Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանում այսօր շարունակվեց 2016թ. հունիսի 4-ին Նուբարաշենի խճուղում 58-ամյա Եղիշե Խաչատրյանի սպանության գործով դատաքննությունը:

Սակայն, ինչպես նախորդ նիստերում, այսօր ևս, սպանված Եղիշե Խաչատրյանի մոր՝ տուժող Էմմա Աբրահամյանի հարցաքննությունն անավարտ մնաց՝ տարեց տուժողի ինքնազգացողությունը վատացավ և դատարան հրավիրված շտապօգնությունը:

Նշենք, որ մի քանի նիստ է՝ ընթանում է տուժողի հարցաքննությունը, սակայն յուրաքանչյուր անգամ տուժող կնոջ ինքնազգացողության վատացման պատճառով հետաձգվում է:

Տարեց կինը պաշտպանական կողմի հարցադրումներին պատասխանում էր, որ իրեն դժվար է այդ ամենը կրկին վերապրել, իր աչքի առաջ սպանել են որդուն:

Տարեց կնոջ ցուցմունքները նախորդներից գրեթե չէին տարբերում, կրկնում էր, որ դեպքի օրն իրենց ավտոմեքենային հանդիպակաց եկել է մեկ այլ ավտոմեքենա, որդին կարողացել է ժամանակին արգելակել և կանխել է դժբախ ելքով վթարը, սակայն դիմացի ավտոմեքենայի մեջ գտնվողները, ի պատասխան իր որդու՝ «անասուններ, ոչխարներ էս ի՞նչ եք անում» հայտարարությանը, հայհոյանքներով են պատասխանել, որդին էլ ավտոմեքենան կանգնեցրել է ու իջել:

Երբ վիճաբանությունը թեժացել է, տարեց կինը, ով որդու կողքին նստած է եղել, դժվարությամբ ավտոմեքենայից իջել է և տեսել է, թե ինչպես են որդուն հարվածներ հասցնում:

Ըստ տուժող կնոջ ցուցմունքների՝ այդ պահին երկու անձինք որդուն հարվածներ են հասցրել, իսկ երրորդն ավտոմեքենան կանգնեցրել է ու միացել նրանց:

Տուժող կնոջ պնդմամբ՝ ինքն արտաքին տվյալներից ճանաչել է Արարատ Նիկողոսյանին և Արտաշես Չիչոյանին, իսկ Յուրի Հակոբյանին ավելի ուշ է ճանաչել՝ վարույթն իրականացնող մարմնի կողմից ճանաչման ներկայացնելու ժամանակ. նրան էլ ճանաչել է ճակատի հատվածում խիտ մազափնջից:

Արարատ Նիկողոսյանի պաշտպան Միհրան Պողոսյանի հարցերին ի պատասխան էլ տուժող կինը նշում էր, որ տեսել է, թե ինչպես են որդուն հարվածել. «Նրա մարմնի տարբեր մասերին են հարվածել, իսկ իմ որդին հայրաբար նրանց հեռացնում էր», պաշտպանը նկատեց, որ նախորդ նիստում տուժողն ասում էր, թե որդին էլ նրանց է ապտակել, ոչ թե ուղղակի ձեռքով հեռացրել է:

Ըստ տուժողի՝ այդ լարված իրավիճակում իրեն ևս հրել ու գցել են գետնին, իսկ տղային հարվածել են քունքին՝ բութ գործիքով, իսկ թե ի՞նչ բութ գործիքով, տուժող կինը, ինչպես նախորդ նիստերում, այսօր էլ հստակ չասաց, թե ինչ բութ գործիքով:

Իսկ երբ պաշտպանը հստակեցրեց, թե տարեց կինը տեսե՞լ է, թե որդու մարմնի կոնկրետ ո՞ր մասին են հարվածել, տուժողն այս անգամ ասաց, որ դատաբժշկական փորձաքննության եզրակացության մեջ գրված է:

Պաշտպանն էլ ասաց, որ գուցե այդ եզրակացությամբ առաջնորդվելով է տուժողն ասում, որ հարվածել են որդու քունքին բութ գործիքով, տուժողը պնդեց, որ ինքը տեսել է, և հարվածողը եղել է Խաչիկ Կոսյանը:

Այս հարցադրումների ժամանակ էլ տուժող կնոջ ինքնազգացողությունը վատացավ, և նա խնդրեց հիմք ընդունել իր նախաքննական ցուցմունքը, խնդրելով այլևս իրեն դատարան չկանչել և ազատել այդ ցավից:

Դատարան ժամանած շտապօգնությունն էլ տարեց կնոջը տեղափոխեց հիվանդանոց և դատական նիստը հետաձգվեց:

Ըստ մեղադրանքի՝ 2016թ. հունիսի 4-ին՝ ժամը 22:30-ի սահմաններում, ՀՀ արդարադատության նախարարության դատական ակտերի հարկադիր կատարումն ապահովող ծառայության Երևան քաղաքի Կենտրոն և Նորք-Մարաշ բաժնի հարկադիր կատարող Խաչիկ Կոսյանը, նրա աներորդին՝ Արտաշես Չիչոյանը, ընկերները՝ Արարատ Նիկողոսյանը, Արթուր Զաքարյանը և Յուրի Հակոբյանը, Երևան քաղաքի Նուբարաշենի խճուղի 5/1 հասցեի մոտակայքում Եղիշե Խաչատրյանին կյանքից զրկելու միասնական դիտավորությամբ, խուլիգանական դրդումներով, գիտակցելով մեկը մյուսի գործողությունները և մեկը մյուսի գործողությունները լրացնելով, խմբով, ձեռքերով և ոտքերով անկանոն հարվածներ են հասցրել վերջինիս կենսական կարևոր նշանակություն ունեցող մարմնի տարբեր մասերի` գլխի, կրծքավանդակի ու որովայնի շրջաններում, պատճառել կյանքի հետ անհամատեղելի մարմնական վնասվածքներ և ապօրինաբար Եղիշե Խաչատրյանին դիտավորությամբ զրկել են կյանքից:

Բացի այդ, քննությամբ հիմնավորվել է, որ Արտաշես Չիչոյանը, Արարատ Նիկողոսյանը, Խաչիկ Կոսյանը, Յուրի Հակոբյանը, Արթուր Զաքարյանը և ինքնությունը դեռևս չպարզված անձը խախտելով հասարակական կարգը և իրենց գործողությունները զուգորդելով փողոցով երթևեկող վարորդների, ուղևորների և հավաքված բազմության նկատմամբ բացահայտ անհարգալից վերաբերմունքով, խմբով կատարել են խուլիգանություն:

Մասնավորապես, հիշյալ անձինք տևական ժամանակ հայհոյանքներ են հնչեցրել և ֆիզիկական բիրտ ուժի ցուցադրմամբ սպառնալիք ստեղծել ու տագնապ առաջացրել հավաքվածների շրջանում: Այդ ընթացքում անտեսելով Եղիշե Խաչատրյանի տարեց մոր՝ որդուն չհարվածելու վերաբերյալ աղերսանքը, հրել են նրան, գցել գետնին, ապա ոտքերով հարվածներ հասցրել որդուն փրկելու համար քաշքշուկի մեջ նետված 75-ամյա Էմմա Աբրահամյանին՝ վերջինիս առողջությանը պատճառելով միջին ծանրության վնաս:

Խաչիկ Կոսյանին, Արտաշես Չիչոյանւբ, Արարատ Նիկողոսյանին, Արթուր Զաքարյանին և Յուրի Հակոբյանին մեղադրանք է առաջադրվել ՀՀ քրեական օրենսգրքի 104–րդ հոդվածի 2-րդ մասի 7-րդ և 10-րդ կետերով և 258-րդ հոդվածի 3-րդ մասի 1-ին և 4-րդ կետերով:

Նրանց բոլորի նկատմամբ որպես խափանման միջոց է կիրառվել կալանավորումը:

Լուսանկարը՝ Hetq.am-ի

Աղբյուր` Փաստինֆո