Փաստ ինֆո

«Դիլիջան ազգային պարկ»-ում վագոն-տնակը հրկիզելու դեպքի գործով նախնական տվյալներ են ձեռք բերվել միջադեպին ներկա որոշ անձանց վերաբերյալ և անհատականացվում են նրանց գործողությունները: Այս մասին «Փաստինֆո»-ի լրագրողին հայտնեց ՀՀ քննչական կոմիտեի նախագահի խորհրդական Սոնա Տռուզյանը:

ՔԿ նախագահի խորհրդականը հավելեց, որ 3 անձ ներկայացվել է ճանաչման, սակայն «Դիլիջան ազգային պարկ»-ի աշխատակիցների կողմից չեն ճանաչվել որպես բռնություն գործադրած անձինք: Այսինքն՝ հաստատվել է, որ նրանք եղել են դեպքի վայրում, սակայն նշվել է, որ նրանք բռնի գործողություններ չեն իրականացրել:

Ս.Տռուզյանը հայտնեց նաև, որ ներկայումս կատարվում են ակտիվ քննչական գործողություններ «Դիլիջան ազգային պարկ»-ում հրդեհի առաջացման հանգամանքները պարզելու և դրան առնչություն ունեցող անձանց հստակեցնելու ուղղությամբ: Քննչական մարմնի կողմից նշանակվել են փորձաքննություններ հրդեհի առաջացման եղանակն ու օջախը պարզելու համար:

«Փաստինֆո»-ն ավելի վաղ տեղեկացրել է, որ ըստ Քննչական կոմիտեի լրատվական ծառայության հաղորդագրության, 2017 թվականի հոկտեմբերի 13-ին՝ ժամը 21:40-ին, «Պանտերա սիքյուրիթի» ՍՊ ընկերության Տավուշի մարզի պատասխանատու Ռ.Խանումյանից գրավոր հաղորդում է ստացվել առ այն, որ նույն օրը՝ ժամը 20:50-ի սահմաններում, մի խումբ անձինք հարձակվել են «Դիլիջան ազգային պարկ» ՊՈԱԿ-ի Շամախյան տեղամասում «Պանտերա սիքյուրիթի» ՍՊ ընկերության պահնորդական ծառայություն իրականացնող երկու աշխպատակիցների վրա, քաշքշել նրանց, որից հետո հրկիզել են ընկերությանը պատկանող անշարժ հենակետ հանդիսացող վագոն-տնակը և դիմել փախուստի:

Դեպքի առթիվ հարուցվել է քրեական գործ՝ ՀՀ քրեական օրենսգրքի 185-րդ հոդվածի 2-րդ մասի 1-ին կետով (Ուրիշի գույքը դիտավորությամբ ոչնչացնելը կամ վնասելը՝ հրկիզման, պայթյունի կամ հանրավտանգ այլ եղանակով):

Աղբյուր` Փաստինֆո