Փաստ ինֆո

«Սասնա Ծռեր-3»-ի գործով այսօրվա դատական նիստում բարձրացվեցին մի շարք խնդիրներ, որոնք ծագել էին գործերից մասեր անջատելու դատարանի որոշումների հետևանքով:

Այսպես, ինչպես հայտնի է, «Սասնա Ծռեր-1» և «Սասնա Ծռեր-2» գործերից (համապատասխանաբար՝ Պավել Մանուկյան և մյուսներ ու Արամ Մանուկյան և մյուսներ) մասեր էին առանձնացվել ու հետագայում ընդունվել դատավորներ Մեսրոպ Մակյանի ու Արթուր Օհանյանի վարույթ, իսկ սկզբնապես հիշյալ գործերով նախագահող դատավոր Արտուշ Գաբրիելյանի վարույթում մնացել էին երկու գործերից 4 և 7 ամբաստանյալի վերաբերյալ մասերը, որոնք միացվել էին մեկ վարույթում:

Այսօրվա դատական նիստում պաշտպանական կողմը հայտարարեց, որ գործերից մասեր անջատելու և մասամբ մեկ վարույթում միավորելու հետևանքով տվյալ գործով երկու մեղադրական եզրակացություն կա 4 և 7 ամբաստանյալի վերաբերյալ, ուստի անհրաժեշտ է կազմել մեկ ամբողջական մեղադրական եզրակացություն: Կան նաև տուժողներ, տուժողների իրավահաջորդներ, որոնք չեն տուժել Արտուշ Գաբրիելյանի վարույթում գտնվող գործի ամբաստանյալներից, ինչպես նաև վկաներ, որոնք առնչություն չունեն հիշյալ 11 ամբաստանյալի հետ:

Դատարանը մեկ ամբողջական մեղադրական եզրակացություն կազմելու պաշտպանական կողմի միջնորդության լուծումը հետաձգեց՝ նշելով, որ այդ միջնորդությանը կանդրադառնա էական հանգամանքներ ճշտելուց հետո:

Դատարանը մերժեց պաշտպան Տիգրան Հայրապետյանի միջնորդությունն իր պաշտպանյալ Կարո Եղնուկյանի նկատմամբ ընտրված կալանավորումը գրավով փոխարինելու մասին: Որպես քննությունից չթաքնվելու ու քննությանը չխոչընդոտելու երաշխիք նշվեց, որ առկա են թվով 6 պատգամավորի և երկու նախկին մարդու իրավունքների պաշտպանների անձնական երաշխավորագրերը: Առաջարկվեց նաև մեկ մլն դոլարի անշարժ գույք՝ որպես գրավի գումար:

Ըստ մեղադրող կողմի, կալանավորման հիմքերն ու պայմանները հիմա էլ պահպանվում են, և հիշյալ երաշխիքները չեն կարող ապահովել ամբաստանյալի պատշաճ վարքագիծը:

Փաստաբան Մուշեղ Շուշանյանը նշեց, որ շինծու մեղադրանքի վրա հիմնված քրեական հետապնդում է իրականացվում Կարո Եղնուկյանի հանդեպ, նա քաղբանտարկյալ է, իսկ վերջինս էլ հայտարարեց, որ քաղբանտարկյալ հասկացությունը բնութագրող 5 չափորոշիչներից 4-ն իր դեպքում առկա են:

Դատարանը մերժեց այս, ինչպես նաև ամբաստանյալներ Արմեն Լամբարյանի ու Աշոտ Պետրոսյանի կալանավորումը գրավով փոխարինելու պաշտպան Արայիկ Պապիկյանի միջնորդությունները:

Դատարանը մերժեց նաև Կարո Եղնուկյանի վերաբերյալ մասն անջատելու և այն առանձին քննելու նրա պաշտպան Տիգրան Հայրապետյանի միջնորդությունը: Ըստ պաշտպանի, իր պաշտպանյալի վերաբերյալ մասը որևէ կապ չունի գործով անցնող մյուս տասը ամբաստանյալների ու նրանց առաջադրված մեղադրանքի հետ: Ընդհանուր առմամբ գործում Կարո Եղնուկյանին առնչվում է ընդամենը 40 էջ: «Մեկ շաբաթում՝ ողջամիտ ժամկետում, կամ մեղավոր կճանաչեն կամ կարդարացնեն», ասաց պաշտպանը, իսկ պաշտպանյալը հավելեց՝ «եթե մերժեք, դա կնշանակի, որ Դուք շարունակում եք հոգեբանական խոշտանգումը»:

Կարո Եղնուկյանի հայտարարությանը հետևեց նաև ամբաստանյալ Խաչատուր Գիչյանի հայտարարությունը՝ «ես էլ եմ քաղբանտարկյալ և գործից իմ մասն էլ պետք է անջատել»:

Փաստաբան Մուշեղ Շուշանյանը հայտարարեց, որ միջնորդությունը ակնհայտ հիմնավոր է և բխում է արդարադատության շահերից:
Մեղադրող կողմը նշեց, որ բացակայում են մաս անջատելու հիմքերը:

Դատարանը քննեց ու բավարարեց Կարո Եղնուկյանի ու Խաչատուր Գիչյանի՝ մերձավոր հարազատների հետ տեսակցելու ու նրանց հետ հեռախոսային խոսակցությունների արգելքը վերացնելու միջնորդությունը՝ նրանց ընտանիքների անդամների հետ տեսակցությունների արգելքն ավելի վաղ է վերացվել:

Աղբյուր` Փաստինֆո