Փաստ ինֆո

Երրորդմասցի Լյովիկի ու նրա ընկերների սպանության աղմկահարույց գործով այսօրվա դատական նիստում մեկ անգամ ևս հայտարարվեց, որ ընթերակա Յուրի Գալստյանը դեռևս օգոստոսից բացակայում է Հայաստանից: Այդ մասին են վկայում ՍԵԿՏ համակարգով, ինչպես նաև բնակության վայրից ստացված տեղեկությունները:

Դատարանը հայտարարեց, որ սպառվել են ընթերակայի ներկայությունը դատարանում ապահովելու բոլոր միջոցները:

Ընդ որում, պարզ չէ հանրապետությունից բացակայող անձն իրոք քննչական գործողությանը որպես ընթերակա մասնակցած անձն է՝ թեև անուն-ազգանունները երկու դեպքում համընկնում են, սակայն արձանագրությունում նշված ծննդյան թվով անձ Հայաստանում գոյություն չունի, սխալ է նշված նաև ընթերակայի հասցեն՝ նշված է հասցե, որը տասը տարի առաջ փոխվել է:

Մեղադրող Արամ Արամյանը հայտարարեց, որ այս հարցը ենթակա է քննության դատական վիճաբանության փուլում:

Բոլոր երեք ամբաստանյալների պաշտպան Լուսինե Սահակյանը, սակայն, պնդեց, որ եթե քննչական գործողությանը մասնակցած անձն իրոք գոյություն ունի, գա ու հարցաքննվի դատարանում:

Հակառակ դեպքում, պաշտպանական կողմը մինչև դատաքննության ավարտը մտադիր է միջնորդել մեղադրանքի հիմքում դրված այդ ապացույցի օգտագործումն անթույլատրելի ճանաչելու մասին:

Պաշտպանական կողմը հաջորդ դատական նիստին կներկայացնի հիշյալ միջնորդությունը, հնարավոր է, որ լինեն նաև նոր ապացույցներ ձեռք բերելու միջնորդություններ:

Հիշեցնենք, որ գործով ամբաստանյալները երեքն են՝ «Գաստիկ» մականվամբ Վահան Հակոբյանը, «Տլե» մականվամբ Սարգիս Հախանումյանն ու «Ծգլ» մականվամբ Սարգիս Գրիգորյանը:
Ըստ մեղադրական եզրակացության, Վահան Հակոբյանը մի խումբ անձանց կողմից նախնական համաձայնությամբ ապօրինի ձեռք է բերել և պահել մարտական ակոսափող հրազեն հանդիսացող` 1963թ. գործարանային արտադրության 7,62 մմ տրամաչափի «ԱԿՄՍ» տեսակի ինքնաձիգ, 1976թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ և 1960թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ , որոնք ապահովված են եղել պահունակներով, ինչպես նաև ռազմամթերք հանդիսացող փամփուշտներով:

Ըստ մեղադրանքի, 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նախաքննական մարմինը որպես սպանության դրդապատճառ նշել է այն, որ Վահան Հակոբյանը «լարված, անբարյացակամ, գժտված վիճակում» է եղել Լևոն Ղազարյանի ու նրա շրջապատի հետ և, ըստ մեղադրական եզրակացության, սպանությունը կատարվել է վրեժխնդրությունից դրդված:

Աղբյուր` Փաստինֆո