Փաստ ինֆո

Իտալական Լոմբարդիա և Վենետո մարզերի բնակիչները կոնսուլտատիվ հանրաքվեների ընթացքում արտահայտվել են տարածաշրջանների ինքնավարության ընդլայնման օգտին:

Ըստ ՌԻԱ Նովոստիի, Վենետոյի ընտրական հանձնաժողովը հայտնել է, որ քվեարկածների 98%-ից ավելին արտահայտվել է ինքնավարության օգտին: Քվեարկությանն ընդհանուր առմամբ մասնակցել է ընտրողների 57%-ից ավելին:

«Դա Վենետոյի բնակիչների հաղթանակն է, քաղաքացիական գիտակցության հաղթանակը, մարդկանց հաղթանակը, ովքեր ուզում են լինել իրենց տան տերերը», - ասել է մարզի նախագահ Լուկա Դզայան: Նա տարածաշրջանային հանրաքվեի արդյունքները պատմական իրադարձություն է անվանել և խոստացել արդեն երկուշաբթի օրը սկսել պայմանագրի վրա աշխատանքը, որը «մենք կառաջարկենք կենտրոնական իշխանություններին»:

Մարզի ղեկավարը նշել է, որ հանրաքվեի անցկացման ռեգիոնալ էլեկտրոնային համակարգը կիրակի օրը ենթարկվել է լուրջ հաքերական հարձակման:

Լոմբարդիայում ինքնավարության ընդլայնման օգտին իրենց ձայնն է տվել բնակիչների 95%-ը, պատմել է մարզի նահանգապետ Ռոբերտո Մարոնին:

«Շնորհակալություն երեք մլն լոմբարդացիներին, ովքեր եկել էին քվեարկության և այն 95%-ին, ովքեր ձայն են տվել «այո» պատասխանի օգտին»,- ասել է նա:

Մարոնին ընդգծել է, որ Լոմբարդիան պատմական արդյունքի է հասել, քանի որ այստեղ առաջին անգամ էր կիրառվում էլեկտրոնային քվեարկության համակարգը, որն անմատչելի է հաքերական հարձակումների համար:

«Ես շատ գոհ եմ նրանից, թե մենք ինչպես դա գլուխ բերեցինք»,- նշել է նա՝ հավելելով, որ քվեարկածների երեք տոկոսից ավելին արտահայտվել է ռեգիոնի լիազորությունների ընդլայնման դեմ, քվեաթերթիկների 0,9%-ը դատարկ է եղել:

Մարոնին նաև հիշեցրել է, որ ինքը հանրաքվեից առաջ նպատակ էր դրել հաղթահարել ներկայանալու 34%-անոց շեմը:

«Տվյալ պահի դրությամբ ես կարող եմ ասել, որ մշակվել են մոտ մեկ երրորդի տվյալները, ընտրողների ներկայանալը գերազանցել է 40%-ը: Ես չեմ մրցում Դզայայի հետ, սակայն ես երջանիկ եմ, որ մենք կարող ենք միավորել ջանքերը և սկսել դարի ճակատամարտը»,- ասել է նա:

Երկու հյուսիսիտալական մարզերում հանրաքվեները տեղի են ունեցել հոկտեմբերի 22-ին: Իտալական Հանրապետության պատմության մեջ նման կոնսուլտացիաներ ռեգիոնների բնակչության առաջին անգամ են անցկացվում: Երկու հանրաքվեներն էլ կոնսուլտատիվ բնույթի են և ֆորմալ առումով չեն առաջացնի պարտադիր իրավական հետևանքներ:

Աղբյուր` Փաստինֆո