Փաստ ինֆո

Ամերիկյան կոնգրեսը կրճատել է երկրի նախկին նախագահների կենսաթոշակները: Ըստ Ինտերֆաքսի, այդ մասին երեքշաբթի հաղորդել են ամերիկյան ԶԼՄ-ները:

Ամերիկյան օրենսդիրները ընդհանուր համաձայնություն են արտահայտել առ այն, որ այսօրվա դրությամբ ԱՄՆ վարչակազմի նախկին ղեկավարները պետության կողմից ֆինանսական աջակցության կարիք չունեն, քանի որ կարող են միլիոնավոր դոլարներ վաստակել իրենց կողմից գրված գրքերի վաճառքից, ինչպես նաև իրենց հրապարակային ելույթներից:

«Այդպիսի հնարավորության առկայության հետ կապված 1958թ. որոշված՝ հարկատուների հաշվին նախկին նախագահներին (ֆինանսական) աջակցություն տրամադրելու անհրաժեշտություն այլևս չկա»,- հայտարարել է ընդունված օրինագծի հեղինակ, Ջորջիա նահանգից ԱՄՆ Կոնգրեսի Ներկայացուցիչների պալատի անդամ Ջոդի Հայսը:

Hill պարբերականը հիշեցրել է, որ հենց 1958թ. ԱՄՆ-ում օրենք էր ընդունվել, որը հաստատում էր ամերիկյան վարչակազմի նախկին ղեկավարների վեցանիշ գումարների չափով կենսաթոշակները, ինչպես նաև անձնակազմի ու աշխատանքային տարածքի և այլ ծախսերը:

Հայսի ներկայացուցիչները նշել են, որ 2017թ. ԱՄՆ նախկին նախագահների համար ընդհանուր մուծումները ամերիկյան հարկատուների համար արժեցել են 2,84 մլն դոլար:

Նոր օրենքին համապատասխան նախկին նախագահների կենսաթոշակների չափը կպակասեցվի մինչև 200 հազար դոլար տարեկան, անձնակազմ ու աշխատանքային տարածք պահելու մուծումների գումարը՝ մինչև 500 հազար դոլար: Ընդ որում, օրենքը նախատեսում է այդ գումարի աստիճանական պակասեցում մինչև 250 հազար դոլար 10 տարվա ընթացքում:

Աղբյուր` Փաստինֆո