Փաստ ինֆո

«Մաքուր Հայաստան» պետական ծրագիրը թևափոխում է նորփուլ. մեկնարկում է «Աղբի տեղը աղբամանում է»  խորագիրը կրող համապետական սոցիալական արշավը:

Հայաստանի յուրաքանչյուր քաղաքացի այսուհետ կարող է անմիջականորեն մասնակցել ծրագրին՝www.cleanarmenia.am կայքի կամiOS և Android օպերացիոն համակարգերի համար մշակված բջջային հավելվածի միջոցով:Համակարգը հնարավորություն է  տալիս հայտնաբերել աղբի կամ աղբաշատ վայրի հետ կապված խնդիրները՝ առաջարկելով դրանց լուծման ժամանակակից, արագ և արդյունավետ տարբերակ: Համակարգը նաև պետության և քաղաքացիների միջև սերտ համագործակցության օրինակ է՝ բաց և թափանցիկ մեխանիզմի միջոցով:

Նոյեմբերի 7-ի մամուլի ասուլիսում ներկայացվեց  www.cleanarmenia.am կայքը և հավելվածը, համապետական սոցիալական արշավի հիմնական ուղղությունները և թիրախները, նաև  «Մաքուր Հայաստան» ծրագրի ընթացքը և առաջիկա անելիքները: Սոցիալական արշավի նպատակն է բարձրացնել հանրային իրազեկվածության մակարդակն աղբի, աղբահանության և երկիրը մաքուր պահելու հիմնախնդիրների վերաբերյալ:

Ասուլիսի  բանախոսներն էին ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը, Վարչապետի խորհրդական Մհեր Տերտերյանը, ՀՀ ՏԿԶՆ տարածքային ներդրումային քաղաքականության և գործառնական ծրագրերի վարչության պետ Նարինե Ավետյանը, «Դիիմ Քոմյունիքեյշնզ» PR և մարքետինգային ընկերության ստեղծագործական տնօրեն, սոցիալական արշավի ծրագրի ղեկավար Րաֆֆի Նիզիբլիանը, «Աուդիո-Վիզուալ լրագրողների ասոցիացիա» ՀԿ-ի նախագահ, սոցիալական գովազդի փորձագետ Արզուման Հարությունյանը:

ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը իր խոսքում նշել է, որ  բավականին աշխատանքներ են իրականացվել սկսած 2017  թվականի ապրիլից, երբ վարչապետը հռչակեց «Մաքուր Հայաստան» ծրագրի անհրաժեշտությունը և սկիզբը, ինչից հետո մայիսից գործադիր իշխանությունը ֆորմալացրեց այդ գործընթացը, ստեղծեց միջգերատեսչական  հանձնաժողով, որը սկսեց իր աշխատանքները: «Կազմակերպվել է երեք  համապետական շաբաթօրյակ, ևս երկու քաղաքային շաբաթօրյակներ կազմակերպվել են  Երևանի քաղաքապետարանի նախաձեռնությամբ:Դրանք ունեին  նաև մոբիլիզացիոն, որոշ առումով նաև՝ քարոզչական, վերաբերմունք  և  մշակույթ ձևավորելու  խնդիր: Մենք կարծում ենք, որ այդ խնդիրն այդ շաբաթօրյակներով  ինչ-որ չափով հաջողվել է լուծել: Խնդիրը պետության  ուշադրության կենտրոնում է, մեր հանձնաժողովներն աշխատում  են,  նախարար Լոքյանն անմիջականորեն մասնակցում է այդ  աշխատանքներին, ղեկավարում է, լինում է տեղերում, բայց մենք կարծում ենք, որ արդեն իսկ ժամանակն է ավելի հանրային, հրապարակային  մասնակցություն քաղաքացիների կողմից: ՀՀ  ոստիկությունն ակտիվ աշխատում է. չսահմանված վայրերում աղբ թափելու 1959 դեպք ունենք: Միայն հավաքելով չէ, մենք պետք է որոշակի  առաջընթաց ապահովենք չաղտոտելու ճակատում և մենք այդ մշակույթը պետք է ներդնենք»,-ասել է Վաչե Տերտերյանը:

Վարչապետի խորհրդական Մհեր Տերտերյանն էլ անդրադառնալով սոցիալական արշավի կարևորությանը, նշել է, որ ահռելի աշխատանք է արվել, որի ընթացքում հասկացել են, որ աղբ մաքրելն  այդքան  դժվար գործ չէ, որքան մաքուր պահելը: «Դրա համար մեր գլխավոր նպատակն է  քարոզչական աշխատանք  տանել շրջակա միջավայրը մաքուր պահելու համար:  Քաղաքացիներն ունեն սպասումներ կառավարությունից, կառավարությունն էլ ունի սպասումներ քաղաքացուց. այսօր մենք ուզում ենք փոխանցել երկու  հիմնական գաղափար՝  առաջինը՝ մենք սկսում ենք կարևոր, մեծ, խոշոր սոցիալական գովազդ, որի  նպատակն է մատչելի կերպով  ձևավորել ճիշտ մոտեցում  մեր հասարակության կողմից մեր երկրի հանդեպ: Երկրորդ՝ մենք ստեղծել ենք  շատ հետաքրքիր համակարգ,  որի շնորհիվ  յուրաքանչյուրը  կարող է իր մասնակցությունն ունենալ այդ գործին, մենք ուզում ենք հասարակությանը դիտել որպես գործընկեր»,-ասել  վարչապետի խորհրդականը:

«Դիիմ Քոմյունիքեյշնզ» PR և մարքետինգային ընկերության ստեղծագործական տնօրեն, սոցիալական արշավի ծրագրի ղեկավար Րաֆֆի Նիզիբլիանը և «Աուդիո-Վիզուալ լրագրողների ասոցիացիա» ՀԿ-ի նախագահ, սոցիալական գովազդի փորձագետ Արզուման Հարությունյանը լրագրողներին ներկայացրել են համապետական սոցիալական արշավի հիմնական ուղղությունները և թիրախները: Ներկայացվել են պատրաստված առաջին երեք սոցիալական հոլովակները, որոնք հասանելի են հետևյալ  հղումներով՝  

Video 1: https://www.youtube.com/watch?v=Vm-7Pvs2XNg

Video 2: https://www.youtube.com/watch?v=SqV4umnnag0

Video 3: https://www.youtube.com/watch?v=XQvZfK2d5rQ

Facebook: https://www.facebook.com/cleanarmenia/?ref=bookmarks

Հիշեցնենք, որ  «Մաքուր Հայաստան» պետական ծրագիրը մեկնարկել է 2017թ-ի  ապրիլից՝ ՀՀ վարչապետ ԿարենԿարապետյանի հանձնարարականով: Այնուհետև ՀՀ տարածքային կառավարման և զարգացման նախարարությունում՝ ՀՀ ՏԿԶ նախարարի առաջին տեղակալ Վաչե Տերտերյանի գլխավորությամբ ձևավորվել է «Մաքուր Հայաստան» միջգերատեսչական հանձնաժողովը: ՀՀ ՏԿԶ նախարար Դավիթ Լոքյանի անմիջական վերահսկողությամբ հանձնաժողովը կազմակերպել է երեք համապետական շաբաթօրյակ: 2017 թ-ի հոկտեմբերի 21-ի դրությամբ 2033 աղբանոցից մաքրվել կամ կոնսերվացվել են 1587-ը, փակման ենթակա է 163 աղբանոց, այս պահին շահագործվում է 298-ը: Կնքվել են աղբահանության վճարների հավաքագրման համար անհրաժեշտ շուրջ 5000 պայմանագիր: Միաժամանակ, ՀՀ ոստիկանության ստորաբաժանումների և տարածքային մարմինների կողմից հոկտեմբերի 10-ի դրությամբ հայտնաբերվել է չսահմանված վայրերում աղբ թափելու 1959 դեպք, աղբ թափող՝ 974 անձ: Հայտնաբերված իրավախախտումների դեպքերից վերացվել է 1702-ը, շուրջ 442 միջնորդագիր է ուղարկվել ՏԻՄ մարմիններ, 254-ը դեռևս կատարման ընթացքի մեջ է:  Առաջիկայում ՏԿԶ նախարարությունը ԱԺ կներկայացնի «Վարչական իրավախախտումների մասին» ՀՀ օրենքում փոփոխությունների նախագիծ, որի ընդունման արդյունքում ավելի հստակ կձևակերպվեն չսահմանված վայրերում աղբ թափելու տուգանքները:Այս մասին տեղեկացանք ՝ՀՀ տարածքային կառավարման և զարգացման նախարարության հասարակայնության հետ կապերի բաժնից:

Աղբյուր` Փաստինֆո