Փաստ ինֆո

«Օրենքով գող» Զախարի Կալաշովը՝ Շաքրո Մոլոդոյ մակամվամբ, պաշտոնապես ճանաչվել է ռուսաստանյան քրեական աշխարհի առաջնորդը, ինչի մասին հաղորդել է Գլխավոր դատախազությունը Մոսկվայի Նիկուլինսկի դատարանում:

Այդ դատարանում նախօրեին սկսվել է Շաքրոյի և նրա 13 հանցակիցների վերաբերյալ շորթման գործի քննությունը:

Կալաշովը գլխավորել է ոչ մշտական կազմով բազմամակարդակ հանցավոր կառույցը, որը նրան ու նրա մերձավոր շրջապատին զգալի եկամուտ էր բերում շորթման ու ռեյդերության հաշվին, բխում է պետական մեղադրանքի դիրքորոշումից:

Այսպես, Ռոչդելսկու փոխհրաձգությունը ոչ թե ռեստորանատեր Ժաննա Կիմի և Ֆաթիմա Միսիկովայի կոնֆլիկտի արդյունք է, ինչպես ավելի վաղ պնդում էին ԶԼՄ աղբյուրները, այլ հենց Շաքրոյի ռեյդերական հավակնությունների արդյունք է, համարում են դատախազությունում:

Ամբաստանյալներն, այդ թվում և՝ Կալաշովը, հրաժարվել են իրենց մեղավոր ճանաչել: Շաքրո Մոլոդոյի աջ ձեռքը՝ Անդրեյ Կոչույկովը (Իտալյանեց) մեղքն ընդունելու մասին դատավորի հարցին պատասխանել է. «Դա նույնն է, ինչ փոխել սեռական կողմնորոշումը»:

Նիկուլինսկի դատարանի ամենաընդարձակ սրահը երեքշաբթի ամբողջությամբ լցրել էին մռայլ տեսքով մի քանի տասնյակ տղամարդիկ: Պրիստավներին նրանք ներկայացել էին որպես ամբաստանյալների ազգականներ. «Մենք եղբայրներն ենք»,- պարզաբանել են ունկնդիրները: Նրանցից մեկը նիստից առաջ կանգնել էր դռների մոտ և սկսել էր ցուցումներ տալ մամուլին: «Շատ տեղ չզբաղեցնե՛լ: Ով կլուսանկարի, իրերով դո՛ւրս կգա», - ասում էր կաշվե վերարկուով կարճ խուզած սանրվածքով մարդը: Նրա կողքին կանգնած պրիստավը քաղաքացու վարքագծին որևէ կերպ չէր արձագանքում, միայն շվարած ժպտում էր:

Ամբաստանյալի աթոռին 14 մարդ է, ովքեր մեղադրվում են բռնություն գործադրելով կազմակերպված խմբի կազմում շորթում կատարելու մեջ, ընթերցեց մեղադրական եզրակացությունը դատախազը: «2013թ. Ասլան Ուսոյանի մահվանից հետո, ով ուներ Դեդ Հասան մականունը և Ռուսաստանի հանցավոր հիերարխիայում բարձրագույն դիրք էր զբաղեցնում, Կալաշովը դարձել է ռուսաստանյան քրեական աշխարհի առաջնորդը: Իր կարգավիճակին համապատասխան՝ նա իր հովանավորության ներքո համախմբում էր անձանց, ովքեր պրոֆեսիոնալ կերպով զբաղվում էին հանցավոր գործունեությամբ, և նրանց ծանր և առանձնապես ծանր հանցագործություններ կատարելու ցուցումներ էր տալիս», - պատմել է պետական մեղադրողը: Իր հովանավորության դիմաց Շաքրոն ստանում էր եկամուտների մի մասը, հավելել է նա:

Աղբյուր` Փաստինֆո