Փաստ ինֆո

ՀՀ ֆինանսների նախարար Վարդան Արամյանը վստահեցնում է՝ կառավարության ներկայացրած 2018 թվականի պետական բյուջեի նախագծով կտրվի տնտեսական զարգացման մեկնարկը: Ըստ նախարարի՝ անհրաժեշտ է տնտեսական աճին մասնակցեն հասարակության լայն շրջանակները:

«Արմենպրես»-ի փոխանցմամբ՝ այս մասին հայտարարեց Վարդան Արամյանը ՀՀ Ազգային ժողովի ֆինանսավարկային և բյուջետային հարցերի մշտական հանձնաժողովի նիստի ժամանակ, որի օրակարգում «ՀՀ 2018 թվականի պետական բյուջեի մասին» նախագծին հավանություն տալու հարցն էր: Նրա խոսքով՝ հնարավորությունների ստեղծումն աղքատության կրճատման լավագույն մեթոդներից է հասարակության այն անդամների համար, ովքեր կարող են եկամուտ գեներացնել, քանի որ նպաստներ բաժանելով հանրության մեջ սերմանվում է ավելի շատ ծուլություն, քան արտադրողականության աճ:

«Պետք է հաշվի առնել, որ բոլոր հարցերին հնարավոր չէ լուծում տալ: Այս բյուջեի հիմքում ընկած է գաղափարը, որ մեր ներուժի հաշվին լուծենք մեր խնդիրները»,-ասաց Վարդան Արամյանը:
Նախարարի դիտարկմամբ՝ թիրախավորումը կատարվել է միջնաժամկետ ժամանակահատվածում և խիստ հակացուցված է արդյունքներն ակնկալել կարճաժամկետ հեռանկարում՝ մեկ-երկու տարի ժամանակահատվածում:

«Եթե կարճաժամկետ պլանավորեինք, լավագույն տարբերակը կլիներ այն, որ կբարձրացվեին սոցիալական ծախսերը, կունենայինք աճի ցուցանիշ՝ պահանջարկից ելնելով, բայց դա ազնիվ չէր լինի ու լուծում չէր տա իրավիճակին: Իսկ այս փաստաթղթով մենք կարող ենք հավակնել բարձր տնտեսական աճի»,-հավելեց Վարդան Արամյանը:

Հոկտեմբերի 30-ից ՀՀ ԱԺ մշտական հանձնաժողովների համատեղ նիստերում կայացել են 2018 թվականի պետական բյուջեի նախագծի քննարկումները: Հաջորդ տարվա պետական բյուջեի նախագծում դրված է տնտեսական աճի 4.5 տոկոս ցուցանիշը:

Աղբյուր` Փաստինֆո