Փաստ ինֆո

Երևանի քաղաքապետարանին պատկանող «Կենտրոն Մաքրություն» փակ բաժնետիրական ընկերությունում կեղծ հավաքարարների անվամբ առանձնապես խոշոր չափերի հափշտակությունների աղմկահարույց գործով վերաքննիչ բողոքների քննությունը կսկսվի նոյեմբերի 28-ին:

Ինչպես տեղեկանում ենք «Դատալեքս» տեղեկատվական համակարգից, մասնավորապես փաստաբան Գեղամ Հակոբյանը վերաքննիչ բողոքներում միջնորդում է բեկանել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճիռը, որով իր պաշտպանյալ, 02.04.2007թ. ապրիլից մինչև 2013թ. սեպտեմբերի ամիսը «Կենտրոն մաքրություն» ՓԲԸ-ի տնօրենի, ինչպես նաև ինժեների պաշտոնները զբաղեցրած Արթուր Հովհաննիսյանը մեղավոր է ճանաչվել ՀՀ Քրեական օրենսգրքի 178-րդ հոդվածի 3-րդ մասի 1-ին և 2-րդ կետերով՝ կազմակերպված խմբի կողմից առանձնապես խոշոր չափերով խարդախություն, 178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախություն, 308-րդ հոդվածի 2-րդ մասով՝ Պաշտոնեական լիազորությունները չարաշահելն, որն անզգուշությամբ առաջացրել է ծանր հետևանքներ, 314-րդ հոդվածով՝ Պաշտոնեական կեղծիքը՝ երկու դրվագով և դատապարտվել 7 տարի 6 ամիս ժամկետով ազատազրկման, իսկ նրա եղբայրը Սամվել Հովհաննիսյանն, ով նույնպես զբաղեցրել է հիշյալ՝ տնօրենի և ինժեների պաշտոնները, մեղավոր է ճանաչվել ՀՀ Քրեական օրենսգրքի 178-րդ հոդվածի 3-րդ մասի 1-ին և 2-րդ կետերով, 178-րդ հոդվածի 3-րդ մասի 1-ին կետով, 314-րդ հոդվածով՝ երկու դրվագով և դատապարտվել պայմանական ազատազրկման 5 տարի ժամկետով: Պաշտպանը միջնորդում է Սամվել Հովհաննիսյանի մասով լրիվ ծավալով կայացնել արդարացնող դատական ակտ` մերժելով քաղաքացիական հայցն ամբողջությամբ, իսկ Արթուր Հովհաննիսյանի մասով կայացնել մասնակի արդարացնող դատական ակտ, արարքին տալով ճիշտ քրեաիրավական գնահատական և նշանակելով մեղմ պատիժ, որն էլ պայմանականորեն չկիրառել, ինչպես նաև բեկանել դատավճիռը քաղաքացիական հայցի մասով:

Իսկ մեղադրողը վերաքննիչ բողոքում միջնորդում է մասնակի բեկանել դատավճիռը` Արթուր Հովհաննիսյանի նկատմամբ նշանակված պատժի, ինչպես նաև Գյուլիզար Շամոյանի, Գարեգին Գասպարյանի, Հունան Տեր-Հովհաննիսյանի և Տիգրան Հովհաննիսյանի նկատմամբ նշանակված պատիժները պայմանականորեն չկիրառելու մասով: Արթուր Հովհաննիսյանի նկատմամբ մեղադրողը միջնորդում է նշանակել ազատազրկման ձևով պատիժ` 9 տարի ժամկետով, իսկ Գյուլիզար Շամոյանի, Գարեգին Գասպարյանի, Հունան Տեր-Հովհաննիսյանի և Տիգրան Հովհաննիսյանի նկատմամբ նշանակված պատիժները պայմանականորեն չկիրառելը ճանաչել անթույլատրելի և նրանց նկատմամբ նշանակել ազատազրկման ձևով պատիժ:

Աղբյուր` Փաստինֆո