Փաստ ինֆո

ՀՀ Շիրակի մարզի առաջին ատյանի դատարանը՝ դատավոր Ա.Թադևոսյանի նախագահությամբ, արդարացրել է 19-ամյա Ալբերտ Մկրտչյանին` ՀՀ քրեական օրենսգրքի 268-րդ հոդվածի 1-ին մասով՝ առանց իրացնելու նպատակի թմրանյութերի ապօրինի շրջանառությունը, առաջադրված մեղադրանքում: Դատարանը ճանաչել ու հռչակել է Ա.Մկրտչյանի անմեղությունն այդ հոդվածով նախատեսված հանցանքի կատարման մեջ՝ մեղսագրված արարքում հանցակազմի բացակայության հիմքով։

Արդարացվածի նկատմամբ ընտրված «ստորագրություն չհեռանալու մասին» խափանման միջոցը վերացվել է:

Գործով իրեղեն ապացույց ճանաչված 0.41 գրամ քաշով «Մարիխուանա» տեսակի թմրամիջոցը, կաթոցիչը և կանաչ պլաստմասե դետալը պետք է ոչնչացվեն՝ դատավճռի օրինական ուժ ստանալուց հետո:

Ալբերտ Մկրտչյանին պարզաբանվել է արդարացվածի և նրան պատճառված /հնարավոր/ վնասի հատուցման իրավունքներն ու հատուցման կարգը` այդ մասին ուղարկելով համապատասխան ծանուցում։

Դատարանը հանգել է հետևության, որ ամբաստանյալ Ալբերտ Մկրտչյանին ՀՀ քրեական օրենսգրքի 268-րդ հոդվածի 1-ին մասով առաջադրված մեղադրանքը դատարանում չի ապացուցվել, սպառվել են նոր ապացույցներ ձեռք բերելու բոլոր հնարավորությունները, որպիսի պայմաններում նրա նկատմամբ անհրաժեշտ է կայացնել արդարացման դատավճիռ:

Դատարանն արձանագրել է, որ հիմնավոր կասկածից վեր ապացուցողական չափանիշով հնարավոր չէ հետևություն անել մեղադրանքի հիմնավորվածության և օրինականության վերաբերյալ, քանի որ սույն գործով Ա.Մկրտչյանի մոտից հայտնաբերվել է 0.52 գրամ քաշով «Մարիխուանա» տեսակի թմրամիջոց, որից օգտագործվել է 0.1 գրամը և մնացել է 0.42 գրամ: 2017 թվականի հունիսի 2-ի կրկնակի նյութագիտական և դատաբուսաբանական եզրակացության համաձայն՝ ներկայացված 0.42 գրամ բուսական զանգվածը կազմել է 0.44 գրամ և իր մեջ պարունակել է 6.82 % խոնավություն, որը հանդիսանում է 0.41 գրամ վերջնական քաշով, տնայնագործական եղանակով պատրաստված «Մարիխուանա» տեսակի թմրամիջոց:

Դատարանն արձանագրել է, որ ՀՀ քրեական օրենսգրքի «Թմրամիջոցների և հոգեմետ նյութերի զգալի, խոշոր և առանձնապես խոշոր չափերի» հավելվածում «Մարիխուանա» տեսակի թմրամիջոցի զգալի չափ է համարվում 0.5-5.0 գրամը:

Ուստի դատարանը գտել է, որ կշեռքների հնարավոր շեղումները պետք է մեկնաբանել հօգուտ ամբաստանյալի, որի դեպքում 0.475 գրամ «Մարիխուանա» տեսակի թմրամիջոցը ՀՀ քրեական օրենսգրքի 268-րդ հոդվածի 1-ին մասով նախատեսված արարքի հանցակազմ չի պարունակում, քանի որ այն զգալի չափ չի համարվում:

Այնուամենայնիվ, եթե վերցնենք սկզբնական զանգվածի քաշը՝ 0.52 գրամը և դրանից հանենք կշեռքի հնարավոր շեղումը, այն չի գերազանցում 0.5 գրամը և կազմում է 0.49 գրամ, որը նույնպես զգալի չափ չի համարվում, նշվում է դատարանի իրավական վերլուծության մեջ:

Քրեադատավարական նորմերի, ինչպես նաև ՀՀ վճռաբեկ դատարանի նախադեպային իրավունքի համատեքստում գնահատելով քրեական գործով ձեռք բերված և դատական քննության ընթացքում հետազոտված ապացույցները՝ դատարանը հարկ է համարել արձանագրել, որ այդպիսիք բավարար չեն ամբաստանյալ Ալբերտ Մկրտչյանի անմեղության կանխավարկածը հաղթահարելու և հիմնավոր կասկածից վեր ապացուցողական չափանիշին համապատասխան հաստատված համարելու, որ նա կատարել է իրեն վերագրվող` ՀՀ քրեական օրենսգրքի 268-րդ հոդվածի 1-ին մասով նախատեսված հանցավոր արարք:

Այսպիսով, ստուգելով ամբաստանյալ Ալբերտ Մկրտչյանի կողմից ՀՀ քրեական օրենսգրքի 268-րդ հոդվածի 1-ին մասով նախատեսված հանցագործություն կատարելու վերաբերյալ գործով ձեռք բերված ապացույցները դրանց վերլուծության, այլ ապացույցների հետ համադրելու միջոցով, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով` դատարանը գտել է, որ Ալբերտ Մկրտչյանին ՀՀ քրեական օրենսգրքի 268-րդ հոդվածի 1-ին մասով առաջադրված մեղադրանքը հիմնավորող բավարար ապացույցներ առկա չեն, ինչի կապակցությամբ պետք է ճանաչել և հռչակել ամբաստանյալի անմեղությունը ՀՀ քրեական օրենսգրքի 268-րդ հոդվածի 1-ին մասով մեղսագրված հանցանքի կատարման մեջ՝ հանցակազմի բացակայության հիմքով և կայացնել արդարացման դատավճիռ:

Աղբյուր` Փաստինֆո