Փաստ ինֆո

Կարմիր գրքում գրանցված սպիտակագլուխ անգղերի որս կատարելու կասկածանքով, գործով վարույթն իրականացրած մարմնի հրավերով, Շենավանի համայնքապետ Արթուր Մկրտչյանը բացատրություն է տվել՝ հայտնելով, որ նկարները կատարվել են 2007 թվականին, իսկ համացանցում տեղադրվել է 6-7 տարի առաջ:

Այդ մասին «Փաստինֆո»-ի թղթակցի հետ զրույցում ասաց Արթուր Մկրտչյանը՝ պնդելով, որ սպիտակագլուխ անգղերին ինքը չի որսացել, ավելին դեպքը բացահայտվել է և իրավապահներին հայտնի է, թե ով է որսի հեղինակը:

Հիշեցնենք, որ հոկտեմբերի 6-ին Ոստիկանությունը պաշտոնական հաղորդագրությամբ էր հանդես եկել հայտնելով, որ 2007թ. Արմավիրի մարզում անգղերի ապօրինի որսը կատարել է 1972 թ. ծնված Յուրա Պողոսյանը: Միևնույն ժամանակ ոստիկանությունից նաև հայտնել են, որ կատարվում է հետաքննություն:

Ներկայացնելով տեղի ունեցածըч Մկրտչյանը հայտնեց, որ ճանապարհով գնալիս են եղել նկատել են կանգնած մեքենաներ, իսկ երբ մոտեցել են՝ գետնին սպանված անգղերին են տեսել: Ըստ Մկրտչյանի՝ հավաքվածները նկարվել են անգղերի հետ՝ իրենք ևս: Այդ օրվանից հետո մի քանի տարի անց այդ նկարները տեղադրել են համացանցում:

Հարցին, թե ինչո՞ւ այդքան տարի որևէ հետաքրքրություն չառաջացրած լուսանկարներն ու որսի փաստը այսօր մեծ աղմուկ բարձրացրեցին՝ Մկրտչյանը դժվարացավ անուն նշել, սակայն պնդեց, որ անգղերին ինքը չի որսացել:

Ըստ նրա՝ Արմավիրի մարզում չկան այդպիսի թռչուններ, իսկ այն որ լրատվամիջոցների հետ զրույցում ասել է, որ Թուրքիայի սարերի վրա է նկատել այդպիսի թռչուններ՝ ներկայացվել է ուռճացված, թեև որևէ կապ չունի, թե որ կողմից են եկել անգղերը:

Նկարներում երևացող ավտոմեքենան էլ 2007թ. վաճառել է, գնորդն անգամ այդ մասին ցուցմունք է տվել գործի շրջանակներում:

Հիշեցնենք, որ հոկտեմբերի 4-ին «Econews.am» լրատվական կայքում տեղադրվել էր «Ահազանգ. որսացել են Կարմիր գրքում գրանցված սպիտակագլուխ անգղեր» հոդվածը, որտեղ առկա էին նաև որս կատարողների նկարներ՝ անգղերը ձեռքներին:

Ոստիկանության լրատվական ծառայությունն էլ տեղեկացրել էր, որ պարզվել է նշված երեք անձանցից երկուսի ինքնությունը՝ Ա. Մկրտչյան և Յ. Պողոսյան: Այս հրապարակումից հետո էլ պաշտոնապես հայտնի դարձավ, որ որսը կատարել է 1972 թ. ծնված Յ. Պողոսյանը:

Անձի անմեղության կանխավարկածը հաշվի առնելով ընդամենը նշենք, որ Յ.Պողոսյանի կողմից հանցագործության կատարումը որպես հաստատված փաստ ներկայացրել էր Ոստիկանությունը:
Ըստ մեր տեղեկությունների՝ որևէ մեկի մեղադրանք չի առաջադրվել:

Աղբյուր` Փաստինֆո