Փաստ ինֆո

Հայաստանի մարդու իրավունքների պաշտպան Արման Թաթոյանը մանկապարտեզներում և դպրոցներում պաշտպանվածության և անվտանգության մակարդակը բարձրացնելու վերաբերյալ առաջարկներ կներկայացնի: Այս մասին Արման Թաթոյանը հայտնեց Ազգային ժողովում լրագրողների հետ զրույցում՝ անդրադառնալով օրերս դանակով զինված անձի կողմից Արմավիր քաղաքի մանկապարտեզում 3-ամյա երեխային պատանդ պահելու դեպքին:

«Հայաստանում դպրոցների և մանկապարտեզների պաշտպանվածության մակարդակի հետ կապված մտահոգությունները միշտ էլ եղել են, իսկ վերջին դեպքն ավելի արդիական դարձրեց այդ խնդիրը:

Մենք պետք է մեխանիզմներ մշակենք, որոնք կբարձրացնեն դպրոցների և մանկապարտեզների պաշտպանվածության մակարդակը»,- «Արմենպրես»-ի փոխանցմամբ՝ նշեց Թաթոյանը:

Նա նշեց, որ, իհարկե, կան մանկապարտեզներ և դպրոցներ, որոնք պաշտպանվածության բարձր մակարդակ ունեն, սակայն մեծ մասն անվտանգ չեն, և ցանկացած անձ կարող է անարգել ներս մտնել: «Ես կարծում եմ, որ մենք պետք է քայլեր ձեռնակենք, որպեսզի լուծենք այս խնդիրը: Միգուցե, կարող ենք դա անել դռները կոդավորելու և մշտապես փակ պահելու միջոցով, ինչպես արվում է զարգացած երկրներում»,- ընդգծեց Թաթոյանը:

Հարցին, թե ի՞նչ առաջարկներ է պատրաստվում ներկայացնել, Թաթոյանն ընդգծեց, որ այդ հարցով քննարկումներ պետք է անցկացնի ՀՀ կրթության և գիտության նախարարության, Երևանի քաղաքապետարանի, տեղական ինքնակառավարման այլ մարմինների հետ՝ հասկանալու համար, թե ինչ քայլեր են անհրաժեշտ դպրոցների և մանկապարտեզների անվտանգությունը բարձրացնելու համար:

Թաթոյանը նաև նշեց, որ Արմավիր քաղաքի մանկապարտեզում զինված անձի կողմից 3-ամյա երեխային պատանդ պահելու ընթացքում անընդհատ կապի մեջ է եղել իրավապահ մարմինների հետ, իսկ երեխային ազատելուց հետո անմիջապես ծնողների թույլտվությամբ ՄԻՊ աշխատակիցները հանդիպել են երեխայի հետ, իրենց ծառայություններն են առաջարկել նրա ընտանիքին:

Աղբյուր` Փաստինֆո