Փաստ ինֆո

ԼՂՀ ՊԲ նախկին հրամանատար Սամվել Բաբայանն իրեն առաջադրված մեղադրանքները չի ընդունում: Այդ մասին այսօր Կենտրոն և Նորք-Մարաշ վարչական շրջանների ընդհանուր իրավասության դատարանում ցուցմունք տալիս հայտարարեց Բաբայանը:

Ըստ Բաբայանի՝ գործով ամբաստանյալ Սանասար Գաբրիելյանն իրեն՝ որպես մասնագետի, ցույց է տվել պլանշետով նկարած Իգլայի լուսանկարը և կարծիք է հարցրել, սակայն ինքը պատասխանել է, որ գլխավոր մեխանիզմը, որն աշխատեցնում է հրթիռը, բացակայում է, իսկ Սանասարը հարցրել է կարո՞ղ է պետք գալ բանակի համար, ի պատասխան որի՝ Բաբայանն ասել է՝ կարող է, բայց փաթաթի շորի մեջ տար մի տեղ թաղի:

Միևնույն ժամանակ, Բաբայանի խոսքով, ինքը Սանասարին ասել է, որ եթե դա իր մոտ տեսնեն այպ գործ կհարուցեն:

Բաբայանը պնդում է, որ Սանասարին անգամ չի հարցրել, թե որտեղից նրան դա, բացի այդ, նա նաև նշեց, որ իր հետ խոսելուց հետո Սանասարը հրաժարվել է այն ձեռք բերելուց. «Դրդել եմ, որ այդ գործարքը չկայանա»:

Ամբաստանյալը նաև կարծիք հայտնեց, որ դա Վրաստանից բերված չի և հավելեց, որ ապացուցելու է, թե ում գարաժից է այն: Ինչ վերաբերում է փողերի լվացման դրվագին, ապա այստեղ էլ Բաբայանը նշեց, որ Մոսկվայում բնակվող մի անձ իրեն 35 000 ԱՄՆ դոլար է պարտք եղել, և գումարը մաս-մաս վերադարձրել է, պարտք եղած գումարի 5000 ԱՄՆ դոլարն էլ ասել է, որ կուղարկի ներկոտված գումարներով, սկզբում ինքը խնդրել է ուղարկել գումարի մի մասը և փորձել է ծանոթ գտնել և հասկանալ՝ հնարավո՞ր է արդյոք մաքրել ներկերը, ապա նաև ստուգել և պարզել է, որ դրանք իսկական են և ոչ թե՝ կեղծ:

Թղթադրամների վրայի ներկերը մաքրելու գործում էլ խնդրել է իրեն օգնել գործով ամբաստանյալ Կարեն Քոչարյանին, ով էլ իր հերթին դիմել է Ժորա Զաքարյանին: Բաբայանը փորձում էր վստահեցնել, որ թղթադրամների վրայի ներկերը մաքրելու գործում ներգրավված անձինք այն կատարել են անշահախնդիր:

Ըստ նրա՝ ներկոտված գումարների մասին գործի քննության սկզբում հայտնի է եղել, «սակայն 8 ամիս անց է միայն գործին կապվել, շոու են սարքել»: Այս հայտարարությունից հետո Բաբայանը, դիմելով դատախազին, ասաց «քեզ էլ 6 ամիս գաղտնալսեին 100 հատ հոդված կդնեին վրեդ»:

Ըստ Բաբայանի՝ մեղադրանքը կառուցված է ենթադրությունների հիման վրա, իսկ ինքը ամեն ինչ փաստերով է ներկայացնում: Նշենք նաև, որ դատարանի նախաձեռնությամբ հրավիրվել էին դատաձգաբանական փորձաքննության եզրակացությունը տված փորձագետները: Փորձագետ Արթուր Հասրաթյանը ոչ միայն պնդեց իր տված եզրակացությունը, նաև հավելեց, որ խողովակը ռազմամթերք է համարվում և այն համալրելու դեպքում միայն հնարավոր կլիներ կիրառել ըստ նշանակության: Իսկ այդ վիճակում, որոշակի պայմաններում, այն կարող է նաև պայթել, քանի որ նրանում կան պայթունավտանգ նյութեր:

Դատարանն անդրադարձավ ամբաստանյալ Սանասար Գաբրիելյանի պաշտպանի կողմից ավելի վաղ ներկայացված միջնորդությանը՝ իր պաշտպանյալի նկատմամբ ռազմամթերքը ձեռքբերելուց կամովին հրաժարվելու հիմքով քրեական հետապնդումը դադարեցնելուն, և որոշեց միջնորդության քննարկումը հետաձգել և անդրադառնալ՝ խորհրդակցական սենյակում դատական ակտ կայացնելիս:

Ապա դատաքննությունը լրացնելու միջնորդությամբ հանդես եկավ Սամվել Բաբայանը՝ խնդրելով դատարան հրավիրել Իգլայի խողովակը հայթայթած Ռոբերտ Աղվանյանին: Մեղադրող դատախազ Արամ Արամյանն ասաց, որ, ըստ տեղեկությունների, նա գտնվում է Վրաստանում՝ կալանքի տակ, և ՀՀ դատախազությունը նրան էքստրադիցիա անելու գրությամբ դիմել է Վրաստանի իրավապահներին, և ներկայումս դեռ պատասխան չեն ստացել:

Գործով ամբաստանյալ Սանասար Գաբրիելյանն էլ հայտարարությամբ հանդես եկավ՝ ասելով. «Զենքի տերն ու ծախողը ո՞ւր են, հո՞րթ ենք՝ գռուզիտ եք անում»:

Այս միջնորդությունը դատարանը մերժել է:

Ապա Սամվել Բաբայանի պաշտպանը միջնորդեց Բաբայանի խափանման միջոց կալանավորումը փոփոխել անազատության հետ կապ չունեցող խափանման միջոցով կամ գրավի կիրառմամբ:
Դատարանը հեռացել է խորհրդակցական սենյակ միջնորդության վերաբերյալ որոշում կայացնելու:

Աղբյուր` Փաստինֆո