Փաստ ինֆո

Քրեական հեղինակություն համարվող Թեւոսիկի եղբոր Արթուր Սաֆարյանի գործով այսօր դատարանը երկրորդ անգամ որոշում կայացրեց վերսկսել դատաքննությունը։ Եվ դատական նիստ նշանակեց նոյեմբերն 10-ին։ Հիշեցնենք, որ սա դատարանի՝ դատաքննությունը վերսկսելու երկրորդ որոշումն էր։

Արդեն երկու անգամ հայտարարվել է դատաքննության ավարտի մասին և երկու անգամ դատարանը գնացել է խորհրդակցական սենյակ, բայց այդպես էլ դատավճիռ չի կայացրել։ Առաջին անգամ դատաքննությունը վերկսկսելու որոշում դատարանը կայացրել է հունիսի 22-ին՝ անհրաժեշտ համարելով հարցաքննել փորձագետներին։

Դատախազը երկրորդ մեղադրական ճառում եւս պահանջեց 25 տարվա ազատազրկում՝ Իսրայել Սարգսյանի համար

Նշենք, որ Իսրայել Սարգսյանին նախաքննական մարմինը մեղադրանք է առաջադրել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ Արթուր Սաֆարյանի՝ պատվերով սպանության, 104-րդ հոդվածի 2-րդ մասի 11-րդ կետով՝ այլ հանցանքը թաքցնելու նպատակով՝ կատարված Մովսես Ներսիսյանի սպանության, 235-րդ հոդվածի 1-ին մասով՝ ապօրինի կերպով զենք, ռազմամթերք ձեռք բերելու, պահելու համար։

Դատարանում մեղադրանքը պաշտպանող դատախազի գնահատմամբ՝ ապացույցները բավարար են ամբաստանյալին մեղավոր ճանաչելու համար առաջադրված մեղադրանքներում՝ առ այն, որ Թևոսիկի եղբորն սպանել է Մովսես Ներիսիսյանը՝ Իսրայել Սարգսյանի («Իսո») պատվերով, ինչից հետո վերջինս սպանել է Մովսես Ներսիսյանին՝ հետքերը թացքնելու համար։ Մովսես Ներսիսյանի դիակը հայտնաբերել չի հաջողվել։

«Մոսոյի» եւ «Իսոյի» հանցավոր անցյալի գլխավոր դերակատարներից է ներքին գործերի նախկին նախարար Վանո Սիրադեղյանը

Դատախազն Իսրայել Սարգսյանի համար պահանջել է 25 տարվա ազատազրկում, իսկ պաշտպանական կողմը՝ արդարացում։

«Փաստինֆո»-ն ավելի վաղ անդրադարձել է, որ թե  Իսրայել Սարգսյանը  եւ թե Մովսես Ներիսիսյանը հանցավոր հարուստ անցյալ են ունեցել։ «Իսո»-ն սպանությունների, զինված բանդայի կազմավորման համար ցմահ ազատազրկման դատապարտված Արմեն Տեր-Սահակյանը վաղեմի ծանոթներ ու հանցակիցներ են:  Իսրայել Սարգսյանը եղել է Արմեն Տեր-Սահակյանի բանդայի անդամ և այդ գործով էլ դատապարտված է եղել երկարատեւ ազատազրկման ՝ սպանության, սպանության փորձի և ավազակային հարձակումների համար:

Մովսես Ներսիսյանը ևս դատապարտված է եղել սպանությունների ու ավազակային հարձակումների համար: Մոսոյին եւ Իսոյին միավորում է այն, որ երկուսն էլ, ըստ էության, կատարել են, ներքին գործերի նախկին նախարար, այսօր դեռեւս հետախուզման մեջ գտնվող Վանո Սիրադեղյանի պատվերները:

Մասնավորապես՝ Մովսես Ներսիսյանը ժամանակին դատապարտվել է` Սերժ Ջիլավյանի սպանությունը ձախողելու համար երկու երիտասարդների սպանության համար։ Իսկ Իսրայել Սարգսյանը գործել է Արմեն Տեր-Սահակյանի բանդայի կազմում՝ մասնակցել Հովհաննես Սուքիասյանի սպանության նախապատրաստմանը, անմիջական մասնակցություն ունեցել Դատախազության քննչական վարչության պետ Վլադիմիր Գրիգորյանի դեմ մահափորձին եւ մի շարք այլ հանցագործությունների կատարմանը։

Աղբյուր` Փաստինֆո