Փաստ ինֆո

2015 թ. հունվարի 29 -ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործի դատաքննությունը շարունակվում է: Այսօր Ավան և Նոր-Նորք վարչական շրջանների ընհանուր իրավասության դատարանում՝ դատավոր Դավիթ Հարությունյանի նախագահությամբ, հարցաքննվեց երկու վկա:

Դատարան հրավիրված վկաներն առաջի իսկ պահից պնդում էին, որ դեպքի մանրամասները չեն հիշում՝ խնդրելով հիմք ընդունել իրենց նախաքննական ցուցմունքները:

Դատարանը պարզաբանեց նրանց, թե որ դեպքում կարող են հիմք ընդունվել նախաքննական ցուցմունքները, ինչից հետմ նրանց հիշողությունը փոքր-ինչ վերականգվեց:

Վկա Վոլոդյա Ավետիսյանն ասաց՝ սպանություն է տեղի ունեցել. այդ օրը գիշերն ինքը քնած է եղել, իսկ հաջորդող առավոտյան օրվա պատասխանատուն հրահանգել է փնտրել Հայկազ Բարսեղյանին:

Ըստ վկայի՝ գործով ամբաստանվող երիտասարդներն էլ ինստիտուտում գերիշխող դիրք չեն ունեցել, նրանց մասնակցությամբ էլ վիճաբանություններ չի նկատել, ապա հավելեց՝ չի հիշում: Վկան ամբաստանյալներին դրական նկարագրեց՝  նրանց համարելով ընկերասեր: Իսկ սպանված Հայկազ Բարսեղյանին բնութագրեց որպես ֆիզիկապես ամուր երիտասարդ, ով լավ գիտելիքներ ուներ, սիրում էր մասնագիտությունը և պատրաստվում էր ծառայությունը շարունակել:

Վկայի ցուցմունքներում էական հակասություններ նկատեց մեղադրող կողմը՝ թե տուժողը, թե  մեղադրող դատախազը եւ նախաքննական ցուցմունքը հրապարակելու մասին  միջնորդությունը դատարանը բավարարեց:

Ի տարբերության դատարանում վկայի կողմից ամբաստանյալների դրական բնութագրին՝ նախաքննական ցուցմունքում պատկերը լրիվ այլ էր, Վաչե Սահակյանը հիշաչար, դյուրագրգիռ անձնավորություն է, Գնել Թևոսյանը՝ կամակոր, մեծամիտ, իր մեծամտության պատճառով դժվար թե մեկը գտնվեր, որ նրան սիրեր, նա իրեն բարձր էր դասում մյուսներից, ամբաստանյալ Նորիկ Սահակյանն էլ Գնելի հետ շփվելու արդյունքում  ևս մեծամտացել էր։ Ինչ վերաբերում է գործով ամբաստանյալ Մոսվսես Ազարյանին, ապա անիմաստ կատակել է,  խորամանկ եղել և նրան չեն սիրել:

Նախաքննական ցուցմունքում վկան Հայկազ Բարսեղյանին բնութագրել էր որպես ընկերասեր, կատակասեր, լավ տղա:

Ըստ վկայի նախաքննական ցուցմունքի՝ Հայկազը հաճախակի վիճաբանել է կուրսանտ Կարեն Բաղրամյանի հետ՝ վերջինիս փնթիության պատճառով:

Անդրադառնալով դրվագին, թե ամբաստանյալների կողմից ինստիտուտում այլ կուրսանտների նկատմամբ բռնություն է կիրառվել՝ վկան թեև դատարանում այդ մասին ոչինչ չէր ասել, սակայն նախաքննության ընթացքում հայտնել էր, որ կուրսանտ Տիգրան Մանասերյանի վրա վնասվաք է տեսել եւ հասկացել, որ Վաչեն է նրան հարվածել, իսկ երբ հարցրել է Մանասերյանին, թե ինչ է պատահել, վերջինս ասել է, որ «լավ, անցած լինի»:

Նախաքննական ցուցմունքում վկան հայտնել էր, որ Հայկազն ինքնասպանության մասին մտքեր չի արտահայտել, նա ուրախ անձնավորություն էր:

Անդրադառնալով այն դրվագին, որ Մովսես Ազարյանը կուրսանտներից գումար է հավաքել Վաչեի ծննդյան կապակցությամբ նվեր գելու համար՝ վկան ասաց, որ Մովսեսը չի ստիպել, որ գումար տան, սակայն վախեցել են և բոլորը տվել են՝ հետագայում խնդիրներ չունենալու համար:

Վկան նաև նշեց, որ երբ դեպքից հետո շարահրապարակում շարքով կանգնած լինելու ժամանակ կուրսանտ Գոռ Ասլանյանը պտտվել է, որպեսզի Հայկազին տեսնի կախված վիճակում, իսկ Գնել Թևոսյանը դիտողություն է արել մի քանի անգամ՝ ասելով, որ եթե չի ուզում Հայկազի կողքը հայտնի՝ չպտտվի:

Վկան իր նախաքննական ցուցմունքը լսելուց հետո պնդեց այն, իսկ Մովսես Ազարյանի հարցին, թե ինքը իրենից վախենալո՞վ է  գումարը տվել է՝ վկան վախենալը չհաստատեց, բայց նշեց, որ գումարը տվել է:

Վկա Գոռ Ասլանյանն էլ դատարանում հայտնեց, որ Հայկազի անկողինն արյունոտ տեսել է դեպքի օրն առավոտյան՝ միջանցքից, ննջարան չի մտել, իսկ երբ գնացել են Հայկազին փնտրելու մարախուղ է եղել, վատ տեսանելիություն, Հայկազին տեսել է 100-150 մետր հեռավորության վրա և չի մոտեցել պտտաձողին:

Իսկ երբ շարահրապարակում շարքի մեջ կանգնած է եղել, պտտվել է դեպի Հայկազի կողմը, որտեղ նա կախված է եղել եւ Գնել Թևոսյանը դիտողություն է արել՝ ասելով եթե ես ուզում այնտեղ հայտնվես մի շրջվի: 

Վկան հայտնեց , որ սպանված Հայկազ Բարսեղյանի հետ շփում չի եղել, սակայն հեռվից նկատել է, որ խելացի, հանգիստ տղա է:

Այս վկայի նախաքննական ցուցմունքները ևս հրապարակվեցին, ու նախաքննական ցուցմունքում ևս վկան հայտնել է, որ Գնելը իրեն դիտողություն է արել, ասելով «եթե մի անգամ էլ շրջվես քեզ կդնեմ Հայկազի կողքին»:

Նկարագրելով ամբաստանյալներին՝ վկան հայտնել էր, որ Վաչեն իրեն առաջնորդ էր պատկերացնում, Գնելը դաստիարակության պակաս ուներ, լկստված էր, Մովսեսը չար, Նորիկն ավելի հասուն էր, իսկ Հայկազը՝ ընկերասեր:

Նախաքննության ընթացքում վկան տեղեկություններ չէր հայտնել այն մասին, որ տեսել է Հայկազի անկողինն արյունոտ, իսկ պտտաձողի վրա Հայկազին կախված վիճակում տեսել է երեք մետրից:

Այս հեռավորության վերաբերյալ դատարանում վկան ասաց, որ այդքան մոտ չի գնացել Հայկազին, ինչ-որ բան սխալ է:

Երկու վկաներն էլ պնդեցին, որ նախաքննության ընթացքում իրենց վրա ճնշում չի գործադրվել և պնդեցին նախաքննական ցուցմունքը:

Հաջորդ՝ հոկտեմբերի 23-ին կայանալիք նիստին, կհարցաքննվեն գործով դատակոչված մյուս վկաները:

Աղբյուր` Փաստինֆո