Փաստ ինֆո

Հայաստանի պաշտպանության նախարար Վիգեն Սարգսյանը Ազգային ժողովի «Ելք» խմբակցության պատգամավորներին մեղադրում է «Զինվորական ծառայության և զինծառայողի կարգավիճակի մասին» օրենքի նախագիծը պրիմիտիվացնելու փորձի մեջ՝ նեղացնելով այն մինչև տարկետման տրամադրման հարցը:

«Զինվորական ծառայության և զինծառայողի կարգավիճակի մասին» օրենքի նախագծի քննարկման ժամանակ եզրափակիչ ելույթում Վիգեն Սարգսյանը ցավով ընդգծեց, որ իրականում առաջարկվող օրինագիծն անհամեմատ ավելի լայն է:

«Այն լուծում է տարիների, տասնամյակների ընթացքում լուծում չգտած հարցեր թե սպաների, թե պայմանագրային զինծառայողների, թե ժամկետային ծառայության անձնակազմի համար: Այն տալիս է սոցիալական պաշտպանության լուրջ երաշխիքներ, բովանդակային լիցք է հաղորդում արտոնությունների ինստիտուտին՝ զինված ուժերում ծառայությունը դարձնելով սոցիալական վերելակ տասնյակ հազարավոր մեր երիտասարդների համար»,- «Արմենպրես»-ի հաղորդմամբ՝ ընդգծեց նախարարը:

Նա հավելեց, որ միտումնավոր առաջարկել է օրենքով մինչ այժմ պաշտպանության նախարարին վերապահված մի շարք լիազորություններ բարձրացնել կառավարության որոշուﬓերի մակարդակի՝ ապահովելու համար դրանց քննարկման և ընդունման ավելի մեծ թափանցիկությունն ու հաշվետվողականությունը:

«Օրինագծին զուգահեռ՝ հանդես եմ եկել մի շարք հեռու գնացող նախաձեռնություններով, այդ թվում՝ պաշտոնյաների հայտարարագրում նրանց և իրենց ընտանիքի ընտանիքների անդամների զինծառայության նկատմամբ պարտավորությունների հայտարարագրման պահանջ ներառելը և կառավարության որոշմամբ տարկետում ստացող անձանց ցանկի միավորված հրապարակումը բաց աղբյուրներում»,- ասաց Վիգեն Սարգսյանը:

Նա ցավով նկատեց, որ «Ելք» խմբակցությունը չի գնահատել իրեն մեկնած ձեռքը և չփորձեց կառուցողական փոխգործակցության դաշտում լուծել երկրի համար առանցքային նշանակության ազգային անվտանգության և պաշտպանության ոլորտի խնդիրները:

«Դեստրուկտիվ ոճի ջատագովները չցանկացան ըմբռնել, որ առաջարկվող լուծումներն անհամեմատ ավելի լավն են, քան հնարավոր բազմաթիվ, այդ թվում՝ իրենց առաջարկած տարբերակները: Պարզ է, որ եթե խնդիրը լիներ զուտ թվաբանական, եթե ես փորձեի լուծել զորակոչային ռեսուրսի հարցը, ապա 2018թ. ամռանը, երբ 12-ամյա կրթության անցման 12-րդ տարում ավագ դպրոցների շրջանավարտների թիվը լինելու է անհամեմատ ավելի փոքր նախորդող և հաջորդող բոլոր տարիներից, կառավարությունն առանց Ազգային ժողով դիմելու կարող էր կտրուկ նվազեցնել տարկետմամբ տրվող տեղերի քանակը և բուհերում, բարդացներ ասպիրանտուրայի և մագիստրատուրայի տեղերի հատկացման ընթացակարգերը և կլուծեր զորակոչային ռեսուրսի խնդիրը:

Այն, ինչ դուք առաջարկում եք, այն, ինչի մասին դուք խոսում եք՝ որպես լուծման եղանակ, մանր մեքենայության մեխանիզմ է: Ես դրա փոխարեն առաջարկել եմ շատ ավելի լայն քաղաքականություն, որը թույլ է տալիս, չնայած դպրոցների շրջանավարտների թվի կտրուկ նվազեցմանը, հարյուրավոր տեղեր պահել տարկետման իրավունքով, բուհական կրթությունն անընդհատ ստանալու այն երիտասարդների համար, ովքեր պատրաստ են այնուհետև ծառայել զինված ուժերում որպես սպա: Եթե դուք համարում եք, որ լուրջ գիտնականն առհասարակ չպետք է բանակում ծառայի, ես այդ մոտեցմանը սկզբունքորեն դեմ եմ: Ես՝ որպես պաշտպանության նախարար, առաջարկում եմ լուծում, որը հնարավորություն կտա գիտնականին իր գիտելիքները ծառայեցնել բանակին՝ որպես զինված ուժերի սպա: Ես ձեզ վստահեցնում եմ, որ դա շատ ավելի մեծ ներազդեցություն կունենա ռազմական գիտության և ռազմական արդյունաբերության վրա, քան օրենքում արտոնյալ պայմաններում տարեկան երկու տոկոսով ներքին արտադրողից ապրանք գնելու պոպուլիստական և ոչինչ չլուծող բանաձևը, որովհետև մրցակցությունն է առաջ մղում գիտությունն ու արդյունաբերությունը, ոչ թե պրոտեկցիանիզմը, որը կեղծ հայրենասիրությամբ փորձում է քողարկել իրականում գործ չանելու ցանկությունը»,- ընդգծեց Վիգեն Սարգսյանը:

Նա շեշտեց, որ քննարկման ընթացքում բազմաթիվ զուգահեռներ են անցկացրել 1997թ. առաջարկված օրենքի նախագծի հետ՝ շեշտելով, որ տարբերությունը շատ հստակ է:

«1997թ. օրենքի նախագծով առաջարկվում էր բոլորին տանել բանակ, իսկ ինքն առաջարկում է լուծում, երբ տարեկան հարյուրավոր երիտասարդներ կարող են բանակ գնալ որպես սպա, դրա դիմաց ստանալ աշխատավարձ, ստանալ ուսման վարձի փոխհատուցում նաև ծառայելուց հետո մագիստրատուրայում սովորելու համար, այդ թվում՝ աշխարհի առաջատար բուհերում: Պարոն Գորգիսյանն այստեղ ոգևորված հարցնում էր, թե մենք ի՞նչ ենք արել: Ես անձամբ ուղիղ մասնակցել եմ նրան, որ մենք ձևավորել ենք հիմնադրամ առանց մի կոպեկ բյուջետային փող դնելու ,որով տարեկան հարյուրավոր երիտասարդներ գնում են առաջատար բուհերում լավագույն կրթությունը ստանալու»,- շեշտեց ՀՀ պաշտպանության նախարարը:

Վիգեն Սարգսյանն անդրադարձավ նաև «Ելք» խմբակցության պատգամավորների ելույթների ընթացքում հնչած առաջարկներին:

«Ինչո՞ւ երեք օր պահեստազորի մասին քննարկումներից հետո տիկին Թանդիլյանը հրաժարվում է հասկանալ, որ ժամկետային զինծառայությունն առաջին հերթին ոչ թե առաջնագիծը համալրելու միջոց է այլ պահեստազոր պատրաստելու միակ գործուն ճանապարհը: Ինչո՞ւ առաջնագիծը կամավոր ընտրածներին խրախուսելու, այդ թվում՝ լրջագույն նյութական խթան տալու իմ առաջարկին փորձ է արվում հակադրել չծառայելը վճարով փոխհատուցելու անհեթեթ գաղափարը: Տիկին Թանդիլյան, Ձեր երեկվա ելույթում հնչեցրած առաջարկը ոչ այլ ինչ է, քան կոչ մեր բնակչությանը՝ վաճառել իրենց վերջին կացարանը՝ զավակի չծառայելու և ձեր պատկերացրած պայմանագրային բանակին վճարելու անարդար մի գաղափար: Եթե չծառայելու դիմաց հնարավոր լինի վճարել, ո՞ր խավն է առաջինը դրանից օգտվելու ,և ո՞ր հայ ծնողն է նայելու իր երեխայի աչքերի մեջ և ասելու՝ գումար չունեմ, դու պարտավոր ես գնալ ծառայելու: Ես ուրախ եմ, որ այդ աշխարհընկալմամբ դուք փոքրամասնություն կազմող ընդդիմություն եք այս խորհրդարանում»,- նշեց Սարգսյանը՝ անդրադառնալով «Ելք» խմբակցության պատգամավոր Մանե Թանդիլյանի ելույթին:

Արձագանքելով «Ելք» խմբակցության ղեկավար Նիկոլ Փաշինյանի ելույթին Վիգեն Սարգսյանը հարցրեց՝ ո՞ւր է տրամաբանությունը, երբ մի կողմից օլիգարխների և մեծահարուստների ոսկի զավակների չծառայելու դեմ առերես պայքարողները րոպեներ անց նույն ամբիոնից տարակուսում են, թե ինչո՞ւ եմ ես դեմ ծառայությունից խուսափած անձանց նկատմամբ քրեական հետապնդումը գումարի դիմաց դադարեցնելու գաղափարին: Անդրադառնալով նույն խմբակցության պատգամավոր Էդմոն Մարուքյանի ելույթին՝ Վիգեն Սարգսյանը հիշեցրեց, որ պատգամավորը քննարկման ողջ ընթացքում անձնական օրինակներ էր բերում և իր կոմֆորտի մասին էր հարցնում:

«Նա անընդհատ իմ կոմֆորտից էր հարցնում, ուստի ես իրեն կուզեի հարցնել, թե իր ֆրակցիայի գործընկերներից հարցրե՞լ է՝ իրենք կոմֆորտ են զգում, որ օգտվել են լեգիտիմ տարկետման իրավունքից և բանակում չեն ծառայել: Հասկանում եմ, պարոն Միրզոյան, որ դուք ձեզ մեծ գիտնական եք համարում, 25 տարեկանում ատենախոսություն եք պաշտպանել, սակայն ցանկանում եմ հասկանալ, թե ի՞նչ խղճով եք ստացել պաշտպանության նախարարության պատվոգիրը՝ մի օր անգամ զորամասում չծառայելով: Ձեր ո՞ր արածի համար եք ստացել այդ պատվոգիրը, որ հիմա էլ այս ամբիոնից ինչ-որ մեկին մեղադրում եք կոմֆորտի և դիսկոմֆորտի մեջ»,- ասաց Վիգեն Սարգսյանը:

Եզրափակելով խոսքը՝ նախարարը շեշտեց, որ մշտապես եղել և մնալու է կոռեկտ իր ընդդիմախոսների նկատմամբ, սակայն խնդրեց այդ կոռեկտությունը չշփոթել միամտության հետ:

«Եթե փորձելու եք դրա վրա քաղաքական միավորներ հավաքել, պատասխանը լինելու է համարժեք»,- եզրափակեց Սարգսյանը:

Լուսանկարը՝ Azatutyun.am-ի

Աղբյուր` Փաստինֆո