Փաստ ինֆո

Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը մերժել է հատուկ քննչական ծառայության քննիչի միջնորդությունը՝ կաշառք ստանալուն օժանդակելու մեջ մեղադրվող փաստաբան Վաղինակ Աթոյանին կալանավորելու միջնորդությունը։ «Փաստինֆո»-ի տեղեկություններով՝ նրա նկատմամբ որպես խափանման միջոց է ընտրվել ստորագրություն չհեռանալու մասին։

Ավելի վաղ ՀՔԾ-ն հաղորդագրություն էր տարածել, որ ըստ քրեական գործի տվյալների դատական իշխանության մարմնի ներկայացուցիչները քրեական գործով ամբաստանյալ, ՀՀ ԱՆ «Նուբարաշեն» ՔԿՀ կալանավորի նկատմամբ ընտրված պատիժն առավել մեղմ պատժատեսակով փոխարինելու դիմաց պահանջել են խոշոր չափերով կաշառք: Ընդ որում, կաշառք ստանալու գործընթացն անխոչընդոտ և բարեհաջող ավարտին հասցնելու նպատակով ամբաստանյալի շահերի պաշտպանը` ՀՀ փաստաբանների պալատի փաստաբան Վաղինակ Աթոյանը, համաձայնություն է ձեռք բերել հիշյալ կալանավորի և վերջինիս քրոջ հետ` կաշառքն իր միջոցով դատական իշխանության ներկայացուցիչներին փոխանցելու համար:

03.10.2017թ.-ին կայացված դատավճռով վերը նշված ամբաստանյալի նկատմամբ նշանակված 3 տարի ժամկետով ազատազրկման ձևով պատիժը բեկանվել և նշանակվել է ավելի մեղմ պատիժ՝ 2 տարի ժամկետով ազատազրկում:

Դատավճռի հաջորդ օրը Վ.Աթոյանն անձամբ ստացել և դատական իշխանության ներկայացուցիչներին է փոխանցել կաշառքի առարկան` 470.000 ՀՀ դրամը:

Թե կոնկրետ ում է փոխանցվել կաշառքը՝ ՀՔԾ-ն չի մանրամասնել եւ ոչ էլ պաշտոնապես տեղեկացվել է արդյոք կաշառք ստացողին մեղադրանք առաջադրվել է թե ոչ։ Պաշտոնական հաղորդագրության համաձայն՝ քրեական գործի շրջանակներում մեղադրանք է առաջադրվել ՀՀ փաստաբանների պալատի փաստաբան Վ. Աթոյանին՝ ՀՀ քրեական օրենսգրքի 38-311-րդ հոդվածի 4-րդ մասի 3-րդ կետով նախատեսված հանցավոր արարք կատարելու` դատական իշխանության ներկայացուցիչների կողմից նախնական համաձայնությամբ խոշոր չափերով կաշառք ստանալուն օժանդակելու համար:

Աղբյուր` Փաստինֆո