Փաստ ինֆո

«Զինվորական ծառայության և զինծառայողի կարգավիճակի մասին» օրենքի նախագիծը «Ազգ-բանակ» գաղափարախոսության, «Պատիվ ունեմ» և «Ես եմ» ծրագրերի տրամաբանական շարունակությունն է: Ազգային ժողովում երկրորդ ընթերցմամբ օրենքի նախագծի քննարկմանն այս մասին ասաց ՀՀԿ խմբակցության ղեկավար Վահրամ Բաղդասարյանը:

«Այս օրենսդրական նախաձեռնությունը միտված է ավելի ամուր և կանոնակարգված բանակ ունենալուն, և ես համոզված եմ, որ մենք դրա արդյունքները տեսնելու ենք շատ կարճ ժամանակահատվածում»,- «Արմենպրես»-ի փոխանցմամբ՝ ընդգծեց Բաղդասարյանը:

Պատգամավորը շեշտեց, որ կարևոր է առաջին հերթին հասկանալ, թե ում համար ձեռնտու չէ, որպեսզի ՀՀ-ն ունենա ավելի կազմակերպված և ամուր բանակ:

«Բնականաբար, ում ձեռք չի տալիս, նրանք կարող են լինել հրահրողներ: Չեմ ցանկանում ավելի շատ տողերը բացել»,- ասաց Բաղդասարյանը:

Անդրադառնալով տարկետման հետ կապված խնդիրներին՝ Բաղդասարյանն ընդգծեց, որ անցած տարիներին եղել է տարբեր գիտական խորհուրդների անդամ և շատ լավ տեղյակ է իրավիճակին:

«Ես խնդրում եմ նայեք վերջին 10-15 տարվա վիճակագրությունը: Ատենախոսություն պաշտպանողների 90-95 տոկոսը տղաներ էին: Խնդրում եմ նայեք վիճակագրությունը՝ նրանցից քանիսն են դարձել գիտնականներ, ինչով են օգուտ տվել գիտությանը: Իրականում դա դարձել էր մի հարթակ, որտեղ հնարավորություն ունեցողները իրենց երեխաներին խցկում էին այդտեղ, որպեսզի նրանց ազատեն զինվորական ծառայությունից»,- ընդգծեց պատգամավորը:

Նա վստահություն հայտնեց, որ ներկայացված օրենսդրական նախաձեռնությունը որևէ կերպ չի կարող խանգարել այն մարդկանց, ովքեր իսկապես գիտնական դառնալու ցանկություն ունեն: Պատգամավորի խոսքով՝ որևէ վնաս օրենսդրական նախաձեռնությունը կրթությանը և գիտությանը չի տալիս:

Լուսանկարը՝ ֆոտոլուրի

Աղբյուր` Փաստինֆո