Փաստ ինֆո

Հարկային օրենսգրքով կատարված փոփոխությունների արդյունքում կառավարությունը նախատեսում է 10 միլիարդ 280 դրամի լրացուցիչ եկամուտ ստանալ 2018 թվականին: Այս մասին Ազգային ժողովում ՀՀ 2018թ. պետական բյուջեի նախագծի քննարկման ժամանակ հայտնեց ՀՀ ֆինանսների նախարարի առաջին տեղակալ Ատոմ Ջանջուղազյանը:

«Սա հիմնականում պայմանավորված է ծխախոտի, բենզինի, սեղմած գազի և ալկոհոլային խմիչքների նկատմամբ ակցիզային հարկի դրույքաչափերի բարձրացմամբ»,- «Արմենպրես»-ի փոխանցմամբ՝ նշեց Ջանջուղազյանը:

Ազգային ժողովի «Ծառուկյան» խմբակցության պատգամավոր Միքայել Մելքումյանը կարծիք հայտնեց, որ ակնկալվող լրացուցիչ եկամուտն ավելի շատ պետք է լինի, քան նախատեսված 10 միլիարդ 280 դրամը:

«Ես այդ թիվն արժանահավատ չեմ համարում, քանի որ հունվարի 1-ից, երբ ուժի մեջ կմտնի հարկային օրենսգիրքը, սեղմած գազի, բենզինի, ծխախոտի, ալկոհոլային խմիչքների ակցիզային հարկի դրույքաչափերը բարձրանում են, և հաշվի առնելով այս ապրանքների շրջանառության և իրացման ծավալները, ինչպես նաև եկամտային հարկի փոփոխությունները, ես կարծում եմ, որ այդ լրացուցիչ եկամուտն ավելի մեծ պետք է լինի: Ես խնդրում եմ, եթե դուք ունեք թվեր, թե մենք որ ապրանքի մասով որքան շրջանառություն ունենք և որքան հարկային եկամուտ ենք ակնկալում յուրաքանչյուր ապրանքի մասով ստանալ, հնչեցրեք, որպեսզի մեզ համար էլ պարզ լինի»,- ասաց Մելքումյանը:

Ֆինանսների նախարարի առաջին տեղակալ Ատոմ Ջանջուղազյանն ընդգծեց, որ իրենք արժանահավատ են համարում հարկային օրենսգրքով նախատեսված փոփոխությունների արդյունքում ակնկալվող լրացուցիչ եկամտի չափը՝ 10 միլիարդ 280 միլիոն դրամը:

«Մենք շատ մանրամասն ներկայացրել ենք բացատրագրում: Ենթադրությունները մանրամասն ներկայացված են: Եթե դուք ավելի լավ ենթադրություններ ունեք, եկեք քննարկենք: Մենք պատրաստ ենք քննարկել յուրաքանչյուր ապրանքի մասով առանձին վերցրած: Մենք համարում ենք արժանահավատ, թե ինչ կլինի՝ կյանքը ցույց կտա: Մենք տվել ենք մեր ունեցած ողջ տեղեկատվությունը, այն ենթադրությունները, որոնց հիման վրա այդ կանխատեսումներն արված են և դուրս ենք եկել այդ թվի վրա»,- մանրամասնեց Ատոմ Ջանջուղազյանը:

Աղբյուր` Փաստինֆո