Փաստ ինֆո

ԱՄՆ նախագահ Դոնալդ Թրամփը կարգադրություն է անելու պատժամիջոցներ մտցնել Իսլամական հեղափոխության պահապանների իրանական կորպուսի դեմ նրանց կողմից ահաբեկչությանն աջակցելու համար: Ըստ ՌԻԱ Նովոստիի, այս մասին լրագրողներին հայտարարել է պետքարտուղար Ռեքս Թիլլերսոնը:

Դրանք կլինեն անհատական պատժամիջոցներ ֆիզիկական անձանց, և, հնարավոր է, կազմակերպությունների դեմ, որոնք լրիվ կամ մասամբ պատկանում են Կորպուսին և որոնք ուղղակիորեն աջակցում են նրանց ահաբեկչական ակտիվությանը՝ ներառյալ զենքի և դրա բաղադրիչների արտահանում կամ կիբերակտիվություն, ասել է Թիլլերսոնը:

Պետքարտուղարը հավելել է, որ ԱՄՆ-ն անց է կացնում քննարկումներ եվրոպական և այլ գործընկերների հետ՝ ստանալու համար նրանց համաձայնությունը նրանց կողմից էլ սանկցիաներ մտցնելու շուրջ:

Վաշինգտոնում համոզված են, որ այդ միջոցներից և ոչ մեկը չի խախտում ԱՄՆ պարտավորությունները իրանական միջուկային ծրագրի հարցով Համատեղ համապարփակ գործողությունների պլանի շրջանակում, քանի որ, ըստ Թիլլերսոնի, պատժամիջոցները կապված չեն միջուկային գործունեության հետ:

«Ինչ վերաբերվում է օտարերկրյա ահաբեկչական կազմակերպությունների ցանկ Կորպուսը ներառելուն, մենք քննարկել ենք դա: Սակայն կան որոշակի ռիսկեր ու բարդություններ երկրի ամբողջ բանակը որպես ահաբեկիչներ որակելու հարցում»,- ասել է պետքարտուղարը՝ նշելով, որ դա կարող է «մեր ռազմական գործողությունների ոչ լավագույն շահերից» լինել:

Ավելի վաղ Կորպուսի ղեկավար Մոհամմադ Ալի Ջաֆարին հայտարարել է, որ եթե ԱՄՆ-ն Իրանի դեմ նոր պատժամիջոցներ մտցնի, դա գործնականում կնշանակի միջուկային ծրագրի հարցով համաձայնագրից Վաշինգտոնի դուրս գալը և կհանգեցնի նրան, որ «ընդմիշտ կանհետանա երկու երկրների փոխգործակցության հետագա հնարավորությունը»:

Աղբյուր` Փաստինֆո