Փաստ ինֆո

2016 թվականի հոկտեմբերի 18-ին «Վանաձոր բժշկական կենտրոնում» 32-ամյա ծննդկանի մահվան գործով որոշում է կայացվել ժամանակավոր դադարեցնել «Վանաձորի բժշկական կենտրոն» ՓԲ ընկերության մանկաբարձագինեկոլոգիական բաժանմունքի ավագ մանկաբարձ-գինեկոլոգ Դավիթ Շահվերդյանի պաշտոնավարությունը: 

Այդ մասին, «Փաստինֆո»-ի հարցմանն ի պատասխան, հայտնեց Քննչական կոմիտեի նախագահի խորհրդական Սոնա Տռուզյանը՝ հավելելով, որ միևնույն ժամանակ որոշման պատճենն ուղարկվել է «Վանաձորի բժշկական կենտրոն» ՓԲ ընկերության տնօրենին` պարզաբանելով նրան, որ ՀՀ քրեական դատավարության օրենսգրքի 152-րդ հոդվածի 2-րդ մասի համաձայն` որոշումն ստանալուց հետո պարտավոր է եռօրյա ժամկետում կատարել այն և դրա մասին տեղյակ պահել քրեական վարույթն իրականացնող մարմնին:

Որոշման պատճենն ուղարկվել է նաև գործով դատավարական հսկողություն իրականացնող դատախազին՝ նրա համաձայնությունը ստանալու համար:

Ավելի վաղ տեղեկացրել էինք, որ Գուգարք գյուղի բնակչուհի Հ.Նազլուխանյանի մահվան դեպքի առթիվ կատարված քննությամբ պարզվել է, որ վերջինս առաջնածին ախտորոշմամբ 2016 թվականի սեպտեմբերի 26-ին ընդունվել է «Վանաձոր բժշկական կենտրոնի» մանկաբարձագինեկոլոգիական բաժանմունք։

Գտնվելով բժիշկների հսկողության ներքո 21 օր անց` 2016 թվականի հոկտեմբերի 17-ին` ժամը 18:40-ին, կինը ծննդաբերել է արական սեռի երեխա, որից հետո նրա ինքնազգացողությունը վատացել է։ Իսկ հոկտեմբերի 18-ին՝ ժամը 01:40-ին, կինը նույն բաժանմունքում մահացել է:

Դեպքի առթիվ հարուցվել էր քրեական գործ՝ ՀՀ քրեական օրենսգրքի 130-րդ հոդվածի 2-րդ մասով և նշանակվել էր դատաբժշկական փորձաքննության:

Նշենք նաև, որ հոկտեմբերի 18-ին Գեղարքունիքի մարզում ողբերգական ավտովթար էր տեղի ունեցել, ինչի հետևանքով մահացել է Վանաձոր քաղաքի բնակիչ, բժիշկ, 37-ամյա Արսեն Բալայանը:

Այս ողբերգական վթարի հետևանքով մահացած բժիշկ Արսեն Բալայանն աշխատում էր «Վանաձոր» պոլիկլինիկայում և երիտասարդ կնոջ մահվան մեջ հարազատները մեղադրում էին հենց Արսեն Բալայանին, ով ընդունել էր ծնունդը։

Ավտոմեքենան ճանապարհի երթևեկելի հատվածից դուրս էր եկել և բախվել բետոն արգելապատնեշին, որից հետո էլ գլխիվայր պտտվել էր:

Ավտոմեքենայի ղեկին եղած բժիշկը ծայրահեղ ծանր վիճակում հիվանդանոց էր տեղափոխել, սակայն, այդպես էլ գիտակցության չգալով, նա մահացել էր:

Ավելի վաղ տեղեկացրել ենք, որ ծննդկանի մահվան պատճառ էր նշվել հեմոռագիկ շոկը։

«Հ.Նազլուխանյանի մահվան անմիջական պատճառն է հեմոռագիկ շոկը, որը պայմանավորված է հետծննդաբերության վիճակից հետո, վաղ հետծննդյան շրջանի, հեշտոցի ձախ կողմնային պատի անցումով արգանդի պարանոցին ծննդաբերական պատռվածքի, հեշտոցի աջ կողմնային պատի արյունահավաքի, մասնակի կարված հեշտոցի ձախ կողմնային պատի պատռվածքի, հետորովայնամզային տարածության և փոքր կոնքի փափուկ հյուսվածքների՝ արյունով ներծծման, արտաքին սուր արյունահոսության, ներքին օրգանների և անոթների սուր արյունապակասության հետ»,- նշված է թիվ 0922 փորձագիտական եզրակացության մեջ:

Աղբյուր` Փաստինֆո