Փաստ ինֆո

«Զինվորական ծառայության և զինծառայողի կարգավիճակի մասին» օրենքի նախագծով ստեղծվում են նախադրյալներ զինվորական քվեարկության անաչառության, զինված ուժերում մարդու իրավունքների պաշտպանության և բարեվարքության կանոնների ներդրման և ապահովման համար: Պաշտպանության նախարարությունը իր հերթին ամբողջությամբ օգտագործելու է այդ նախադրյալները:

Ազգային ժողովում «Զինվորական ծառայության և զինծառայողի կարգավիճակի մասին» օրենքի նախագծի քննարկման ժամանակ այս մասին ասաց ՀՀ պաշտպանության նախարար Վիգեն Սարգսյանը՝ պատասխանելով «Ծառուկյան» խմբակցության պատգամավոր Սերգեյ Բագրատյանի հարցին, թե արդյոք ձեռնարկվո՞ւմ են համապատասխան միջոցառումներ օրենքի նախագծում զինվորական քվեարկության անաչառության ապահովման մասին դրույթն ամբողջական իրացնելու ուղղությամբ:

«Միջոցներ, իհարկե, ձեռնարկվում են: Անցած ընտրությունների ժամանակ ունեցել ենք համապատասխան ծրագրեր մի շարք միջազգային կառույցների հետ՝ իրազեկման, զինվորական քվեարկության անաչառության ապահովման տեսակետից: Այսօր ունենք մեծ ծրագիր Եվրոպայի խորհրդի հետ՝ Մեծ Բրիտանիայի կառավարության ֆինանսավորմամբ, զինված ուժերում մարդու իրավունքների, բարեվարքության ներդրման տեսանկյունից: Սա մշտական գործընթաց է»,- «Արմենպրես»-ի հաղորդմամբ՝ ընդգծեց նախարարը:

Նախարարի խոսքով՝ դրա մեջ մեծ կարևորություն ունի քաղաքացիական կրթությունն առհասարակ, որը դպրոցից սկսած պետք է լինի: 

«Պետք է ասեմ, որ շատ եմ ուրախանում, երբ տեսնում եմ, որ մեր զինծառայողների մեջ ավելի ու ավելի է բարձրանում իրավագիտակցությունը, իրենց իրավունքները պաշտպանելու պատրաստակամությունը, և այդ հարցերին շարունակելու ենք դարձնել լուրջ ուշադրություն: Այս օրենքը ստեղծելու է դրա նախադրյալները, որոնք մենք ամբողջությամբ օգտագործելու ենք:

Աղբյուր` Փաստինֆո