Փաստ ինֆո

Պարտադիր զինվորական ծառայությունից տարկետման իրավունքի սահմանափակման դեմ բողոքող ուսանողներն այսօր շարունակեցին իրենց բողոքի ակցիան ԱԺ շենքի մոտ։

Ակցիայի մասնակիցները դուրս էին եկել Բաղրամյան պողոտայի երթևեկելի հատված՝ խոչընդոտելով երթեւեկությանը եւ ոստիկանությունը պահանջեց ազատել ճանապարհը՝ նախազգուշացնելով, որ ոստիկանությունը կդիմի համարժեք գործողությունների։

«Ձեր արարքը տանում է բախման ոստիկանների հետ, դուք խախտել եք հավաքների ազատության մասին օրենքը 7 օր շարունակ, իսկ հիմա դուք կարևոր նշանակություն ունեցող փողոց եք փակել՝ սահմանափակելով քաղաքացիների տեղաշարժը», - հայտարարեց Երևանի փոխոստիկանապետ Վալերի Օսիպյանը՝ նշելով, որ 5 րոպե ժամանակ են տալիս՝ հակառակ դեպքում ոստիկանությունը միջոցներ կկիրառի։

Ցուցարարներն իրավիճակը չսրելու համար, որոշեցին դուրս գալ փողոցի երթևեկելի մասից։
Ավելին, «Հանուն գիտության զարգացման» նախաձեռնության անդամ Վահան Կոստանյանը հայտարարեց, որ իրավիճակ է փոխվել և կոչ արեց հացադուլ հայտարարած իրենց չորս անդամներին դադարեցնել այն և միանալ իրենց։

«Քանի որ այս պահին գործ ունենք բոլորովին այլ իրավիճակի հետ, քան երեկ էր, կամ այսօր առավոտյան, ես կոչ եմ անում մեր մնացած չորս ընկերներին դադարեցնել հացադուլն ու միանան մեզ, այս պահին մեզ առողջ բանականություն է պետք, ու իրեցն ուղեղներն էլ են պետք, որպեսզի հասկանանք իրավիճակը ոնց ենք հետագայում կառավարելու», - ասաց Կոստանյանը։

«Ազատություն» ռ/կ-ի փոխանցմամբ՝ հացադուլավորներն անմիջապես արձագանքեցին Կոստանյանի այս կոչին, հայտարարեցին հացադուլը դադարեցնելու և ցուցարարներին միանալու մասին։
Ավելի վաղ տեղեկացրել ենք, որ Ազգային ժողովն այսօր առավոտյան երկրորդ ընթերցմամբ և ամբողջությամբ ընդունեց «Զինվորական ծառայության և զինծառայողի կարգավիճակի մասին» օրենքի նախագիծը: Նախագծին կողմ քվեարկեց 86, դեմ՝ 6 պատգմավոր:

 Լուսանկարը՝ Ֆոտոլուրի

Աղբյուր` Փաստինֆո