Փաստ ինֆո

Կատալոնիայի անկախության հռչակումը կարող է ուղիղ կերպով ազդել մարզական ակումբների վրա: Այդ որոշման պատճառով «Բարսելոնան» կարող է լքել Իսպանիայի առաջնությունը:

«Բարսելոնայի» համար այլընտրանքային տարբերակ կարող է լինել Ֆրանսիայի կամ Անգլիայի առաջնությունը: Ամեն դեպքում, Լա լիգայի առաջիկա տուրում կարող են լինել հանդիպումներ, որոնք, հնարավոր է՝ հետաձգվեն:

Շրջանի առանձնացումը կարող է խոչընդոտ հանդիսանալ «Ժիրոնայի» համար, որն Իսպանիայի առաջնության 10-րդ տուրում սեփական հարկի տակ պետք է ընդունի Մադրիդի «Ռեալին»: 

Ինչպես տեղեկացնում է «Marca»-ն, հանդիպումը, ամենայն հավանականությամբ, կհետաձգվի անվտանգության նկատառումներով, քանի որ ոստիկանության հիմնական ուժերը ներգրավված կլինեն Կատալոնիայի փողոցներում կատարվելիք իրարանցումներին:

Ավելի վաղ հաղորդվում էր, որ մադրիդցիները կուղևորվեն խաղին ոչ թե ակումբային ավտոբուսով, այլ վարձակալված տրանսպորտային միջոցով, որի վրա առկա չի լինի «Ռեալի» զինանշանը:

Կատալոնիայի խորհրդարանն այսօր քվեարկել է Իսպանիայից անկախանալու օգտին: Բանաձևի օգտին է քվեարկել 72 պատգամավոր, դեմ է հանդես եկել 10 պատգամավոր, ձեռնպահ են մնացել 2-ը:

Նախօրեին շրջանի ղեկավար Կառլես Պուչդեմոնը հրաժարվել էր արտահերթ ընտրություններ անցկացնելու վերաբերյալ Մադրիդի ներկայացրած պահանջից:

Ի պատասխան անկախության հռչակման՝ Մադրիդը պատրաստվում է շրջանում սահմանել անմիջական կառավարում:

Աղբյուր` Փաստինֆո