Փաստ ինֆո

«Լուչ-Էներգիայի» երկրպագուները երկուշաբթի այցելել են Վլադիվոստոկը ներկայացնող թիմի մարզաբազա և ֆուտբոլիստներին ապուր են հյուրասիրել:

Երկրպագուները նման քայլի են դիմել այն բանից հետո, երբ ֆուտբոլիստներն աշխատավարձերը չստանալու պատճառով հետաձգել էին «Խիմկիի» հետ խաղի մեկնարկը` ի նշան բողոքի.

«Մենք լսեցինք տղաների հոգու ճիչը: Մարզումից հետո ճաշկերույթ կկազմակերպենք: Այս ակցիային 10 երկրպագու է մասնակցում: Տեսնենք` ֆուտբոլիստներն ու չինովնիկներն ինչպես կարձագանքեն: Մենք չենք ցանկանում, որ տղաները տոմսեր գնեն և հեռանան: Եթե կարիք լինի, այս ակցիան նորից կկրկնենք»,- երկրպագուներից մեկի խոսքերն է փոխանցում «VL.ru»-ն:

Երկրպագուների այս նախաձեռնության մասին իր կարծիքն է հայտնել նաև թիմի ավագ Անտոն Կիլինը.

«Հարցն այն չէ, որ երկրպագուները մեզ համար ապուր են պատրաստել, բերել են թեյ, սուրճ: Մեզ համար պարզապես հաճելի է, որ նրանք մեզ աջակցում են և հասկանում են: Նրանք հիմա իրավիճակը տեսան ներսից: Թող երկրպագուները հաճախ գան, մենք նրանց համար ենք խաղում: 

Ինչ վերաբերում է մեր ակցիային, ապա «Խիմկիի» հետ խաղից հետո ղեկավարներից ոչ ոք ոչինչ չարեց: Ոչինչ չասացին: Չգիտենք` ինչ անել: Ցանկանում ենք, որ այս իրավիճակը հարթվի: Խաղին լավատեսորեն ենք տրամադրված, իսկ նրան, ինչ կատարվում է ֆուտբոլի շուրջ, այլևս ուժ չի մնացել»,- ասել է Կիլինը:

Ավելի վաղ, հիշեցնենք, «Լուչ-Էներգիայի» գլխավոր մարզիչ Ժոլտ Հորնյակը հայտնել էր, որ թիմն արդեն թեյի համար էլ գումար չունի: Հիշեցնենք՝ այս ակումբում է հանդես գալիս հայ հարձակվող Իշխան Գելոյանը:

Աղբյուր` Փաստինֆո