Փաստ ինֆո

Հայ անվանի ֆուտբոլիստ Կարեն Դոխոյանը ղազախական «Sports.kz»-ին տված հարցազրույցում կիսվել է ԱԱ-2018-ի ընտրական փուլի` Ղազախստան-Հայաստան խաղից ունեցած սպասելիքներով:

Ժամանակին Դոխոյանը Հայաստանի հավաքականի կազմում գրեթե 50 հանդիպում է անցկացրել, այդ թվում` Ղազախստանի ընտրանու դեմ, իսկ այսօր հանդիսանում է ֆուտբոլային «Legal Sport» գործակալության գործադիր տնօրենը:

- Հայաստանի հավաքականի համար առաջիկա խաղը որքանո՞վ է սկզբունքային:

- Ըստ իս, այն, իհարկե, սկզբունքային կլինի, քանի որ ընտրական փուլի վերջին խաղն է: Ես հասկանում եմ, թե մեր թիմի համար հիմա որքան դժվար է, բայց պետք է հավաքվել և արժանի խաղ ցուցադրել:

- Ըստ Ձեր մասնագիտական կարծիքի` ի՞նչ տեղի ունեցավ հայկական թիմի հետ Լեհաստանի հետ վերջին խաղում:

- Դժվարանում եմ պատասխանել այս հարցին, քանի որ չեմ գտնվում թիմի ներսում, բայց խաղը ցույց տվեց, որ Լեհաստանի հավաքականն այս պահին ավելի ուժեղ է Հայաստանի հավաքականից:

- Արթուր Պետրոսյանն արդեն 4 անընդմեջ պարտություն է կրել: Ի՞նչ եք կարծում նրան հրաժարական չի՞ սպառնում:

- Որքանով` ես տեղյակ եմ, Արթուր Պետրոսյանի պայմանագիրն ավարտվում է այս շրջափուլի հետ, և ես կարծում եմ, դրանից հետո ֆուտբոլի ֆեդերացիան կորոշի շարունակե՞լ այս մասնագետի հետ աշխատանքը, թե՞` ոչ:

- Հայաստանում ի՞նչ կանեին հավաքականի գլխավոր մարզչի հետ, որը 6 խաղից 6-ում էլ պարտություն կրեր, ինչպես` Բորոդյուկը Ղազախստանում:

- Կարծում եմ` այդ հարցին պետք է պատասխանի Հայաստանի ֆուտբոլի ֆեդերացիան:

- Արթուր Պետրոսյանը վերջերս իր դժգոհությունը հայտնեց իր տրամադրության տակ գտնվող ֆուտբոլիստների որակական մակարդակից: Կարելի՞ է ասել, որ հայկական ֆուտբոլն այժմ ճգնաժամ ու անկում է ապրում:

- Կարծում եմ` այո, քանի որ եթե նայես նրան, թե ինչպես են խաղում հայկական ակումբները, ինչպես է խաղում ազգային հավաքականը, ակնհայտ է, որ կա որոշակի անկում, բայց կարծում եմ, որ սա ժամանակավոր երևույթ է:

- Կարելի է՞ Հայաստանի հավաքականին համարել «մեկ դերասանի` Մխիթարյանի, թատրոն»:

- Ոչ, համաձայն չեմ այդ տեսակետի հետ: Ֆուտբոլը թիմային խաղ է, իսկ Հենրիխը Հայաստանի հավաքականի ֆուտբոլիստներից մեկն է: Մխիթարյանը շատ բարձրակարգ խաղացող է, որն ունի հիանալի որակներ, սակայն երբ չի խաղում ամբողջ թիմը, նա էլ չի երևում:

- Աշխարհի առաջնության ընտրական փուլում նախավերջին հորիզոնականը Հայաստանի հավաքականի համար ընդունելի՞ արդյունք է:

- Այս պահին, կարծում եմ, այո:

- Ի՞նչ եք կարծում, Հայաստանի հավաքականի համար «Աստանա-Արենայի» արհեստական խոտածածկը կարո՞ղ է խնդիրներ ստեղծել:

- Կարծում եմ` ոչ, բայց իմ անձնական փորձով կարող եմ ասել, որ արհեստական խոտածածկի վրա խաղալը շատ բարդ է, իսկ վնասվածքների վտանգը` մեծ:

- Այս թիմերի միջև գարնանը կայացած խաղում 1:0 հաշիվ էիք կանխատեսել տանտերերի օգտին, բայց ստացվեց` 2:0: Աստանայում կայանալիք խաղին ի՞նչ կանխատեսում կանեք:

- Կարծում եմ` կգրանցվի 1:1 հաշիվը:

Աղբյուր` armsport.am