Փաստ ինֆո

Սյունիքի մարզի ընդհանուր իրավասության դատարանը՝ դատավոր Դ.Սարգսյանի նախագահությամբ, ճանաչել ու հռչակել է Արտակ Էվջիկյանի անմեղությունն ու նրան արդարացրել ՀՀ քրեական օրենսգրքի 333-րդ հոդվածի 2-րդ մասի 1-ին կետով՝ ծանր կամ առանձնապես ծանր հանցագործության մեջ մեղադրելով զուգորդված սուտ մատնություն, առաջադրված մեղադրանքում` հանցակազմի բացակայության, մեղադրողի կողմից մեղադրանքից հրաժարվելու հիմքով:

Ամբաստանյալը մեղավոր է ճանաչվել ՀՀ քրեական օրենսգրքի 268-րդ հոդվածի 1-ին մասով՝ առանց իրացնելու նպատակի թմրամիջոցների ապօրինի շրջանառությունը և նրա նկատմամբ նշանակել պայմանական կալանք 1 ամիս ժամկետով՝ 1 տարվա փորձաշրջանով:

Ըստ մեղադրանքի, ՊԲ N զորամասի պարտադիր ժամկետային զինծառայողը՝ կոչումով սերժանտ, գտնվելով հինգօրյա արձակուրդի մեջ, 2016 թվականի սեպտեմբերի 10-ին` ժամը 11:00-ից 13:00-ն ընկած ժամանակահատվածում, Կոտայքի մարզի Բջնի գյուղում գտնվող իրենց ընտանիքին պատկանող ամառանոցից 248 մետր հեռավորության վրա, ճանապարհի ձախակողմյա հատվածից, առանց իրացնելու նպատակի, քաղելու եղանակով ապօրինի ձեռք է բերել զգալի չափերի՝ 2.7 գրամ հաստատուն չոր քաշով մարիխուանա տեսակի թմրամիջոց, որը նույն ամառանոցում պատրաստել և տեղադրել է ծխախոտի տուփի մեջ, այնուհետև նույնպես ապօրինի փոխադրել և պահել է իր տան ննջարանի մահճակալի կողապահարանում:

Բացի այդ, Արտակ Էվջիկյանն, ըստ մեղադրանքի, կատարել է հանցագործության մասին սուտ մատնություն, այն է՝ գիտակցելով իր տրամադրած տեղեկատվության կեղծ լինելը, քրեական գործ հարուցելու իրավասություն ունեցող մարմնին գրավոր հայտնել է, որ քրոջ ամուսինը փորձել է իրեն իրացնել զգալի չափի 2.7 գրամ հաստատուն չոր քաշով մարիխուանա տեսակի թմրամիջոց՝ նրան մեղադրելով ծանր հանցագործության կատարման մեջ:

Գործով մեղադրող Գ.Թավադյանը դատական վիճաբանությունների փուլում՝ օգտվելով իր դատավարական իրավունքներից, հայտարարել է ամբաստանյալի նկատմամբ ՀՀ քրեական օրենսգրքի 333-րդ հոդվածի 2-րդ մասի 1-ին կետով քրեական հետապնդում իրականացնելուց հրաժարվելու մասին:

Դատարանը, նկատի ունենալով, որ մեղադրող Գ.Թավադյանը հանցակազմի բացակայության հիմքով մեղադրանքից հրաժարվել է, գտել է, որ Արտակ Էվջիկյանին ՀՀ քրեական օրենսգրքի 333-րդ հոդվածի 2-րդ մասի 1-ին կետով առաջադրված մեղադրանքում պետք է ճանաչել և հռչակել անմեղ ու արդարացնել:

Դատարանը միաժամանակ ապացուցված է համարել ամբաստանյալ Արտակ Էվջիկյանի կողմից ՀՀ քրեական օրենսգրքի 268-րդ հոդվածի 1-ին մասով իրեն մեղսագրված հանցագործության կատարումը:

Որպես ամբաստանյալ Արտակ Էվջիկյանի անձը բնութագրող հանգամանքներ դատարանը հաշվի է առել, որ ԼՂՀ և ՀՀ ոստիկանության ինֆորմացիոն կենտրոնների հաշվառումներով չի անցնում, նախկինում դատված կամ որևէ այլ կերպ արատավորված չի եղել, ՊԲ N զորամասի հրամանարության կողմից տրված ծառայողական բնութագրի համաձայն, նա բնութագրվում է դրական և զորամասի շտաբի պետի կողմից տրված տեղեկանքի համաձայն, 2016 թվականի ապրիլի 2-ից 6-ը գտնվել է առաջնագծում: Բնակության վայրից ևս նա բնութագրվում է դրական:

Դատարանն Արտակ Էվջիկյանի պատասխանատվությունը և պատիժը մեղմացնող հանգամանք է դիտել խոստովանական ցուցմունք տալը և կատարած հանցանքի համար անկեղծորեն զղջալը:

Աղբյուր` Փաստինֆո