Փաստ ինֆո

Քրեական հեղինակություն համարվող Թեւոսիկի եղբոր՝ Արթուր Սաֆարյանի սպանության գործով այսօր դատախազը երկրորդ անգամ հանդես եկավ մեղադրական ճառով՝ միջնորդելով ամբաստանյալ Իսրայել Սարգսյանին դատապարտել 25 տարվա ազատազրկման։ Նույնպիսի պատիժ դատախազը միջնորդել էր նաեւ առաջին մեղադրական ճառի ժամանակ։

Ըստ մեղադրողի՝ Արթուր Սաֆարյանի սպանությունը կազմակերպելու եւ դա թաքցնելու նպատակով սպանությունն իրականացրած անձին սպանելու համար ամբաստանյալին առաջադրված մեղադրանքները հիմնավոր են։ Մեղադրողն ընդգծեց, որ խոսքը գնում է  ծանրացուցիչ հանգամանքներում կատարված հանցագործության մասին, որը նախատեսում է ընդհուպ մինչեւ ցմահ ազատազրկում։

Այսօր պաշտպանական կողմը չհասցրեց հանդես գալ պաշտպանական ճառերով. ռեպլիկի ու ճառերի իրավունքից կօգտվի հաջորդ դատական նիստում։ Իսրայել Սարգսյանը միայն հայտարարեց, որ դեռ վերջնական չի որոշել, թե ինչ ֆորմատով կխոսի՝ հանդես կգա վերջին խոսքով, թե ճառով, բայց ելույթ հաստատ կունենա, որովհետեւ «այս ամեն ինչը պետք է մերկացնել»։

Հիշեցնենք, որ այս քրեական գործով մեկ անգամ արդեն հայտարարվել էր դատաքննության ավարտի մասին եւ դատարանը հեռացել էր խորհրդակցական սենյակ, սակայն վերադառնալով Երևանի Կենտրոն և Նորք-Մարաշ վարչական շրջանների դատարանը՝ դատավոր Արմեն Բեկթաշյանի նախագահությամբ, հունիսի 22-ին որոշեց վերսկսկել աղմկահարույց գործով դատաքննությունը՝անհրաժեշտ համարելով հարցաքննել փորձագետներին։

Իսրայել Սարգսյանին նախաքննական մարմինը մեղադրանք է առաջադրել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ Արթուր Սաֆարյանի՝ պատվերով սպանության, 104-րդ հոդվածի 2-րդ մասի 11-րդ կետով՝ այլ հանցանքը թաքցնելու նպատակով կատարված Մովսես Ներսիսյանի սպանության, 235-րդ հոդվածի 1-ին մասով՝ ապօրինի կերպով զենք, ռազմամթերք ձեռք բերելու, պահելու համար։

Աղբյուր` Փաստինֆո