Փաստ ինֆո

Դատական օրենսգրքի նախագծում առաջարկվող տուգանքը ոչ թե բարեփոխում է, այլ փաստաբաններին լռեցնելու անհաջող փորձ: Այս մասին «Փաստինֆո»-ի հետ լրագրողի հետ զրույցում հայտարարեց «Ընդդեմ իրավական կամայականության» ՀԿ փաստաբան Արա Ղարագյոզյանը՝ հույս հայտնելով, որ «բարեփոխումը չի անցնի»:

Մասնավորապես, ըստ փաստաբանի, Դատական օրենսգրքի փոփոխություններով նախատեսվում է դատավորի կողմից փաստաբանի նկատմամբ 100 հազար ՀՀ դրամի չափով տուգանքի նշանակում: «Իմ կարծիքով, սա հակասում է ՀՀ սահմանադրությանը և Մարդու իրավունքների եվրոպական կոնվենցիային: Սա փաստաբաններին լռեցնելու նախագիծ է, որն ուղղված է հիմնականում քաղաքական գործերով զբաղվող փաստաբանների դեմ, քանի որ նրանք բարձրաձայնում են դատավորների կողմից իրականացված ապօրինի գործողությունների մասին: Ընդհանրապես առհասարակ փաստաբանների անկախության դեմ է ուղղված՝ փաստաբանը պետք է իր գրպանից հանի և հարյուր հազար գումար վճարի պետական բյուջեին»,- ասաց Ա.Ղարագյոզյանը:

Դատական օրենսգրքի նախագծի նորմը չարիք է միայն փաստաբանների համար՝ կա տարբերակված մոտեցում. փաստաբան

Փաստաբանը նկատեց, որ «դատավորներն այդքան ապօրինի որոշումներ են կայացնում», Եվրոպական դատարանն էլ վճիռներ է կայացնում Հայաստանի դեմ, իսկ վճիռներով սահմանված փոխհատուցման գումարները վճարվում են ոչ թե դատավորների գրպանից, այլ պետբյուջեից: Երբ հարց է բարձրացվում դատավորի գրպանից գումարները վճարելու մասին, «ասում են՝ ոչ, դատավորը դրանով կաշկանդվում է», իսկ այս դեպքում, երբ որ փաստաբանները փորձում են իրենց պաշտպանյալների շահերը պաշտպանել, ասում են՝ «հարգելի փաստաբան, եթե դուք խելոք չմնաք, պետք է հարյուր հազար տուգանվեք», - գտնում է Արա Ղարագյոզյանն՝ հավելելով, որ դա անընդունելի է, հակասում է իրենց վստահորդների իրավունքներին, պաշտպանական իրավունքի արդյունավետ իրականացմանը և ամբողջ փաստաբանական ինստիտուտի շահերին: Ըստ նրա, փաստաբանն այս օրենսգրքի ընդունումից հետո այլևս չի կարողանալու արդյունավետ իրականացնել իր գործառույթները: «Երբ որ դու առարկում ես դատավորի անօրինական գործողությունների դեմ, դատավորը կարող է տուգանել»,- ասաց փաստաբանը:

Արա Ղարագյոզյանը ևս մեկ կարևոր կետի վրա ուշադրություն հրավիրեց, ըստ որի երբ որ անձը դատավորից ներողություն է խնդրում, կարող է դատավորի հայեցողությամբ չկիրառվել տուգանք: «Այսինքն՝ հարգելի փաստաբան, կանգնիր, նսեմացիր դատավորից ներողություն խնդրիր, որ հանկարծ քեզ չտուգանեն դատավորի անօրինական գործողությունների մասին բարձրաձայնելու համար»,- ասաց փաստաբանը:

Փաստաբանն ասաց՝ և ինչ ասել է՝ դատական իշխանությունը նսեմացնելու գործողություն, օրինակ՝ եթե դատավորին ինքնաբացարկ ես հայտնում, ասելով, որ նա քաղաքական որոշում է կայացնում, դա նսեմացո՞ւմ է համարվում, թե՞ ոչ:

Դատական տուգանքի սահմանումը չի հակասում իրավունքին, սակայն պետք է սահմանվեն երաշխիքներ.Արթուր Ղամբարյան

«Առաջարկվող փոփոխությունները պարզապես խոսքի ազատության դեմ են»,- ասաց Ա.Ղարագյոզյանն՝ ընդգծելով, որ օրենսդրական փոփոխությունների մասին հարցը բարձրացվեց այն բանից հետո, երբ որ սկսվեց, իր բնութագրմամբ, քաղաքական գործերի քննությունը: «Տեսնում են, որ ակտիվորեն պաշտպանություն ենք իրականացնում, փորձում են լռեցնել փաստաբաններին»,- ասաց փաստաբանը՝ հավելելով, որ հանուն այդ հարյուր հազարի չվճարման ինքը կամակատար չի դառնա:

Մտավախություն է առաջացնում նաև առաջարկվող փոփոխությունն, ըստ որի դատավորն է որոշում տուգանքի չափը: «Այն դատավորները, որոնք տանել չեն կարողանում այն փաստաբաններին, որոնք քաղաքական գործերով են զբաղվում, կարող են շատ հանգիստ հարյուր հազար տուգանել և առանց հիմնավորման, քանի որ դատավորին չպատճառաբանված ու չհիմնավորված կամայական որոշում կայացնելու նման լիազորություն է տրվում»:

Տուգանքի ենթակա «մեկ այլ անձ» ձևակերպմամբ, ըստ Արա Ղարագյոզյանի, օրենսդրական բաց են թողնում, որ դատարանը ինչ ձևով ուզի, մեկնաբանի:

Փաստաբանը նշեց նաև փաստաբանին տուգանելու և ապա պատասխանատվության ենթարկելու համար Փաստաբանների պալատ դիմելու մասին կետից ստացվում է, որ նույն արարքի համար մարդը երկու անգամ ենթարկվում է պատասխանատվության: «Դա անընդունելի է, դատավորները չեն կարող փաստաբաններին պատասխանատվության ենթարկել, պետք է առնվազն դիմեն Փաստաբանների պալատ, որի Խորհուրդն էլ որոշում կայացնի խախտում կա՞, թե՞ չկա»,- ասաց Արա Ղարագյոզյանը:

Աղբյուր` Փաստինֆո