Փաստ ինֆո

Հայաստանի ազգային հավաքականն աշխարհի 2018 թվականի առաջնության ընտրական փուլի վերջին հանդիպումը կանցկացնի` հյուրընկալվելով Ղազախստանի ընտրանուն:Այս մասին տեղեկացանք՝ Armsport.am ից:

Երկու թիմերի համար էլ առաջիկա խաղը մրցաշարային աղյուսակի տեսանկյունից ոչինչ չի կարող որոշել, սակայն հեղինակության վերականգնման և սեփական երկրպագուներին այս մրցափուլում վերջին անգամ ուրախացնելու տեսանկյունից բավականին մեծ նշանակություն ունի:

Ավարտվող ցիկլում Հայաստանի հավաքականը ոչ մի հաղթանակ չի տոնել արտագնա խաղերում. արտագնա 4 խաղերում կրել է 4 պարտություն: Իսկ Ալեքսանդր Բորոդյուկի թիմը 4 տնային խաղերից երկուսում ոչ-ոքի է խաղացել (Լեհաստանի հետ` 2:2, Ռումինիայի հետ` 0:0), ևս երկուսում պարտվել է (Դանիայից` 1:3, Մոնտենեգրոյից` 0:3):

Անցկացրած 9 խաղերից հետո Հայաստանի ընտրանին 6 միավոր է վաստակել և զբաղեցնում է նախավերջին` 6-րդ հորիզոնականը: Այս ընտրական փուլի շրջանակում տոնած 2 հաղթանակներից մեկը մեր թիմը գրանցել է հենց Ղազախստանի հետ Երևանում կայացած խաղում (2:0):

Հայաստանի և Ղազախստանի հավաքականների դիմակայության պատմությունը

Ավելի վաղ այս երկու հավաքականները 6 անգամ են մրցել միմյանց հետ: 4 անգամ առավելության է հասել Հայաստանի հավաքականը, երկու անգամ էլ բախտը ժպտացել է ղազախներին: Գնդակների տարբերությունը 11:5 է` հօգուտ Հայաստանի ընտրանու:

Առաջին խաղը կայացել է 2004 թվականի փետրվարի 19-ին Կիպրոսի ֆուտբոլի ֆեդերացիայի Գավաթ միջազգային 8-րդ մրցաշարի շրջանակում: Միջազգային մրցաշարի 5-8-րդ տեղերի համար այդ խաղում մեր ընտրանին հետխաղյա 11-մետրանոց հարվածաշրով պարտվել է ղազախներին (3:3, 11.մ` 3:2):

2007 թվականի հունիսի 2-ին Եվրո-2008-ի ընտրական փուլի խաղում Հայաստանի հավաքականը Ալմաթիում 2:1 հաշվով հաղթել է Ղազախստանի հավաքականին, իսկ այդ տարվա նոյեմբերի 21-ին մրցակիցը կարողացել է ռևանշի հասնել և նվազագույն հաշվով առավելության հասնել մեր ընտրանու նկատմամբ:

2008 թվականի մարտի 26-ին Հայաստանի և Ղազախստանի հավաքականներն իրենց ուժերն են չափել ընկերական խաղում, որը տեղի է ունեցել հոլանդական Ռոտերդամ քաղաքում: Այս խաղում մերոնք 1:0 հաշվով հաղթանակ են տոնել:

2012 թվականի հունիսի 5-ին երկու երկների հավաքականները ևս մեկ ընկերական խաղ են անցկացրել, որում մեր ընտրանին 3 անպատասխան գնդակ է ուղարկել Ղազախստանի հավաքականի դարպասը: Վերջին անգամ թիմերը միմյանց հանդիպել են մարտի 26-ին Երևանի Վ. Սարգսյանի անվան «Հանրապետական» մարզադաշտում: Հաղթել է դարձյալ Հայաստանի հավաքականը (2:0):

Այսօր կայանալիք խաղը 7-րդը կդառնա Հայաստանի և Ղազախստանի հավաքականների դիմակայության պատմության մեջ:

Վնասվածքներ և որակազրկումներ

Ընտական փուլի վերջին խաղին վնասվածքի պատճառով չի մասնակցի Հայաստանի հավաքականի կիսապաշտպան Դավիթ Մանոյանը: Լևոն Հայրապետյանը, Հրայր Մկոյանը և Արթուր Սարկիսովը, հիշեցնենք, հավաքականի այս հավաքը ևս բաց են թողնում վնասվածքների պատճառով:

Վարազդատ Հարոյանն ու Գաել Անդոնյանը, որոնք որակազրկման պատճառով բաց թողեցին Լեհաստանի հետ խաղը, կարող են մասնակցել Ղազախստանի հետ խաղին:

Առաջիկա խաղին կարող են մասնակցել նաև Գագիկ Դաղբաշյանն ու Մարկոս Պիզելին, որոնք հիվանդության պատճառով բաց թողեցին լեհերի հետ օրեր առաջ կայացած խաղը: Արթուր Պետրոսյանն արդեն հայտնել է, որ հանդիպմանը չի մասնակցի նաև դարպասապահ Գրիգոր Մելիքսեթյանը:

Ինչ վերաբերում է Ղազախստանի հավաքականին, ապա վնավսածքների և որակազրկումների պատճառով առաջիկա խաղը բաց կթողնեն թիմի առաջատար Բաուրիժան Իսլամխանը, Գեորգի Ժուկովը, Իսլամբեկ Կուատը, Գաֆուրժան Սույումբաևը, Դմիտրի Շոմկոն, Սերիկժան Մուժիկովը, Ալեքսանդր Մոկինը, Թեմիրլան Երլանովը և Ալեքսանդր Մարոչկինը:

Մարզիչների նախախաղային կարծիքները

Մեր ընտրանու գլխավոր մարզիչ Արթուր Պետրոսյանը խաղից առաջ կայացած մամուլի ասուլիսի ընթացքում ընդգծել է, որ սա երկու թիմերի համար հեղինակության հանդիպում է լինելու.

«Ղազախստանի համար սա վերջին տնային հանդիպումն է, և նրանք պետք է տրամադրված լինեն հաղթանակի: Կարծում եմ, որ սա կողմերի համար հեղինակության խաղ է: Սպասում եմ, որ հանդիպումը լարված է լինելու:  

Բոլորն էլ հասկանում են, որ լեհերից կրած այդ ցավալի պարտությունը հեշտ չէ մոռանալ, բայց վստահ եմ, որ տղաները կփորձեն:

Արդյոք Մոուրինյուն խնդրե՞լ է ինձ խնայել Մխիթարյանին. Ոչ, ոչ էլ Մխիթարյանն էլ այդպիսի բան խնդրել: Նա պատրաստ խաղին»,- ասել է Արթուր Պետրոսյանը: 

Ղազախստանի հավաքականի գլխավոր մարզիչ Ալեքսանդր Բորոդյուկն էլ հետևյալ տեսակետն էր հայտնել ընտրական փուլի վերջին խաղից առաջ.

«Ցավոք ունենք կորուստներ ,բայց այն ֆուտբոլիստները, որոնք գտնվում են իմ տրամադրության տակ, վաղը խաղադաշտ դուրս կգան և կպաշտպանեն իրենց հավաքականի պատիվը:

Կասկած չկա, որ մենք փորձելու ենք հարձակվել: Ամենակարևորն այն է, որ ֆուտբոլիստները կարողանան հաղթել միկրոմենամարտերում և ճիշտ ընտրեն իրենց դիրքերը խաղադաշտում: Կարևոր է նաև անհատական վարպետությունը: Մեր թիմը շատ հնարավորություններ է ստեղծում, սակայն դրանք իրացնելու հարցում խնդիրներ են առաջանում:

Շատ եմ ասել, որ ֆուտբոլը թիմային խաղ է: Կարևոր է, որ մեր ֆուտբոլիստները, որոնք մոտ լինեն Մխիթարյանին, փորձեն պայքարել նրա հետ և հաղթող դուրս գան այդ պայքարում: Համաշխարհային ֆուտբոլում հիմա գրեթե ոչ ոք անհատապես չի խաղում»,- ասել է Բորոդյուկը:

Միջազգային բուքմեյքների կարծիքը

Հայաստանի և Ղազախստանի հավաքականները գրեթե հավասար շանսեր ունեն, ըստ բուքմեյքերների: Ղազախստանի հավաքականի հաղթանակը գնահատվում է 2,61 գործակցով, ոչ-ոքին` 3,42, իսկ Հայաստանի հավաքականը հաղթանակը` 2,795:

Ամենահավանական հաշիվը 1:1-ն է:

Ղազախստան-Հայաստան

Հոկտեմբերի 8, Աստանա, «Աստանա-Արենա» մարզադաշտ, ժամը` 20:00:

Աղբյուր` armsport.am