Փաստ ինֆո

Անչափահասի կողմից երեխաներին թրաֆիքինգի ենթարկելու մեջ մեղադրվող ամբաստանյալի ինքնազգացողությունն այսօր դատարանում կտրուկ վատացավ: Ըստ նրա պաշտպան Սուզաննա Խչեյանի, ամբաստանյալը սրտի նոպա ունեցավ, դատարան ժամանած շտապօգնությունը գտավ, որ անչափահասը չի կարող մասնակցել դատական նիստին և նրան տեղափոխեց հիվանդանոց:

Ըստ մեղադրանքի, անչափահասը երեք երեխաների շահագործելու նպատակով 2016թ.ամռանը մայիս կամ հունիս ամսին քննությամբ չպարզված օրը, խաբեությամբ, ճոճանակ նստելու ու զվարճանալու պատրվակով, նրանց տեղափոխել է Զվարթնոց օդանավակայանի հարակից տարածք, որտեղ վերջիններիս նկատմամբ բռնություն գործադրելով, ծեծելով ու քաշքշելով հարկադրել է օդանավակայանի ավտոկայանատեղիում զբաղվել մուրացկանությամբ, իսկ ինքը որոշակի տարածությունից հսկողության տակ է պահել նրանց:

Ծանր սոցիալական պայմաններից դրդված՝ 3 անչափահաս երեխաների մայրը որդուն ներգրավել է մուրացկանության մեջ

Այդ ընթացքում երեխաներն օդանավակայանի տարածքում գտնվող ավտոմեքենաների վարորդներից մուրացկանությամբ ստացել են թղթադրամներ ու մետաղադրամներ: Շուրջ երկու ժամ գումար մուրալուց հետո մոտեցել են անչափահասին՝ ամբաստանյալին, ով երեխաներից մեկից ստացել է հավաքված ողջ գումարը՝ շուրջ 7000 ՀՀ դրամ: Հավաստիանալու համար, որ նրանց մոտ այլ գումար չի մնացել, ստուգել է նրանց գրպանները, որից հետո հավաքված գումարից 700 ՀՀ դրամ տվել է երեխաներից մեկին, մյուս երկու երեխաներին, ովքեր եղբայրներ են, տվել է 120 ՀՀ դրամ և 74 ՀՀ դրամին համարժեք 10 ՌԴ ռուբլի, իսկ գումարի մնացած մասը տնօրինել է անձամբ:

Անչափահասին մեղադրանք է առաջադրվել ՀՀ քրեական օրենսգրքի 132.2 հոդվածի 2-րդ մասի 1-ին ու 4-րդ կետերով՝ երեխայի թրաֆիքինգ կամ շահագործումը, որը կատարվել է երկու կամ ավելի անձանց նկատմամբ, բռնություն գործադրելով կամ դա գործադրելու սպառնալիքով:

Աղբյուր` Փաստինֆո