանի մոտ, մեղադրողը պատշաճ վարքագիծ չի դրսևորել, ինչի հետևանքով Արթուր Վարդանյանը բորբոքվել է, ապա մեղադրողն Արթուր Վարդանյանին ասել է՝ ականջներդ կկտրեմ և դա լսել է չորրորդ իշխանությունը: 

Մեղադրողն ի պատասխան հայտարարեց, որ ինքը չի իմացել, որ Շռամ Վալերիկը Արթուր Վարդանյանի հայրն է և որ ինքը չի ասել՝ ականջներդ կկտրեմ:  

Նախագահող դատավոր Արմեն Բեկթաշյանը նշեց, որ ինքը չի լսել այդ արտահայտությունը ու պաշտպանից հարցրեց՝ նիստի ժամանա՞կ է արտահայտությունն արվել: Վերջինս պատասխանեց, որ արտահայտությունն արվել է, երբ  դատական նիստն ընդմիջվել էր, Արթուր Վարդանյանի նկատմամբ դատական սանկցիա էր կիրառվում, և նա հեռացվում էր դահլիճից: 

Պաշտպան Հայկ Ալումյանը հաստատեց, որ արտահայտությունն արվել է, և ինքն անձամբ դա լսել է: Եթե մի բան ասում կամ անում ենք,  պետք է կարողանանք պատասխանատվություն վերցնել, ասաց պաշտպանը:  Հայկ Ալումյանը նկատեց, որ եթե մեղադրողը ծանոթ լիներ գործի նյութերին, ապա կիմանար, որ Շռամ  Վալերիկը Արթուր Վարդանյանի հայրն է: 

Ամբաստանյալ Խաչիկ Ավետիսյանն իր հերթին հայտարարեց, որ Վալերիկ Վարդանյանը 1992-94թթ. իր հրամանատարության ներքո է եղել, նա ասֆալտի ֆիդայի չի եղել, նա հայրենասեր ազատամարտիկ է եղել, զոհվել է:  Ապա դիմելով մեղադրողին՝ ամբաստանյալը հարցրեց նա գիտի՞, թե Մոնթեի գերեզմանին ինչ է գրված, եթե ասեր ոմն Ավոյի գերեզման, դա վիրավորական կլիներ: Խնդրում եմ գործը ուսումնասիրեք, նոր ներկայացրեք, ասաց ամբաստանյալը: 

Դատարանը մերժեց միջնորդությունը և դատախազի հանդեպ սանկցիա չկիրառեց: 

Վահան Շիրխանյանն իր հերթին դատարանին խնդրեց երկու ժամից ավելի նիստ չանցկացնել՝ ինքը երկու ժամից ավելի չի կարող նստած մնալ՝ սաստիկ ցավեր ունի նաև մինչև այդ երկու ժամը լրանալը: Նրա պաշտպան Հայկ Ալումյանը հայտարարեց, որ իր պաշտպանյալը ունի սաստիկ ցավեր և որ բնության մեջ չկա տեղեկանք, որը ասեր, որ մարդը  սաստիկ ցավեր ունի:  Իսկ անցյալ դատական նիստին անհնարին է եղել իր պաշտպանյալի մասնակցությունը, քանի որ նա սրտի նոպա է ունեցել: 

Երբ ամբաստանյալն ավելի ուշ հայտնեց, որ այլևս չի կարողանում նստած մնալ, դատարանը քիչ անց դատական նիստը հետաձգեց:

Աղբյուր` Փաստինֆո