Փաստ ինֆո

ՀՀ Աշխատանքի և սոցիալական հարցերի նախարարության աշխատակազմի ՀՀ բժշկասոցիալական փորձաքննության պետի և ևս 12 անձի վերաբերյալ առանձնապես խոշոր չափերով կաշառք ստանալու գործով նախաքննությունն ավարտվել և գործն արդեն դատարանում է:

Ավելի վաղ ԱԱԾ-ն տեղեկացրել էր, որ ձեռք բերված նախնական տվյալների համաձայն՝ ՀՀ բժշկասոցիալական փորձաքննության գործակալությունում ձևավորվել և տևական ժամանակ գործել է կոռուպցիոն սխեմա, որի միջոցով պաշտոնատար անձինք ստացել են կաշառքներ և դրանք փոխանցել իրենց վերադասներին:

Ձերբակալվել են Բժշկասոցիալական փորձաքննության գործակալության պետը և վերափորձաքննության բաժնի պետը

Մասնավորապես, բժշկասոցիալական փորձաքննությունների տարածքային մի շարք հանձնաժողովների անդամներ, ի պաշտոնե լիազորված լինելով իրականացնել համապատասխան փորձաքննություններ, քաղաքացիներին օրենքով նախատեսված հաշմանդամության խումբ որոշելու դիմաց նրանցից վերցրել են 20-40 հազար ՀՀ դրամի չափով գումարներ: Այնուհետև, ապօրինի և համակարգային բնույթ կրող եղանակով գոյացած գումարները հանձնաժողովների նախագահները բաժանել են անդամների միջև, իսկ մի մասն էլ՝ թողտվության համար պարբերաբար հանձնել բժշկասոցիալական փորձաքննության գործակալության պետին:

Գործակալության պետի աշխատասենյակում կատարված խուզարկության արդյունքում հայտնաբերվել է հանձնաժողովների նախագահներից այդ օրվա ընթացքում ստացված, որոշակի ժամանակահատվածում հավաքագրված գումարների հերթական մասնաբաժինը՝ 2.547.000 ՀՀ դրամ և 600 ԱՄՆ դոլար, որի գերակշռող մասը եղել է ծրարված։
Պարզվել է, որ վերոնշյալ կոռուպցիոն շղթայում ներգրավված է եղել բժշկասոցիալական փորձաքննական մարզային առնվազն ինը, Երևան քաղաքի երկու հանձնաժողովի նախագահ, ինչպես նաև վերափորձաքննության բաժնի պետը:

Առերևույթ հանցագործության դեպքի առթիվ հարուցվել է քրեական գործ՝ՀՀ քրեական օրենսգրքի 311 հոդվածի 3-րդ մասի 2-րդ կետի հատկանիշներով (մի խումբ պաշտոնատար անձանց կողմից նախնական համաձայնությամբ կաշառք ստանալը):

Քրեական գործով անցնում են 13 ամբաստանյալ, այսպիսով ըստ ՀՀ բժշկասոցիալական փորձաքննության գործակալության պետ Արմեն Սողոյանին առաջադրված մեղադրանքի՝ Երևանի Կոմիտասում և Արմենակյան փողոցում գտնվող աշխատասենյակներում ընդունել է Ժաննա Հովհաննիսյանին և իրեն ենթակա ԲՍՓ հանձնաժողովների մնացած նախագահներին և մեկ միասնական դիտավորությամբ նրանցից ստացել է առանձնապես խոշոր չափերով` ընդհանուր առմամբ 1.528.600 դրամին համարժեք կաշառք:

ՀՀ աշխատանքի և սոցիալական հարցերի նախարարության աշխատակազմի ՀՀ բժշկասոցիալական փորձաքննության գործակալության Երևան քաղաքի թիվ 6 բժշկասոցիալական փորձաքննության հանձնաժողովի նախագահ Ժաննա Հովհաննիսյանին առաջադրված մեղադրանքի՝ Արմեն Սողոյանին 2016թ. դեկտեմբերի 22-ին վերջինիս աշխատասենյակում որպես կաշառք տվել է 200.000 ՀՀ դրամ, որի դիմաց Արմեն Սողոյանը պարտավոր լինելով օրենքով սահմանված կարգով համապատասխան պաշտոնատար անձանց տեղեկացնել իր ենթակայի կատարած կոռուպցիոն բնույթի իրավախախտումների մասին, ի պաշտոնե միջոցներ չի ձեռնարկել նրա ապօրինությունները կասեցնելու ու բացահայտելու ուղղությամբ:

Գործակալության վերափորձաքննության բաժնի պետ Արամ Պետրոսյանին առաջադրված մեղադրանքի համաձայն՝ նա Սողոյանին 2016թ. դեկտեմբերի 23-ին վերջինիս աշխատասենյակում որպես կաշառք տվել է 150.000 ՀՀ դրամ:

ՀՀ բժշկասոցիալական փորձաքննության հանձնաժողովի նախագահ Արոնա Սիմոնյանին մեղադրանք է առաջադրվել Արմեն Սողոյանին 2016թ. դեկտեմբերի 23-ին վերջինիս աշխատասենյակում որպես կաշառք 288.600 ՀՀ դրամին համարժեք 600 ԱՄՆ դոլար տալու համար,

ՀՀ բժշկասոցիալական փորձաքննության գործակալության Արարատի մարզի թիվ 2 բժշկասոցիալական փորձաքննության նախագահ Զորիկ Մկրտչյանն մեղադրվում է Արմեն Սողոյանին մեկ միասնական դիտավորությամբ 2016թ. նոյեմբերի 24-ին և 2016թ. դեկտեմբերի 23-ին վերջինիս աշխատասենյակում որպես կաշառք համապատասխանաբար 40.000 և 100.000 ՀՀ դրամ տալու համար,

ՀՀ բժշկասոցիալական փորձաքննության գործակալության Շիրակի մարզի թիվ 3 բժշկասոցիալական փորձաքննության հանձնաժողովի նախագահ Երեմ Մարգարյանին՝ Արմեն Սողոյանին 2016թ. դեկտեմբերի 23-ին 100 000 ՀՀ դրամ կաշառք տալու համար,

ՀՀ բժշկասոցիալական փորձաքննության գործակալության Սյունիքի մարզի թիվ 2 բժշկասոցիալական փորձաքննության հանձնաժողովի նախագահ Լիլիա Մանուցյանին՝ Արմեն Սողոյանին 2016թ. դեկտեմբերի 23-ին 100.000 ՀՀ դրամ կաշառք տալու համար,

ՀՀ բժշկասոցիալական փորձաքննության գործակալության Երևան քաղաքի թիվ 1 բժշկասոցիալական փորձաքննության հանձնաժողովի նախագահ Արմեն Ավետյանին մեղադրանք է առաջադրվել Արմեն Սողոյանին 2016թ. դեկտեմբերի 23-ին վերջինիս աշխատասենյակում որպես կաշառք 100.000 ՀՀ դրամ տալու համար,

ՀՀ բժշկասոցիալական փորձաքննության գործակալության Վայոց Ձորի բժշկասոցիալական փորձաքննության հանձնաժողովի նախագահ Ցիալա Խուդինյանին՝ Արմեն Սողոյանին 2016թ. դեկտեմբերի 23-ին վերջինիս աշխատասենյակում 150.000 ՀՀ դրամ կաշառք տալու համար,

ՀՀ բժշկասոցիալական փորձաքննության գործակալության Կոտայքի մարզի բժշկասոցիալական փորձաքննության հանձնաժողովի նախագահ Ժիրայր Պետրոսյանին՝ Արմեն Սողոյանին 2016թ. դեկտեմբերի 23-ին 100.000 ՀՀ դրամ կաշառք տալու համար,

ՀՀ բժշկասոցիալական փորձաքննության գործակալության Արմավիրի մարզի բժշկասոցիալական փորձաքննության հանձնաժողովի նախագահ Արշավիր Հմայակյանին՝ Արմեն Սողոյանին 2016թ. դեկտեմբերի 23-ին վերջինիս աշխատասենյակում որպես կաշառք 100.000 ՀՀ դրամ տալու համար,

ՀՀ բժշկասոցիալական փորձաքննության գործակալության Արարատի մարզի թիվ 1 բժշկասոցիալական փորձաքննության հանձնաժողովի նախագահ Ալլա Թովմասյանին մեղադրանք է առաջադրվել Արմեն Սողոյանին 2016թ. դեկտեմբերի 23-ին վերջինիս աշխատասենյակում որպես կաշառք 100.000 ՀՀ դրամ տալու համար,

ՀՀ բժշկասոցիալական փորձաքննության գործակալության Երևան քաղաքի թիվ 6 բժշկասոցիալական փորձաքննության հանձնաժողովի Բժիշկ-փորձագետ Շողիկ Ավետիսյանին՝ Արմեն Սողոյանին 2016թ. հոկտեմբերի 11-ից մինչև դեկտեմբերի 13-ն ընկած ժամանակահատվածում իրենց հատկացված աշխատասենյակում մեկ միասնական դիտավորությամբ որպես խոշոր չափերով կաշառք ստացել են ընդհանուր առմամբ 265.000 ՀՀ դրամ:

Արմեն Սողոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, Ժաննա Հովհաննիսյանին՝ 312-րդ հոդվածի 2-րդ մասով, 311-րդ հոդվածի 3-րդ մասի 2-րդ և 3-րդ կետերով, 178-րդ հոդվածի 2-րդ մասի 1.1 կետով, Արամ Պետրոսյանին՝ 312-րդ հոդվածի 1-ին մասով, Արոնա Սիմոնյանին՝ 312-րդ հոդվածի 2-րդ մասով, Զորիկ Մկրտչյանին, Երեմ Մարգարյանին, Լիլիա Մանուցյանին, Արմեն Ավետյանին, Ցիալա Խուդինյանին, Ժիրայր Պետրոսյանին, Արշավիր Հմայակյանին, Ալլա Թովմասյանին Մեղադրանք է առաջադրվել 312 –րդ հոդվածի 1-ին մասով, իսկ Շողիկ Ավետիսյանին՝ 311-րդ հոդվածի 3-րդ մասի 2-րդ և 3-րդ կետերով և 38-34-312-րդ հոդվածի 1-ին մասով:

Քրեական գործով երկու անձի՝ Արմեն Սողոյանի և Արամ Պետրոսյանի նկատմամբ որպես խափանման միջոց է ընտրվել կալանավորումը, իսկ մյուսների նկատմամբ՝ չհեռանալու մասին ստորագրությունը:

Աղբյուր` Փաստինֆո