Փաստ ինֆո

Այսօր սկսվեց նախկին դատական կարգադրիչի կողմից դատավորին կաշառք տալու պատրվակով առանձնապես խոշոր չափերի խարդախության գործով դատաքննությունը:

Ըստ մեղադրական եզրակացության, ՀՀ դատական դեպարտամենտի դատական կարգադրիչների ծառայության նախկին աշխատակից Գեղամ Աղաբաբյանն իր մտերիմ` ՀՀ ոստիկանության Երևանի վարչության ուղեկցող գումարտակի ծառայող Գագիկ Մաթևոսյանից ստացել է առաջարկ` միջամտելու և դատավորի միջոցով ապահովելու մեկ այլ քրեական գործով ամբաստանյալ Արեն Ծերունյանի համար բարենպաստ դատական ակտի կայացում: Առանձնապես խոշոր չափերով ուրիշի գույքը խաբեությամբ հափշտակելու դիտավորությամբ նախկին դատական կարգադրիչը հայտնել է, թե իբր գործը քննող դատավորի հետ ունի ջերմ հարաբերություններ և դրա շնորհիվ հարցը դրական լուծելու հնարավորություն, այնուհետև տեղեկացրել է դատավորի հետ այդ հարցը 8000 ԱՄՆ դոլարով լուծելու վերաբերյալ կայացած պայմանավորվածության մասին և պատրաստակամություն հայտնել նպաստելու կաշառք տվողի և կաշառք ստացողի միջև կաշառքի շուրջ համաձայնության գալուն՝ իրականում առանց դատավորի հետ պայմանավորվածություն ձեռք բերելու:

ՀՀ ոստիկանության Երևանի վարչության ուղեկցող գումարտակի ծառայող Կարո Հովհաննիսյանն, ըստ մեղադրանքի, Կենտրոն և Նորք-Մարաշ վարչական շրջանների ընդհանուր իրավասության դատարանում քննվող քրեական գործով ամբաստանյալ Արեն Ծերունյանի ազգական Արմեն Մխիթարյանից 2016 թվականի մարտ ամսին ստացել է սկզբում 6.000, իսկ մի քանի օր անց ևս 2.000 ԱՄՆ դոլար, որը փոխանցել է Գեղամ Աղաբաբյանին, որպեսզի վերջինս փոխանցի դատավորին` իրականում չիմանալով Գ.Աղաբաբյանի և դատավորի միջև պայմանավորվածության բացակայության մասին:

ՀՀ ոստիկանության Երևանի վարչության ուղեկցող գումարտակի ծառայող Գագիկ Մաթևոսյանին առաջադրված մեղադրանքի համաձայն, նա՝ պայմանավորվել է Արեն Ծերունյանի հետ հնարավոր բարենպաստ դատական ակտի կայացում ապահովելու համար և իր վերադաս Կարո Հովհաննիսյանի հետ միասին դատական դեպարտամենտի դատական կարգադրիչների նախկին աշխատակից Գեղամ Աղաբաբյանի միջոցով Արեն Ծերունյանի համար բարենպաստ դատական ակտի կայացում ապահովելու, դատավորի հետ այդ հարցը Գ.Աղաբաբյանի միջոցով 8.000 ԱՄՆ դոլարով լուծելու վերաբերյալ կայացած պայմանավորվածության մասին և պատրաստակամություն հայտնել նպաստելու կաշառք տվողի և կաշառք ստացողի միջև կաշառքի շուրջ համաձայնության գալուն:

Ըստ Արեն Ծերունյանին առաջադրված մեղադրանքի, նա պատժից խուսափելու կամ ազատազրկման հետ չկապված այլ պատժամիջոցով դատապարտվելու նպատակով 2016 թվականի փետրվար ամսին առաջարկել է ՀՀ ոստիկանության Երևանի վարչության ուղեկցող գումարտակի աշխատակիցներ Գագիկ Մաթևոսյանին և Կարո Հովհաննիսյանին 8.000-10.000 ԱՄՆ դոլարի դիմաց միջնորդել քրեական գործը քննող դատավոր Ա.Բեկթաշյանին` բարենպաստ դատական ակտի կայացումն ապահովելու համար:

Գեղամ Աղաբաբյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախություն, Կարո Հովհաննիսյանին և Գագիկ Մաթևոսյանին ՝ ՀՀ քրեական օրենսգրքի 34-313-րդ հոդվածի 2-րդ մասի 2-րդ կետով՝ պաշտոնեական դրությունն օգտագործելով՝ կաշառքի միջնորդության փորձ, Արեն Ծերունյանին՝ 34-312-րդ հոդվածի 3-րդ մասի 1-ին կետով՝ առանձնապես խոշոր չափերով կաշառք տալու փորձ:

Ամբաստանյալներից միայն Արեն Ծերունյանը իրեն մեղավոր չճանաչեց իրեն առաջադրված մեղադրանքում: Այն ընդունելու մասին դատարանի հարցին նա պատասխանեց՝ իհարկե, ոչ: Իսկ մյուս երեք ամբաստանյալներն ընդունեցին մեղադրանքը, ամբաստանյալ Գագիկ Մաթևոսյանը հավելեց՝ «բայց գումար չեմ ստացել»:

Հաջորդ դատական նիստում կսկսվի գործի գրավոր ապացույցների հետազոտումը, ապա կհարցաքննվեն վկաները, վերջում ցանկության դեպքում ցուցմունքներ կտան ամբաստանյալները։

Աղբյուր` Փաստինֆո