Փաստ ինֆո

Մարաշի զինված խմբի գործով այսօրվա դատական նիստում սկսվեց գործի գրավոր ապացույցների հետազոտումը. գործը կազմում է 35 hատոր:

Մասնավորապես, ըստ գործի նյութերի՝ Մարաշի զինված խմբի վնասազերծման գործողության ժամանակ իրավապահ մարմինները հատուկ տեխնիկական միջոցների կիրառմամբ բացել են տան դուռը, տանը գտնվել են գործով մի շարք ամբաստանյալներ: Նրանցից մեկը՝ Գևորգ Ջնդոյանը, ըստ արձանագրության, ձեռքը գցել է իր տակ գտնվող զենքի կողմը, և նա մեկուսացվել է:

Փաստաթղթում նշվում է, որ եռահարկ առանձնատնից խուզարկությամբ հայտնաբերվել է մեծ թվով զենք-ռազմամթերք: Զինանոցում եղել է նաև անօդաչու նկարահանող սարք, երկու ինքնաշեն պայթուցիկ սարք՝ միացված վիճակում, դրանք վնասազերծվել են: Հայտնաբերվել է նաև գումար՝ 780 հազար ՀՀ դրամ, 3500 եվրո և 13 հազար ԱՄՆ դոլար: Հայտանաբերվել են նաև ոստիկանական ու զինվորական համազգեստներ, ձեռնոցներ, դիմակներ և այլն:

Գյումրիում ամբաստանյալ Անտոն Դիկրան Թոթոնջյանի հաշվառման վայրում զենք, ռազմամթերք, պայթուցիկ նյութեր չեն հայտնաբերվել, իսկ նրա փաստացի բնակության վայրի խուզարկության ժամանակ նա ինքնակամ ներկայացրել է երկու համակարգիչ, որտեղ եղել է տեղեկատվություն իշխանավորների, օլիգարխների սեփականության մասին տեղեկատվություն: Ներկայացվել է նաև գործողությունների պլան առ այն, թե ինչ պետք է կատարվեր 2015թ. դեկտեմբերի 1-ին, երբ Արթուր Վարդանյանը դառնար Հայաստանի Հանրապետության ղեկավար: 

«Փաստաթղթերի» շարքում եղել է նաև երկու թերթիկ՝ «Հայրենիք և պատիվ» կուսակցության ապագա սև ցուցակը կգլխավորի Ռոբերտ Քոչարյանը» և «Պուտինը կարգելի Ռոբերտ Քոչարյանի մուտքը Ռուսաստան» նախադասություններով:

Նյութերի հետազոտումը կշարունակվի հաջորդ դատական նիստում:

Դատական նիստի սկզբում ՀՀ նախկին փոխվարչապետ և Պաշտպանության նախկին փոխնախարար, գործով ամբաստանյալ Վահան Շիրխանյանը հայտարարեց, որ այսօր հոկտեմբերի 27-ն է՝ ՀՀ ազգային ժողովում ահաբեկչության տարելիցի օրը, առաջարկեց մեկ րոպե լռությամբ հարգել զոհերի հիշատակը, և ինքն էլ ոտքի կանգնեց, բոլորը մեկ րոպե լռությամբ հարգեցին զոհերի հիշատակը:

Վ.Շիրխանյանը նաև միջնորդեց հետաձգել դատական նիստը, քանի որ զոհերի զինակիցներն ու ընկերներն են այստեղ նստած: Մեղադրող կողմը նշեց, որ օրենքով նախատեսված չէ նիստը հետաձգելու նման հիմք: Շիրխանյանն ի պատասխան հայտարարեց, որ ինքն այդպես էլ սպասում էր, սա հոկտեմբերի 27-ի տրամաբանական շարունակությունն է, ասաց նա: Հայտարարությանը արձագանքեց դատարանը՝ ոչ մի բանի շարունակություն չէ, Ձեր կարծիքը Ձեզ պահեք:

Աղբյուր` Փաստինֆո