Փաստ ինֆո

Բուքմեյքերական գրասենյակի աշխատակցի սպանության գործով դատական նիստում այսօր հարցաքննվեց գործով վկա, ընկերության իրավաբան Վ.Սաղաթելյանը:
Պաշտպանական կողմն առարկեց և միջնորդեց վերջինիս որպես վկա չհարցաքննել: Ըստ կողմի, վկան գործով տուժող «Գուդվին Բետ» ՍՊ ընկերության ներկայացուցիչն է եղել և որպես այդպիսին տիրապետում է գործի նյութերի մասին տեղեկատվությանը, ուստի չի կարող հանդես գալ որպես վկա:

Դատարանը պարզաբանեց, որ ավելի վաղ դատարանն որոշում է կայացրել, հիշյալ վկային որպես տուժողի ներկայացուցիչ վարույթից հեռացնելու մասին, քանի որ նա չի կարող երկու դատավարական կարգավիճակ ունենալ: Դատարանը որոշում է կայացրել Սաղաթելյանին հարցաքննել որպես վկա:

Դատարանը պարզաբանեց նաև, որ կողմը զրկված չէ, օրինակ, ապացույցն անթույլատրելի ճանաչելու միջնորդությամբ հանդես գալու հնարավորությունից:

Վկան իր հերթին հայտարարեց, որ ինքը ժամանակին քննիչին հայտարարել է, որ հրաժարվում է գործի նյութերին ծանոթանալ: Դատարանը նույնպես հաստատեց այս հայտարարությունը. գործի նյութերում առկա է գործի նյութերին ծանոթանալու Սաղաթելյանի հրաժարումը:

Վկան հայտնեց, որ դեպքի մասին ինքը տեղեկացել է լրատվամիջոցներից, ապա ընկերության հաշվապահական փաստաթղթերն ուսումնասիրելով՝ կարողացել է վերլուծել և իր նախաքննական ցուցմունքում հիմնավորել, թե ընկերությանն ինչի չափի վնաս է պատճառվել:

Դատարանում հրապարակվեցին նաև քրեակատարողական հիմնարկի նախկին աշխատակցի նախաքննական ցուցմունքները՝ վկան աշխատանքից ազատվել է ու մեկնել Հայաստանից, այդ պատճառով էլ դատարանը չի կարողացել նրա ներկայությունն ապահովել:

Վկան, ով նույնպես հաճախել է բուքմեյքերական գրասենյակ, հայտնել է, որ դեպքից մոտ երեք-չորս ամիս առաջ բուքմեյքերական գրասենյակ է սկսել հաճախել Կարեն անունով մի տղա՝ խոսքը գործով ամբաստանյալի մասին է:

Ըստ վկայի, ինքը հաճախակի նկատել է, որ Կարենը գումար չունենալու դեպքում պարտքով էր խաղում՝ գրասենյակի աշխատակից Արթուրը զանգահարում էր ղեկավարին, նրանից թույլտվություն հարցնում և Կարենի համար պարտքով խաղադրույք էր կատարում: Վկան նշել է, որ այդ հանգամանքից տեղյակ է, քանի որ իր համար էլ երկու անգամ պարտքով խաղադրույք է կատարվել:

Վկան տեսել է, թե ինչպես դեպքից ժամեր առաջ Կարենը եկել է գրասենյակ ու սկսել լոտո խաղալ, հենց սկզբից Կարենը լոտո խաղում էր պարտքով:
Ապա վկան տեսել է, թե ինչպես Արթուրը (գործով տուժողը) հրաժարվել է Կարենի համար խաղադրույքներ անել: Այդ ժամանակ նրանք նորմալ զրուցում էին իրար հետ, սակայն ընթացքում նրանց զրույցը վերածվեց լեզվակռվի և միմյանց հետ խոսում էին հայհոյանքներով: Այդ ժամանակ, ըստ վկայի, բացի Կարենից ու Արթուրից, բուքմեյքերական կետում միայն ինքն է եղել: Ժամը 20.30-ի սահմաններում Կարենը դուրս է եկել գրասենյակից, մոտ մեկուկես ժամ անց վերադարձել է ու գումար տվել Արթուրին: Դրանից հետո Կարենն ուզում էր կրկին լոտո խաղալ, բայց Արթուրը նրան մերժում էր և ասում, որ քսան հազար դրամ դեռ պարտք է մնացել նախկին պարտքից:

2015թ. դեկտեմբերի 24-ին ժամը 01:00-ի սահմաններում էր, երբ Արթուրը Կարենին ասում էր, որ իրեն մեքենայով տուն տանի: Երբ վկան դուրս է եկել գրասենյակից՝ Արթուրն այդ ժամանակ անջատում էր հեռուստացույցները, բուքմեյքերական կետում մնացել էին Արթուրն ու Կարենը:

Առավոտյան, երբ գնացել է աշխատանքի, հարևանն ասել է իրեն, որ ոստիկանությունից իրեն են հարցրել, ապա տեղեկացել է, որ գրասենյակի դիմաց բազմաթիվ ոստիկաններ են կանգնած: Խոսակցություններից վկան լսել է, որ Գուդվինի աշխատակցին են սպանել:

Հիշեցնենք, որ ըստ մեղադրանքի, Կարեն Շահինյանը 2015թ. դեկտեմբերի 24-ին ժամը 01:00-ի սահմաններում, գտնվելով Երևանի Մայիսի 9 փողոցի 49 հասցեում գործող «Գուդվին Բետ» ՍՊԸ-ին պատկանող բուքմեյքերական գրասենյակում, խաղադրույքներ է կատարել և պարտվելուց հետո շահադիտական դրդումներով, այն է` ՍՊ ընկերության գրասենյակում գտնվող չհրկիզվող պահարանից գումար հափշտակելու նպատակով սպանել է հիշյալ գրասենյակի աշխատակից Արթուր Նազարյանին:

Աղբյուր` Փաստինֆո