Փաստ ինֆո

Հոկտեմբերի 25-ին դատարանը կհրապարակի քրեական հեղինակություն համարվող Թևոսիկի եղբոր՝ Արթուր Սաֆարյանի, սպանության գործով դատավճիռը: Դատարանը քիչ առաջ հեռացավ խորհրդակցական սենյակ՝ դատավճիռ կայացնելու:

Այսօրվա դատական նիստում կողմերը ռեպլիկներով հանդես եկան, իսկ Արթուր Սաֆարյանի սպանությունը կազմակերպելու և դա թաքցնելու համար Մովսես Ներսիսյանի սպանությունը կատարելու մեջ մեղադրվող Իսրայել Սարգսյանը՝ վերջին խոսքով:

Մասնավորապես, տուժող Արթուր Սաֆարյանի իրավահաջորդի ներկայացուցիչ Երեմ Սարգսյանն ընդգծեց, որ հնարավոր է լինեն՝ դիակը չկա, սպանությունը կա, հարցի շուրջ շահարկումներ: Փաստաբանը պնդեց, որ ամբաստանյալի կողմից կատարվել են Մովսես Ներսիսյանի սպանությունը կատարելու ուղղությամբ բոլոր գործողությունները, ուստի դիակը չհայտնաբերելու պայմաններում այդ դրվագով արարքը առնվազն պետք է որակվի որպես սպանության փորձ:

Ամբաստանյալի պաշտպան Հեկտոր Սարդարյանը պնդեց, որ գործով ձեռք չի բերվել մեղադրանքը հիմնավորող գեթ մեկ ուղղակի ապացույց, իսկ անուղղակի ապացույցները հերքվում են ձեռք բերված ապացույցներով: «Եթե Մովսես Ներսիսյանին փնտրել ու չեն գտել, ուրեմն նա սպանվա՞ծ է»,- մասնավորապես, նշեց պաշտպանը:

Տվյալ գործով առկա է ապացույցների ակնհայտ անբավարարություն, գտնում է պաշտպանը, ուստի իր պաշտպանյալը պետք է արդարացվի առաջադրված մեղադրանքում:

Ամբաստանյալ Իսրայել Սարգսյանն իր վերջին խոսքում հայտարարեց, որ ինքն իրեն մեղավոր չի ճանաչում ու մինչև վերջ պայքարելու է արդարության համար:

Ամբաստանյալն անհիմն համարեց մեղադրանքը, իսկ մեղադրական ճառը գնահատեց որպես ենթադրությունների վրա հիմնված ճառ, որի հիմքում ընկած է սուտը: «Չի կարելի այսպես օրենքը դնել ու բռնաբարել»,- ասաց նա:

Ի.Սարգսյանն անհեթեթ համարեց, մասնավորապես, մեղադրանքի կողմից առաջ քաշվող՝ Թևոսի դիրքերը թուլացնելու նպատակով Արթուր Սաֆարյանի սպանության դրդապատճառը: Վիրավոր առյուծն ավելի վտանգավոր է դառնում, ասաց ամբաստանյալը և հավելեց՝ ինքն ինչու պետք է սպանել տար Արթուրին, նա իր համար հարազատ մարդ էր:

Հիշեցնենք, որ գործով մեղադրողը միջնորդել էր ամբաստանյալին մեղավոր ճանաչել մեղադրանքի ողջ ծավալով և նրան դատապարտել 25 տարվա ազատազրկման:

Աղբյուր` Փաստինֆո