Փաստ ինֆո

«Վարչարարության հիմունքների և վարչական վարույթի մասին» ՀՀ օրենքի 104-րդ հոդվածի 1-ին մասի հետ կապված կա իրավակարգավորումների հստակեցման ու իրավակարգավորման բացի հաղթահարման կարիք: Այս մասին ՀՀ սահմանադրական դատարանն որոշեց՝ քննության առնելով «Ժուռնալիստների «Ասպարեզ» ակումբ» ՀԿ խորհրդի նախագահ Լևոն Բարսեղյանի անհատական դիմումի գործը:

Ըստ ՍԴ որոշման, դիմողի կողմից վիճարկվող «Վարչարարության հիմունքների և վարչական վարույթի մասին» ՀՀ օրենքի 104-րդ հոդվածի 1-ին մասը համապատասխանում է ՀՀ Սահմանադրությանը այնպիսի սահմանադրաիրավական բովանդակությամբ, համաձայն որի՝ մինչև ՀՀ Ազգային ժողովի կողմից համապատասխան իրավակարգավորումների հստակեցումը և իրավակարգավորման բացի հաղթահարումը, ոչ իրավաչափ վարչարարությամբ պատճառված գույքային վնասի հատուցման հնարավորությունը պետք է ապահովվի Հայաստանի Հանրապետության վավերացրած մարդու իրավունքների վերաբերյալ միջազգային պայմանագրերում և Սահմանադրությամբ ամրագրված մարդու և քաղաքացու բոլոր հիմնական իրավունքների խախտման դեպքում:

«Վարչարարության հիմունքների և վարչական վարույթի մասին» ՀՀ օրենքի 104-րդ հոդվածի 1-ին մասում առկա «համարժեք չափ» եզրույթը համապատասխանում է ՀՀ սահմանադրությանն այնպիսի սահմանադրաիրավական բովանդակությամբ, համաձայն որի դիտարկվող եզրույթը մինչև ՀՀ ազգային ժողովի կողմից համապատասխան իրավակարգավորումների հստակեցումը և իրավակարգավորման բացի հաղթահարումը ներառում է ՀՀ քաղաքացիական օրենսգրքի 162.1 և 1087.2 հոդվածներով սահմանված ոչ նյութական վնասի դրամական հատուցման առավելագույն չափերը, ինչպես նաև համապատասխան չափանիշները, որոնք պետք է հաշվի առնի վարչական մարմինն անձին պատճառած ոչ նյութական վնասի դրամական հատուցման չափը որոշելիս:

Սահմանադրական դատարանի որոշման համաձայն, դիմողի նկատմամբ կայացված վերջնական դատական ակտն օրենքով սահմանված կարգով նոր հանգամանքի ի հայտ գալու հիմքով ենթակա է վերանայման՝ հաշվի առնելով, որ «Վարչարարության հիմունքների և վարչական վարույթի մասին» ՀՀ օրենքի 104-րդ հոդվածի 1-ին մասի դրույթները դիմողի նկատմամբ կիրառվել է այլ մեկնաբանությամբ:

Լևոն Բարսեղյանի հաղթանակը մտել է ուժի մեջ

Դիմող Լևոն Բարսեղյանի ներկայացուցիչ Արտակ Զեյնալյանը «Փաստինֆո»-ի լրագրողի հետ հարցազրույցում նշեց, որ ՍԴ-ում հրապարակված որոշման եզրափակիչ մասը ոգևորող է, սակայն իրենք չափազանց մեծ սպասում ունեն ամբողջական որոշումից: «Կարծում եմ, սա մեր իրավական աշխարհում իրադարձություն է և նաև կարևոր է որպես օրինակելի մեխանիզմ արտահանելու համար: Սա այնպիսի արտադրանք է, որը կարող է օրինակ ծառայել Եվրոպայի խորհրդի անդամ մյուս երկրների համար: Սա մենք կաշխատենք արտահանել, որպեսզի ապահովենք մեր մյուս եղբայրների իրավունքները»,- ասաց Արտակ Զեյնալյանը:

Դիմողի ներկայացուցիչը նշեց, որ որպես բարոյական վնասի հատուցում Լևոն Բարսեղյանին վճարվել է ընդամենը 200 հազար դրամ՝ միայն անձնական ազատության ու անձեռնմխելիության իրավունքի խախտման համար: Սակայն դատական կարգով հաստատվել է, որ խախտվել է Լևոն Բարսեղյանի մի շարք այլ իրավունքներ ևս՝ Կոնվենցիոն և սահմանադրական, և նրանց համար օրենքով չէր նախատեսվել բարոյական վնասի հատուցում:

«Այստեղ մենք վիճարկում էինք և՛ այն հանգամանքը, որ, ասենք, խաղաղ հավաքների ազատության իրավունքի խախտման համար նախատեսված չի եղել բարոյական վնասի հատուցում, արտահայտվելու ազատության իրավունքի, ազատ տեղաշարժման իրավունքի համար, սրանք դատական կարգով հաստատվել են, անվիճելի է, և այն, որ ընդամենը 200 հազար դրամ է նրան հատուցվել և այդ հատուցման չափը Սահմանադրության իմաստով պետք է լինի այնքան, որքան արդեն հաստատված է Եվրոպական դատարանի իրավակիրառական պրակտիկայում Հայաստանի մասնակցությամբ գործերով»,- հավելեց Արտակ Զեյնալյանը:

Աղբյուր` Փաստինֆո