Փաստ ինֆո

ԼՂՀ ՊԲ նախկին հրամանատար Սամվել Բաբայանի և մյուսների գործով այսօր Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում պաշտպանական կողմը հանդես եկավ պաշտպանական ճառերով:

Սամվել Բաբայանի պաշտպան Ավետիս Քալաշյանը գտավ, որ իր պաշտպանյալին առաջադրված ՀՀ քրեական օրենսգրքի 38-235-րդ հոդվածի 2-րդ մասով և 190-րդ հոդվածի 1-ին մասով մեղադրանքներ անհիմն են և միջնորդեց արդարացնել՝ հանցակազմի բացակայության պատճառաբանությամբ:

Այսպիսով, ՀՀ քրեական օրենսգրքի 38-235-րդ հոդվածի 2-րդ մասին անդրադառնալով՝ պաշտպանը նշեց, որ մեղադրանքի կողմն այս մեղադրանքի վերաբերյալ ճառում հայտնել է, թե Բաբայանի մեղքը հիմնավորված է՝ բացի նրա ցուցմունքներից, նաև այլ անձանց ցուցմունքներով և ապացույցներով:

Բաբայանը նախաքննական ցուցմունքներում հերքել է իր մասնակցությունը կատարված հանցագործությանը, մասնավորապես՝ Սանասար Գաբրիելյանին խնդրել է լուսանկարել և իրեն ցույց տալ «Իգլա»-ի նկարը, որպեսզի հասկանա, թե ինչի մասին է խոսքը, Բաբայանն էլ նրան պարզաբանել է, որ այն ամբողջական չէ՝ հայտնելով, որ այդ վիճակում իր նպատակային նշանակությանը ծառայեցնելը հնարավոր չէ:

Ըստ պաշտպանի՝ Հրաչյա Մայիլյանի և Սանասար Գաբրիելյանի միջև տեղի ունեցած հեռախոսային խոսակցության ժամանակ շոշոփված 50 000 գումարը ուղղակի չի կարող վերաբերել զենք ձեռքբերելու համար խոստացված գումարին: Բացի այդ, Սանասար Գաբրիելյանը փետրվարի 22-ի դրությամբ նույնիսկ չի էլ իմացել, որ զենք ձեռքբերելու առաջարկ է արվել Արմեն Պողոսյանին:

Պաշտպանը գտնում է, որ Բաբայանին առաջադրված մեղադրանքն անհիմն է, և պետք է կայացվի արդարացման դատավճիռ՝ հանցակազմի բացակայութան պատճառաբանությամբ:

Ըստ պաշտպանի՝ Բաբայանին առաջադրված մեղադրանքը կառուցվել է ենթադրությունների հիման վրա, իսկ այն, որ իբրև Բաբայանը դրդել է Գաբրիելյանին զենք ձեռք բերել և նյութապես շահագրգռելու եղանակով զենքը ձեռք բերելու համար վճարել գումար, չի հաստատվում որևէ փաստական հանգամանքով:

«Եթե զենքի ձեռք բերելու պատվիրատուն Սամվել Բաբայանն է եղել, և եթե նա պետք է վճարեր դրա դիմաց, ապա Սանասար Գաբրիելյանն ինչո՞ւ է հրաժարվել այն ձեռք բերելուց, չէ՞ որ, այսպես կոչված, պատվիրատուն նման հրահանգ չի տվել»,- ասաց պաշտպանը՝ միևնույն ժամանակ հավելելով, որ Սամվել Բաբայանի և Գաբրիելյանի հեռախոսազրույցներում որևէ տվյալ չկա, որ Բաբայանի հրահանգով է Գաբրիելյանը հրաժարվել զենքը ձեռք բերելուց:

Ըստ պաշտպանի ՝ այս փաստարկներից հետևում է, որ Սամվել Բաբայանը որևէ առնչություն չունի զենքի հետ, դրա նախաձեռնությունը Սանասար Գաբրիելյանինն է եղել:

Պաշտպանը, անդրադառնալով փողերի լվացման դրվագին, այստեղ ևս միջնորդեց արդարացնել իր պաշտպանյալին՝ գտնելով, որ ի սկզբանե կեղծ փողերի մասին էր խոսվում, ինչից որոշ ժամանակ անց միայն փողերի լվացման արտահայտությամբ փոխարինվեց:

Քրեական գործով հաստատված չէ, որ այդ գումարները ստացվել են հանցավոր ճանապարհով, Սամվել Բաբայանը ցանկացել է իրեն պարտք եղած գումարը ետ ստանալ, և եթե նա հաստատապես իմանար, թե ինչ պատճառով են դրանք ներկված, ապա ինչու՞ պետք է համաձայներ այդ վիճակում ետ ստանալ, իսկ դրանք ներկանյութից մաքրելու նպատակն էլ եղել է այն, որ բանկն իրենց քիչ գումար պահի դրա դիմաց:

Քալաշյանը, ով ներկայացնում է նաև ամբաստանյալ եղբայրներ Անդրանիկ և Կարեն Քոչարյանների պաշտպանությունը, նշեց, որ եղբայրները չեն իմացել այդ գումարների ներկոտված լինելու պատճառները, նրանք օգնել են Բաբայանին հնարավորության դեպքում մաքրել այդ ներկերը թղթադրամների վրայից:

Եվ եթե մինչ հիմա չի հաջողվել պարզել, թե այդ գումարները հանցավոր ճանապարհո՞վ են ձեռք բերվել, թե՝ ոչ, ինչպե՞ս է մեղադրանքի կողմը հաստատապես պնդում, որ Սամվել Բաբայանը և գործով մյուս ամբաստանյալներն իմացել այդ մասին:

Հաջորդիվ պաշտպանական ճառով հանդես եկավ գործով ամբաստանյալ Ժոռա Զաքարյանի պաշտպան Արարատ Գրիգորյանը: Պաշտպանը նշեց, որ որևէ ձևով չի հիմնավորվել, որ հանցավոր ճանապարհով են ձեռքբերվել այդ թղթադրամները, իսկ մեղադրանքն էլ դրվել է 38-190-րդ հոդվածի 1-ին մասով. որ «դատարանում. այսպես ասած. յոլա տանեն»:

Բացի այդ, իր պաշտպանյալին հայտնի չէ եղել, թե դրանք ինչ գումարներ են, իրեն փոխանցվել են, որպեսզի ներկանյութից մաքրի՝ իմանալով, որ քիմիայի ոլորտում որոշակի հետաքրքրություններ ունի:

Պաշտպանը, գտնելով, որ մեղադրանքն անհիմն է, միջնորդեց իր պաշտպանյալին ևս արդարացնել՝ հանցակազմի բացակայության պատճառաբանությամբ:

Ամբաստանյալ Դավիթ Հարությունյանի պաշտպան Վաղարշակ Գևորգյանն էլ նշեց, որ իր պաշտպանյալը, փոխելով նախաքննության ընթացքում արտահայտած իր դիրքորոշումը, դատարանում համաձայնել է առաջադրված մեղադրանքի հետ:

Ուստիև՝ պաշտպանն անդրադարձավ միայն Հարությունյանի պատիժն ու պատասխանատվությունը մեղմացնող հանգամանքներին՝ նշելով, որ նա նախկինում դատապարտված չի եղել, դրական է բնութագրվում, ունի մշտական բնակության վայր, խնամքին են հաշմանդամ մայրը, չաշխատող կինը և երկու որդիները, որոնցից մեկը մինչ 14 տարեկան է:

Պաշտպանը միջնորդեց Հարությունյանի նկատմամբ նշանակվելիք ազատազրկման ձևով պատիժը պայմանականորեն չկիրառել և նշանակել փորձաշրջան՝ մեկ տարի ժամկետով:

Հաջորդ դատական նիստում ճառերով հանդես կգան, ամբաստանյալ Արմեն Պողոսյանի և Սանասար Գաբրիելյանի պաշտպանները:

Գործով ամբաստանյալ Արմեն Պողոսյանի պաշտպանը հայտարարեց, որ իր պաշտպանյալը խնդրել է նիստը հետաձգել և պաշտպանական ճառով հանդես գալ միայն Սանասար Գաբրիելյանի պաշտպանի ճառից հետո: Նշենք, որ Գաբրիելյանը, ով դատաքննության սկզբում հրաժարվել էր իր պաշտպաններից, այսօր հայտարարեց, որ ցանկանում է պաշտպան ունենալ, և իր շահերը կներկայացնի փաստաբան Արթուր Ղարիբյանը:

Հիշեցնենք, որ նախորդ դատական նիստում մեղադրող Արամյանը միջնորդել էր Սամվել Բաբայանին մեղավոր ճանաչել ՀՀ քրեական օրենսգրքի 38-235-րդ հոդված 2-րդ մասով, 190-րդ հոդվածի 1-ին մասով և նրան դատապարտել 7 տարվա ազատազրկման։

Գործարար Սանասար Գաբրիելյանին և ամբաստանյալ Արմեն Պողոսյանին մեղադրողը միջնորդեց մեղավոր ճանաչել ՀՀ քրեական օրենսգրքի 235-րդ հոդվածի 2-րդ մասով. Գործարարի համար դատախազը պահանջեց 4 տարվա, իսկ Արմեն Պողոսյանի համար՝ 3 տարվա ազատազրկում։

Քոչարյան եղբայրներին, Ժորա Զաքարյանին, Դավիթ Հարությունյանին դատախազը միջնորդեց մեղավոր ճանաչել ՀՀ քրեական օրենսգրքի 38-190-րդ հոդվածի առաջին մասով, սակայն պահանջեց տարբեր պատժաչափեր։ Եղբայրներից մեկին՝ Անդրանիկ Քոչարյանին, և ամբաստանյալ Ժ.Զաքարյանին դատախազը միջնորդեց դատապարտել 2 տարվա պայմանական ազատազրկման ՝ 3 տարվա փորձաշրջանով, մյուս եղբորը՝ Կարեն Քոչարյանին՝ 3 տարվա, Դ.Հարությունյանին՝ 2 տարվա ազատազրկման։

Աղբյուր` Փաստինֆո