Փաստ ինֆո

Գործերի մասնատումից հետո «Սասնա Ծռեր»-1 գործով առաջին դատական նիստում պաշտպանական կողմը բարձրաձայնեց մամուլի հրապարակման մասին, որում նշվում էր ամբաստանյալներից երեքի նկատմամբ խիստ պատիժ նշանակելու անհրաժեշտության մասին: Ըստ կողմի, հրապարակմամբ իշխանությունը մամուլի միջոցով դատարանին թելադրում է խիստ դատավճիռ կայացնել:

Նախագահող դատավոր Մեսրոպ Մակյանը նշեց, որ ինքը համաձայն չէ այդ պնդման հետ և հավաստիացրեց, որ դատական քննության ընթացքում բոլոր կհամոզվեն, որ դատարանը գործում է օրենքի համաձայն:

Դատարանին ինքնաբացարկի մասին միջնորդության ունե՞ք հարցին ի պատասխան Պավել Մանուկյանը հայտարարեց, որ ինքը նույն հոդվածներով է դատվում, ինչ և Ադրբեջանի կողմից է մեղադրվել: Նա արտագաղթը բնորոշեց որպես բռնագաղթ, ցեղասպանություն, իսկ իրենց որպես՝ արդարության մարտիկներ:

Վարուժան Ավետիսյանն իր հերթին հայտարարեց, որ «… ես չեմ կարող Ձեզ ընդունել որպես դատարան, Դուք դատավոր չեք, այլ հաշվեհարդարի բաղադրիչ, սա հաշվեհարդար է», իսկ իրենք ռազմագերիներ են: Նա հավելեց, որ իրենք իրավունքի պաշտպաններ են, ապստամբներ են և քրեական օրենքի հետ առնչություն չունեն: Իմ ազգին մուրացկան են սարքել թափթփուկներ, կատարածու ստրուկներ, հայտարարեց Արայիկ Խանդոյանը՝ «Միայնակ գայլը»:

Դատարանը ամբաստանյալներից ճշտեց նրանց անձնական տվյալները: Պավել Մանուկյանը հայտնեց, որ Արցախյան ազատամարտում երկու անգամ վիրավորվել է, «Կոլցո» գործողության ժամանակ երեք անգամ ձերբակալվել է, նստել է Շուշիի բանտում: Առողջական վիճակի մասին հարցին ի պատասխան Պավել Մանուկյանը նշեց. «Այս պատերազմում առողջությունս կձգի մինչև որ ազգս մաքրեմ բոլոր տեսակի ազգադավներից»:

Վարուժան Ավետիսյանն ունի բարձրագույն իրավաբանական կրթություն, փաստաբան է, նախկինում զինվորական է եղել, պահեստազորի գնդապետ է, երկու երեխա ունի, որից մեկն անչափահաս:

Արայիկ Խանդոյանը ծառայել է բանակում, նա պահեստազորի մայոր է, ունի հինգ երեխա, որոնցից երեքն՝ անչափահաս: 19 անգամ վիրավորվել է Արցախում, 2 անգամ ՊՊԾ գնդի հետ կապված, ունի առողջական խնդիրներ՝ նաև դատարանի շենքում ամիսներ առաջ ծեծի ենթարկվելու հետևանքով:

Ամբաստանյալ Գագիկ Եղիազարյանը ներկայացավ որպես ապստամբ, ապագա Հայաստանի Հանրապետության քաղաքացի: Ամուսնացա՞ծ է հարցին նա պատասխանեց՝ «կհասցնեմ ամուսնանալ ի հեճուկս ռեժիմի»:

Ինչո՞վ եք զբաղվել մինչև կալանավորվելը հարցին Սեդրակ Նազարյանը պատասխանեց՝ հեղափոխությամբ:

Սմբատ Բարսեղյանը հայտնեց, որ թերի բարձրագույն կրթություն ունի, սովորել է համալսարանում, և հիմա իրեն թույլ չեն տալիս կալանավայրում գտնվելով ուսումը շարունակել: Ստացե՞լ եք մեղադրական եզրակացությունը հարցին նա պատասխանեց՝ հեքիաթ է:

Դատարանը ճանաչեց նաև ամբաստանյալների պաշտպանների լիազորությունները:

Արայիկ Խանդոյանի պաշտպան Արա Ղարագյոզյանը դատախազին բացարկի միջնորդություն ներկայացրեց: Ըստ պաշտպանի, դատախազը հայհոյանքներ է ուղղել իր պաշտպանյալին, անձնական թշնամանք ունի նրա նկատմամբ, ուստի չի կարող օբյեկտիվ ու անկողմնակալ լինել:

Պավել Մանուկյանի պաշտպան Հրանտ Գևորգյանը գտավ, որ միջնորդությունը վաղաժամ է, ժամանակ խնդրեց դատարանից, որպեսզի իրենք էլ որոշեն միանո՞ւմ են միջնորդությանը կամ լրացնո՞ւմ են այն: Դատարանը բավարարեց այս, ինչպես նաև մերձավոր հարազատների հետ մի շարք ամբաստանյալների տեսակցությունների ու հեռախոսային խոսակցությունների արգելքը հանելու միջնորդությունները:

Իսկ Արայիկ և Արարատ Խանդոյանների տեսակցությունները թույլ տալու միջնորդության վերաբերյալ դատարանը նշեց, որ այն դատարանում լուծում ստանալու ենթակա չէ և պետք է լուծվի արտադատական կարգով՝ քրեակատարողական օրենսդրության հիման վրա:

Աղբյուր` Փաստինֆո