Փաստ ինֆո

Մարաշի զինված խմբի գործով այսօրվա դատական նիստում դատարանը մերժեց ամբաստանյալ Վահան Շիրխանյանի պաշտպան Հայկ Ալումյանի միջնորդությունը` կալանավորումը վերացնելու կամ գրավի դիմաց իր պաշտպանյալին ազատ արձակելու մասին:

Պաշտպանը միջնորդության մեջ նշեց, որ արդեն իսկ գործով վկաները դատարանում հարցաքննվել են, ուստի` Վ.Շիրխանյանը չի կարող ազդեցություն ունենալ վկաների վրա: Մեղադրողներն առարկեցին միջնորդության դեմ՝ նշելով, որ չեն վերացել կալանավորման հիմքերը:

Դատարանն իր որոշումը հիմնավորեց ՀՀ քրեական դատավարության օրենսգրքի մի շարք հոդվածներով և Մարդու իրավունքների եվրոպական կոնվենցիայի 5-րդ հոդվածով՝ Ազատության ու անձնական անձեռնմխելիության իրավունք:

Հայկ Ալումյանը «Փաստինֆո»-ի լրագրողին հայտնեց, որ բողոքարկելու է այս որոշումը Վերաքննիչ դատարան:

Ի դեպ, որոշման հրապարակումից հետո դատական նիստը հետաձգվեց՝ Վահան Շիրխանյանը մեջքի ցավերի պատճառով այլևս չէր կարողանում նստած վիճակում մնալ:

Մինչ Հայկ Ալումյանի միջնորդության քննարկումը դատարանն այսօր շարունակեց գործի գրավոր ապացույցների հետազոտումը: Մասնավորապես, ամբաստանյալ Արա Պողոսյանի տան խուզարկությամբ հայտնաբերվել էին «Գրողի ծոցը սահմանադրական բարեփոխումները», «Ասենք՝ ոչ» թռուցիկները, ինչպես նաև գրառում՝ «Թող մարի արևը միայն թե ծագի հայոց անկախության արևը»:

«Գրողի ծոցը սահմանադրական բարեփոխումները» թռուցիկներ էին հայտնաբերվել նաև ամբաստանյալ Գևորգ Ջնդոյանի տան խուզարկությամբ: Այնտեղ հայտնաբերվել էր նաև գրառում «Աստված սեր է, սիրիր ու ուզածդ արա»:

Ամբաստանյալ Վահագն Սալնազարյանի բնակարանում հայտնաբերվել էր նրա ՕԵԿ անդամատոմսը: Ամբաստանյալի պաշտպան Մնացական Ղազարյանը հայտարարեց, որ խուզարկությամբ էլ հիմնավորվում է, որ նա որևէ կապ չունի խմբի հետ, իսկ բնակարանում Հայաստանի քարտեզներ հայտնաբերելը պայմանավորված է ամբաստանյալի կնոջ՝ աշխարհագրության ուսուցչուհի լինելու հանգամանքով:

Նույնաբովանդակ հայտարարությամբ հանդես եկավ նաև ամբաստանյալ Վաղինակ Ստեփանյանի պաշտպան Լյուդվիգ Ավետիսյանը: Խուզարկությամբ հայտնաբերվել էր երեք բջջային հեռախոս և մեկ փչացած հեռախոս, որը վերադարձվել է: Որևէ իր չի հայտնաբերվել, նա որևէ առնչություն չի ունեցել խմբի հետ, հայտարարեց պաշտպանը:

Հաջորդ դատական նիստում 35 hատոր կազմող գործի գրավոր ապացույցների հետազոտումը կշարունակվի:

Աղբյուր` Փաստինֆո