Փաստ ինֆո

Երեք մասի բաժանվելուց հետո «Սասնա Ծռեր»-2-ի գործով այսօրվա առաջին դատական նիստում դատարանը ճշտեց ամբաստանյալների անձնական տվյալները, լուծեց փաստաբաններին որպես ամբաստանյալների պաշպաններ ներգրավելու հարցը:

Դատարանը քննության առավ ամբաստանյալ Արամ Մանուկյանի միջնորդությունը՝ մեղադրողներին բացարկ հայտնելու մասին: Ամբաստանյալը հայտարարեց, որ ինքը չի ընդունում մեղադրական եզրակացությունը, այն պատվեր է, այն, ինչ գրված է, կապ չունի իրենց հետ, իսկ այն, որ իրենք պահանջում էին իշխանափոխություն, գրված չէ: «Մենք չենք դատվում այն բանի համար, ինչ արել ենք», նշեց նա:

Ամբաստանյալը հարցով դիմեց մեղադրանքի կողմին՝ իրենք ուսումնասիրե՞լ են մեղադրական եզրակացությունը: Արամ Մանուկյանի պաշտպան Հարություն Բաղդասարյանը հավելեց, որ մեղադրանքի կողմը չի բացահայտել մեղադրողների դիտարկմամբ հանցագործությունը ծնող պատճառները, ինչը պարտավոր էին անել օրենքով:

Ըստ պաշտպանական կողմի, նշված չէ ամբաստանյալներին մեղսագրվող արարքների շարժառիթը, ինչպես նաև չեն անհատականացվել յուրաքանչյուր ամբաստանյալի արարքները:

Ամբաստանյալ Հովհաննես Հարությունյանը հայտարարեց, որ ինքը մահափորձի է ենթարկվել, ոտքը ձեռքից բարակ է, այդուհանդերձ բուժում չի ստանում:

Ամբաստանյալները բարձրաձայնեցին, որ բանակում «մեր երեխեքի զոհվելու» մասին, ինչը կանխելու ուղղությամբ պատշաճ միջոցներ չեն ձեռնարկվում՝ չէ՞ որ իրենց, այսինքն՝ իշխանավորների, երեխաները չեն ծառայում: «Մեր երեխեքը» շարունակվում են զոհվել, իսկ «մենք դարձել ենք «հանցագործ», «խուլիգան», շղթայակապ տանում-բերում են»:

Ամբաստանյալ Թորոս Թորոսյանը հայտարարեց, որ մեկ տարի երեք ամսվա ընթացքում իր մոտ լուրջ առողջական խնդիրներ են առաջացել, իրեն ուղարկում են դժոխքի (Նուբարաշեն ՔԿՀ) մասնաճյուղ՝ Դատապարտյալների հիվանդանոց, սակայն ինքը հրաժարվել է:

Դատախազներին բացարկի միջնորդությանը միացավ պաշտպան Լուսինե Սահակյանը, ով դատարանի ուշադրությունը հրավիրեց այն հանգամանքի վրա, որ պետությունը չի կատարել իր պարտականությունը, չի կիրառել խրախուսական նորմը, այսինքն՝ ամբաստանյալներն անազատության մեջ ապօրինի են գտնվում:

Պաշտպանը պարզաբանեց, որ կան ամբաստանյալներ, ովքեր պետք է ազատվեին քրեական պատասխանուտվությունից խրախուսական նորմի ուժով, քանի որ իր պահանջներից հրաժարված, պատանդին կամովին արձակած կամ զավթածը կամովին ազատած անձն ազատվում է քրեական պատասխանատվությունից: Մեղադրողները չէին կարող դա չնկատել, ուստի նրանք կանխակալ են և չեն կարող անկողմնակալ լինել:

Դատարանը մերժեց բացարկի միջնորդությունը՝ նշելով, որ եթե դատարանը նախապատրաստական փուլում քննության առնի մեղադրանքի հիմնավորվածության հարցը, ապա դա կլինի ապագա քննությունը կանխորոշող հիմք:

Ինչպես և նախկինում, դատարանում բարձրացվեց ոտքի կանգնելու ու «հարգելի՛ դատարան» բառերով դատարանին դիմելու կարգի մասին հարցը, ինչի վերաբերյալ հնչեց պատասխանը՝ «եթե տեսնենք, որ դատարանն անաչառ է, ոչ միայն ոտքի կկանգնենք, կխոնարհվենք»:

Դատական նիստին ներկա չէին մի քանի պաշտպաններ, այդ պատճառով դատական նիստը հետաձգվեց մեկ շաբաթով:

 Լուսանկարը՝ Azatutyun.am-ի

Աղբյուր` Փաստինֆո