Փաստ ինֆո

«Լիա» գեղեցկության սրահում «ռազբորկայի» և  սպանության գործով այսօրվա դատական նիստում ամբաստանյալ Պետրոս Իսրայելյանի պաշտպան Միհրան Պողոսյանը ներկայացրեց մեղադրողին բացարկի հիմքերը: Միաժամանակ պաշտպանը նշեց, որ այս պահին բացարկ չի ներկայացնում:

Ըստ պաշտպանի, ի սկզբանե գործով քննությունն անց է կացվել բազմաթիվ դատավարական խախտումներով, որոնց վրա ուշադրություն չի դարձրել հսկող դատախազը՝ գործով մեղադրող Գևորգ Գևորգյանը: Ավելին, ըստ պաշտպանի, դատախազն ընդհանրապես ուշադրություն չի դարձրել գործի օբյեկտիվ քննության վրա:

Մ.Պողոսյանը նշեց, որ սկզբնապես անհիմն ձերբակալվել էր իր պաշտպանյալի կինը, և միայն երկու օր անց էր վարույթն իրականացնող մարմինը պարզել, որ նա Պետրոս Իսրայելյանի կինն է և նրան ազատ էր արձակել: Որևէ փաստական տվյալ չունենալով՝ ձերբակալվել էր նաև ընտանիքի երրորդ անդամը՝ ամբաստանյալի որդին, սակայն դատարանը ոչ իրավաչափ էր ճանաչել նրա ձերբակալությունը:

Ելնելով դրանից՝ պաշտպանը եզրահանգեց. տպավորություն է ստեղծվում, որ դատախազը կանխակալ, ոչ օբյեկտիվ վերաբերմունք ունի Իսրայելյանների ընտանիքի հանդեպ: Պաշտպանը որպես բացարկի հիմք նշեց նաև, որ ամբաստանյալի կնոջ սեփականությունը հանդիսացող գեղեցկության սրահը՝ դեպքի վայրը, նախաքննության ավարտից հետո էլ արգելանքի տակ է, ինչի հետևանքով անձը զրկվում է իր սեփականությունը տնօրինելու իրավունքից:

Ամբաստանյալ Ալիկ Բանդուրյանի պաշտպան Երեմ Սարգսյանն իր հերթին միջնորդեց 11 ամիս կալանքի տակ գտնվող իր պաշտպանյալի կալանավորումը վերացնել, անազատության հետ չկապված խափանման միջոց ընտրել կամ ճանաչել գրավ կիրառելու թույլատրելիությունը: Պաշտպանն ընդգծեց, որ սկզբնապես Ալիկ Բանդուրյանը մեղադրվում էր ՀՀ քրեական օրենսգրքի 38-104-րդ հոդվածի 1-ին մասով՝ սպանությանը հանցակցելու մեջ, սակայն հետագայում մեղադրանքը փոփոխվել էր և նրան մեղադրանք էր առաջադրվել ՀՀ քրեական օրենսգրքի 38-112-րդ հոդվածի 2-րդ մասի 6-րդ կետով՝ մի խումբ անձանց կամ կազմակերպված խմբի կողմից դիտավորությամբ առողջությանը ծանր վնաս պատճառելուն հանցակցելը:

Երեմ Սարգսյանը դատարանի ուշադրությունը հրավիրեց ամբաստանյալի առողջական լուրջ խնդիրների՝ սրտի, շաքարային դիաբետի, ողնաշարի տուբերկուլյոզ և այլն, վրա: Նշվեց, որ ամբաստանյալն ունի տեղաշարժվելու խնդիր: Ի դեպ, ամբաստանյալը դատարանի դահլիճ բերվեց հաշմանդամի սայլակով:

Պաշտպանը նշեց նաև, որ ի պատասխան իր հարցման՝ Տուբերկուլյոզի դեմ պայքարի ազգային կենտրոնից հայտնել են, որ ամբաստանյալը պետք է բուժում ստանա Կենտրոնում և գտնվի խիստ անկողնային ռեժիմի վիճակում:

Մեղադրող կողմն առարկեց միջնորդության դեմ՝ նշելով, որ ազատության մեջ հայտնվելով ամբաստանյալը կարող է անօրինական ներգործության ենթարկել այլ անձանց՝ ականատես վկաներին: Արդեն իսկ, ըստ մեղադրողի, ամբաստանյալը փորձել է ներգործել ամբաստանյալ Պետրոս Իսրայելյանի և նրա միջոցով՝ ականատեսների վրա:

Դատարանը մերժեց միջնորդությունը:

Պաշտպանական կողմը միջնորդեց նաև վերացնել Ալիկ Բանդուրյանի նկատմամբ կիրառված տեսակցությունների, հեռախոսազրույցների և նամակագրության սահմանափակումները՝ ամբաստանյալը չունի միայն անչափահաս որդու հետ տեսակցելու արգելք:

Նույնաբովանդակ միջնորդություն ներկայացրեց նաև ամբաստանյալ Պետրոս Իսրայելյանի պաշտպան Միհրան Պողոսյանը: Դատարանը միջնորդություններին լուծում կտա արդեն հաջորդ դատական նիստում:

Աղբյուր` Փաստինֆո