Փաստ ինֆո

Մարաշի զինված խմբի գործով այսօրվա դատական նիստը հետաձգվեց գործով ամբաստանյալ, ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանի վատ ինքնազգացողության պատճառով:

Դատարանի կանչով ժամանած շտապօգնությունը եզրակացրել էր, որ ամբաստանյալը ողնաշարի ու գոտկային շրջանում ցավեր ունի, որոնք ամբաստանյալի՝ սայլակի հետ միասին աստիճաններից վայր ընկնելու հետևանք են: Ի դեպ, շտապ օգնություն կանչելու համար ընդմիջված դատական նիստը վերսկսելուց հետո Վահան Շիրխանյանը դատական նիստերի դահլիճում չէր:

Դատարանը, հաշվի առնելով, որ նման պայմաններում դատական նիստը չի կարող շարունակվել, մեկ շաբաթով հետաձգեց դատական նիստը:

Մինչ դատական նիստի հետաձգումը՝ ամբաստանյալ Հարություն Սարիբեկյանը հայտարարեց, որ անցյալ հինգշաբթի օրվանից գտնվում է հացադուլի մեջ: Ըստ ամբաստանյալի, ինքը վճռականորեն է տրամադրված, առողջական խնդիրների հետ կապված պահանջում է փոխել իր խափանման միջոցը:

Դատարանը նշեց, որ եթե ամբաստանյալի առողջական վիճակի վատթարացման մասին փաստաթղթեր ներկայացվեն դատարանին, ապա ամբաստանյալի միջնորդությունը դատարանը քննության կառնի: Ի պատասխան ամբաստանյալը հայտարարեց՝ «իմ մաշկի վրա եմ զգում»:

Հ.Սարիբեկյանի պաշտպան Ռուզաննա Սիրեկանյանը լրագրողների հետ զրույցում նշեց, որ ավելի վաղ դատարանը մերժել էր կալանավորումը փոխելու՝ իրենց միջնորդությունը: Մերժվել էր անգամ կալանավորումը գրավով փոխարինելու պաշտպանական կողմի միջնորդությունը:

«Հիմա իմ պաշտպանյալին այլ տարբերակ չի մնում, քան հասնել խափանման միջոցի փոփոխությանը՝ հացադուլի միջոցով»,- ասաց պաշտպանը՝ հավելելով, որ ազատամարտիկ Հարություն Սարիբեկյանը մասնակցել է ՀՀ և ԼՂՀ սահմանների պաշտպանությանը, ստացել բեկորային վնասվածքներ գլխի մասում, բազմաթիվ հիվանդություններով է տառապում՝ շաքարախտ, խպիպ, արյան բարձր ճնշում:

Իսկ ամբաստանյալ Էդվարդ Ներսիսյանի պաշտպան Կարմեն Պողոսյանը լրագրողների հետ զրույցում հայտնեց, որ իրենք դիմել էին դատարանին՝ խնդրելով, որպեսզի միջգերատեսչական հանձնաժողովի կողմից փորձաքննություն իրականացվի՝ խափանման միջոցը առողջության հետ կապված փոխելու նպատակով:

Փաստաբանն իր վստահորդից տեղեկացել է, որ հոկտեմբերի 2-ին միջգերատեսչական հանձնաժողովը դիմել է դատարանին, որ ամբաստանյալին միջգերատեսչական հանձնաժողովին ներկայացնելու համար անհրաժեշտ է կատարել մի շարք նեղ մասնագիտական հետազոտություններ՝ դրանց կատարումը հանձնարարելով Սբ Գրիգոր Լուսավորիչ բժշկական կենտրոնին:

Դատարանի կողմից գրություն է նախապատրաստվել, հասցեագրվել ուղեկցող գումարտակին և Դատապարտյալների հիվանդանոց քրեակատարողական հիմնարկի պետին:

Այսօրվա դատական նիստում՝ ի պատասխան փաստաբանի հարցի, դատարանը հայտնեց, որ Սբ Գրիգոր Լուսավորիչ հիվանդանոցից հայտնել են, որ իրենք հիվանդ ընդունելու տեղ չունեն: Նման պայմաններում, նշեց Կարմեն Պողոսյանը, ինքը հաջորդ դատական նիստում հանդես կգա խափանման միջոցը փոխելու միջնորդությամբ:

Պաշտպանը նշեց նաև, որ իր պաշտպանյալի առողջական վիճակը մնում է նույնը, ինչ եղել է հետկաթվածային վերականգնողական շրջանում, փոփոխություններ չկան, ուղղակի նա պահվում է բժիշկների մշտական հսկողության տակ:

Լուսանկարը՝ Azatutyun.am-ի

Աղբյուր` Փաստինֆո