Փաստ ինֆո

ՊԲ նախկին հրամանատար Սամվել Բաբայանի և մյուսների գործով այսօր դատարանն անցավ փողերի լվացման դրվագով ամբաստանյալների հարցաքննությանը:

Դատարանը, նախագահությամբ Արշակ Վարդանյանի, հրապարակեց քրեական գործով անցնող 4 ամբաստանյալի նախաքննական ցուցմունքները, քանի որ նրանք հրաժարվեցին դատարանում ցուցմունք տալուց, պնդեցին նախաքննական ցուցմունքները:

Ուստիև՝ նման պայմաններում մեղադրող դատախազ Արամ Արամյանը միջնորդեց հրապարակել ամբաստանյալների նախաքննական ցուցմունքները:

Այսպես՝ փողերի լվացման դրվագով անցնող ամբաստանյալ Ժորա Զաքարյանն առաջադրված մեղադրանքում իրեն մեղավոր է ճանաչել և նախաքննություն ընթացքում ցուցմունք տալով՝ հայտնել է, որ գործով ամբաստանյալ Անդրանիկ Քոչարյանն իրեն ներկոտված 20 եվրո թղթադրամ է տվել՝ խնդրելով փորձել մաքրել թղթադրամի վրա եղած ներկի բծերը: Զաքարյանն էլ փորձել է մաքրել եղունգների ներկը մաքրելու նյութով, լաքաները մաքրվել են, սակայն հետքեր են մնացել: 20 Եվրոն Զաքարյանը վերադարձրել է Քոչարյանին, որից հետո վերջինս իրեն է փոխանցել ևս 2 հատ 20 եվրո և մեկ հատ 50 եվրո թղթադրամ, այս անգամ էլ Զաքարյանն ասել է, որ իրեն նյութեր է հարկավոր գնել, որի համար 5000 դրամ է ուզել, սակայն մաքրման եղանակը չի հայտնել՝ մտածելով,  որ կարող է Քոչարյանն ինքնուրույն  անել:

Իսկ գումարները Սամվել Բաբայանի հետ որևէ կերպ առնչվում են հարցին, Զաքարյանը պատասխանել է, որ նման տեղեկություն չունի:

Թե թղթադրամները, որը իրեն փոխանցել էր Քոչարյանը, որտեղից են ձեռք բերվել, Զաքարյանն ասել է, որ Քոչարյանն իրեն չի ասել թե որտեղից, բայց ինքը կարծել է, որ հանցավոր բնույթ ունեն:

Հրապարակված ցուցմունքի հետ մեղադրողը հարց ուղղեց Զաքարյանին, որն առնչվում էր Զաքարյանի տանից հայտնաբերված, ապացույց ճանաչված և դատարանում հետազոտված նյութերին, որոնք նախատեսված են եղել այդ թղթադրամների վրայից ներկը մաքրելու նպատակով: Ապացույցների հետազոտման ժամանակ Զաքարյանը հայտարարեց, որ դրանք իրեն չեն պատկանում, իսկ այսօր մեղադրողի հարցին պատասխանեց, որ իրեն են, և որ միայն մի տարան է ուրիշ, «թե չէ հո ուրիշ բան չէին բերելու դատարան»:

Հաջորդիվ հրապարակվեց ամբաստանյալ Անդրանիկ Քոչարյանի նախաքննական ցուցմունքը, վերջինս իրեն մասնակի է մեղավոր ճանաչել և հայտնել է, որ եղբայրը՝ Կարեն Քոչարյանը,  իրեն է տվել 20 եվրո և հարցրել է, թե կարող է օգնել դրա վրա առկա ներկը մաքրելու գործում, ինքն էլ որոշել է  դիմել համագյուղացի,  քիմիկ  Ժոռային: Մաքրելուց հետո Ժոռան իրեն է վերադարձրել թղթադրամը,  ինքն էլ իր հերթին՝ փոխանցել է եղբորը: Այդ ամենից հետո եղբայրը իրեն է  տվել ևս 2 հատ 20 եվրո և մեկ հատ 50 եվրո թղթադրամ՝  կրկին ներկոտված, այս անգամ Ժոռան իրեն ասել է, որ չի մաքրվում դրա վրա հետքերը միևնույն ժամանակ ասել է, որ նյութեր պետք է գնի և ևս մի քիմիական նյութ է խնդրել:

Անդրանիկ Քոչարյանը նախաքննության ընթացքում հայտնել էր նաև, որ Ժոռային այդ թղթադրամի վրայի հետքը մաքրելու համար գումար չի տվել, միայն մեկ անգամ 5000 դրամ է

Անդրանիկ Քոչարյանի եղբայր Կարեն Քոչարյանն էլ իր նախաքննական ցուցմունքում հայտնել էր, որ այդ 20 եվրո թղթադրամն իրեն է փոխանցել Սամվել Բաբայանը՝ ասելով, որ փոխանակման կետերում այն կփոխանակեն, թե ոչ, ինքն էլ փորձել է պարզել, սակայն իրեն տարադրամի փոխանակման կետում ասել են, որ գումարը կեղծ չի, բայց քանի որ մաշված է և ներկոտված, չեն փոխանակել:

Այդ մասի Քոչարյանը տեղեկացրել է Բաբայանին, որից հետո հիշել է իրենց համագյուղացի Ժորային և եղբորը՝ Անդրանիկին, խնդրել, որ դիմի նրան այդ հարցով:

Իսկ երբ առաջին 20 եվրո թղթադրամը մաքրված իրեն է փոխանցել եղբայրը՝ Անդրանիկը, կարենը գտել է, որ այն այնքան էլ մաքրված չի եղել, փոխանցել է այդ գումարը Սամվել Բաբայանին, և վերջինս ևս 3 թղթադրամ է նման վիճակում իրեն տվել:

Միևնույն ժամանակ, ըստ Կարեն Քոչարյանի նախաքննական ցուցմունքի, Ս.Բաբայանն իրեն ասել է, որ 5000 դոլար կա, ՌԴ-ից պետք է ուղարկեն և խնդրել է օգնել իրեն մարդ գտնել, ում հետ կարող են ուղարկել այդ գումարը:

Այդ գումարի փոխանցման հարցում էլ Կարենը դիմել է իր հարևան Դավիթին՝ հայտնելով նրան, որ գումարները կեղծ չեն, ով էլ իր ծանոթ՝ բեռնափոխադրում կատարող մի ընկերոջ է դիմել:

Ըստ նախնական պայմանավորվածության՝ այդ 5000 եվրո թղթադրամների վրա առկա ներկի հետքերը պետք է մաքրեր Ժորան:

Նախաքննության ընթացքում Կարեն Քոչարյանն իրեն մասնակի էր մեղավոր ճանաչել:

Ինչ վերաբերում է ամբաստանյալ Դավիթ Հարությունյանին, ապա վերջինս էլ իրեն մեղավոր չէր ճանաչել առաջադրված մեղադրանքում և նախաքննության ընթացքում հայտնել էր, որ իր հարևան Կարենը հարցրել է՝ հնարավո՞ր է թղթադրամի վրայից մաքրել ներկը, ինքն էլ իր հերթին վերցրել է այս 20 եվրոն և ցույց տվել մի քանի ընկերների, սակայն ընկներներն իրեն ասել են, որ հնարավոր չի, և ինքն էլ գումարը վերադարձրել է Կարենին:

Այդ ամենից հետո Կարենն իրեն ասել է, որ գումար կա ՌԴ-ից եկող կարող է օգնել տեղափոխման հարցում, և որ իր համար լավ կլինի, ինքն էլ դիմել է իր ծանոթին, երբ գումարը բերել է Հայաստան ու ծրարով իրեն փոխանցվել, ինքն անգամ չի հասցրել Կարենին փոխանցել քանի որ ԱԱԾ-ն այդ պահին իրեն բռնել են:

Ըստ Դավիթ Հարությունյանի նախաքննական ցուցմունքի՝ Կարենը իրեն ասել է կեղտոտ փողեր են ինքն էլ  մտածել է որ գողացված են:

Ծրարով իրեն փոխանցված 5000 դոլարը ինքը տեսել է ԱԱԾ-ում:

Բացի այդ, Հարությունյանը նաև հայտնել է, որ Կարենն իրեն ասել է, որ կարողանան այդ գումարները իրացնել, ՌԴ-ից նորից կուղարկեն:

Հաջորդ դատական նիստում կհարցաքննվեն Սամվել Բաբայանը, Սանասար Գաբրիելյանը և Արմեն Պողոսյանը:

Նշենք նաև, որ Արմեն Պողոսյանի պաշտպան Վիկտորիա Կիրակոսյանն այսօրվա դատական նիստին բացակայում էր: Պաշտպանը  հեռախոսազանգի միջոցով դատարանին տեղեկացրել էր, որ անձնական խնդիրների պատճառով չի կարող ներկա գտնվել նիստին, սակայն Պողոսյանը չառարկեց իր պաշտպանի բացակայությամբ նիստն անցկացնելուն:

Աղբյուր` Փաստինֆո