Փաստ ինֆո

Տնտեսական մրցակցության պաշտպանության պետական հանձնաժողովը սոցիալական ու թյանունշանակ բարձր կենտրոնացվածության ապրանքային շուկաներում մրցակցությանը խոչընդոտող, գների ուռճացման խախտումներ չի հայտնաբերել: «Արմենպրես»-ի հաղորդմամբ` այս մասին լրագրողների հետ զրույցում նշեց ՏՄՊՊՀ նախագահ Արտակ Շաբոյանը:

Նրա խոսքով` բենզինի, շաքարավազի, կարագի, կաթնամթերքի շուկաները մշտապես իրենց ուշադրության կենտրոնում են: Հիմա էլ ուսումնասիրությունները շարունակվում են, բացահայտված խնդիրներ դեռևս չկան:

«Այս պահին ուսումնասիրություններ ենք իրականացնում այն ապրանքային շուկաներում, որտեղ կան խոշոր ընկերություններ, որոնք կարող են չարաշահումներ թույլ տալ: Այս պահին բացահայտված խնդիրներ չկան»,-ասաց Արտակ Շաբոյանը:

Պաշտոնյայի հավաստմամբ` կարագի շուկան մշտապես մոնիտորինգ են անում, վերջին շրջանում կարագի թանկացումը միջազգային շուկայից եկած ազդակ է:

«Ճիշտ է` այստեղ կան շատ ներմուծող ընկերություններ, բայց շուկան կենտրոնացված է, որտեղ խոշոր ներմուծող ընկերությանը բաժին է ընկնում կարագի վաճառքի 70-80 տոկոսը: Խոսքը նոր
զելանդական կարագի մասին է, որի գները դեռևս անցած տարվա սեպտեմբերից բարձրացել են 86 տոկոսով»,-ասաց Արտակ Շաբոյանը:

Հանձնաժողովի նախագահի դիտարկմամբ` մեր երկրում կարագի վաճառքի գների շուրջ 70 տոկոսով բարձրացումը պայմանավորված է միջազգային շուկայում գների բարձրացմամբ, քանի որ կարագ ներկրող ընկերությունների համար փոխվել են կարագի ձեռքբերման գները:

Ինչ վերաբերում է մսի շուկային ու այստեղ տիրող իրավիճակին, ապա Շաբոյանը նկատեց, որ այն մրցակցային է, որտեղ գները ձևավորվում են առաջարկ-պահանջարկի միջոցով:

«Այս շուկայում գործում են բազմաթիվ արտադրողներ, անհատ գյուղացիներ, տնային ու ֆերմային տնտեսություններ, այս տեսանկյունից մրսի ոլորտը մրցակցային է: Մեր ունեցած տվյալներով` թանկացումը հիմնականում արտաքին պահանջարկով է պայմանավորված: Այսինքն` արտահանման ծավալներն են մեծ չափով ավելացել, արտաքին պահանջարկն է կտրուկ ավելացել ու բերել է մսի գնի բարձրացման»,- ավելացրեց Արտակ Շաբոյանը:

Աղբյուր` Փաստինֆո